JOHAN

CAKUAT PAHNIHNAK

2 John

Biahmaiṭhi

Johan cakuat pahnihnak hi “Khrihfa upa” nih “dawtmi Bawinu le a fale hna sinah” kuatmi a si, a sullam cu Khrihfabu le a chung i a ummi Khrihfa hna ti si dawh a si. Tawi tein a ṭialmi bia nih hin chim a duhmi cu pakhat le pakhat i dawt i cawnpiaktu hmaanlo hna le an cawnpiaknak ahmaan lomi i ralrin kha a si.

Tlangpi Hna
Biahmaiṭhi 1-3
Dawtnak biapi bik 4-6
Cawnpiaknak hmaanlo ralrinnak 7-11
Biatlangkawm 12-13

2Johan 1

1Khrihfa Upa nih,
Ka dawtmi Bawinu le a fale hna kha ca kan kuat hna. Keimah lawnglawng hi an dawtu hna ka si lo, biatak kha a hngalmi vialte nih cun an in dawt hna, 2zeicahtiah biatak cu kan chungah a hmun i kan sinah a um zungzal lai.

3Pa Pathian le a Fapa Jesuh Khrih nih velngeihnak le zaangfahnak le daihnak cu an kan pek lai i biatak le dawtnak in kan ta an si zungzal lai.

Biatak le Dawtnak

4Kan Pa nih a kan fial bantukin na fale cheukhat cu biatak in an nung ti kha ka theih tikah ka lung aa lawm tuk hringhran. 5Cucaah cun ka dawtmi Bawinu, pakhat le pakhat i daw hna u sih. Hihi nawlbia thar kan kuatmi a si lo, a hramthawk tein kan rak ngeih cangmi nawlbia kha a si ko. * 6Atu i ka chimmi dawtnak a sullam cu Pathian nawl zul in kan nun awk a si ti hi a si ko. Cu nawlbia cu, a hramthawk tein nan dihlak in nan rak theihmi kha, i daw niakmak tein kan um dih awk a si, ti hi a si.

7Hlengtu tampi, Jesuh Khrih cu minung in a ra lo pei, a titu hna kha vawlei cungah an i chawk. Cu bantuk mi cu mihlengtu kha an si i Khrih Ral kha an si. 8Cucaah nan ṭuan lengmang hnawhchanmi kha nan sungh sual nakhnga lo le nan laksawng kha tling tein nan hmuh nakhnga, ralring tein um ko u.

9Khrih cawnpiaknak chungah um peng loin kar hlei a lammi nih cun Pathian kha an ngei lo. Cawnpiaknak chungah khan a um pengmi nih cun Pa he Fapa he an ngeih hna. 10Ahohmanh nan sin i an rat tikah hi cawnpiaknak hi an rak i ratpi lo ahcun, tluninn rak onh hna hlah u; “Na cungah daihnak um ko seh,” ti zongah rak ti hna hlah u. 11Zeicahtiah cu bantukin a cungah daihnak um seh, ti a duhpiaktu kha a thil ṭhalo tuahmi ah khan aa tel vemi ah a cang.

Biatlang Kawmnak

12Chimh awk tampi kan ngei ko hna, sihmanhsehlaw ca le cahang in si loin a tlawn tu in ka rak in tlawn hna lai i kan i lawmhnak kha a tlin naklai kan pum in bia kan i ruah lai.

13Na dawtmi na Unaunu fale hna nih daihnak an in kuat.

⇑

[Remove Footnotes]