PETER

CAKUAT PAHNIHNAK

2 Peter

Biahmaiṭhi

Peter cakuat pahnihnak hi, Khrihfa hmasa pawl hmun dangdang i a ummi hna sin i kuatmi a si. Aa tinh bikmi cu, cawnpiaktu hmaanlo hna le cu hna cawnpiaknak nih ziaza ṭhalo a chuahtermi doh kha a si. Cu bantuk cawnpiaknak hmaanlo lehnak a ṭha bik cu Pathian le Jesuh Khrih hngalhnak ahmaanmi kha a si i, cu hngalhnak cu Jesuh a hmu hrimhrimmi le a bia chim a thei hrimhrimmi hna nih an chimmi bia thawngin hngalhmi kha a si, a ti. Hi cakuat ṭialtu nih hin awlokchong ngai thil ah a ruahmi cu, Khrih a ra ṭhan lai lo, tiah an i cawnpiaknak kha a si. Khrih a rauh hi, “Pathian nih ahohmanh kha rawhnak phan loin an dihlak in an sualnak kha mertak hna seh ti a duh caah a si,” a ti.

Tlangpi Hna
Biahmaiṭhi 1.1-2
Khrihfa si awk kawhnak 1.3-21
Cawnpiaktu hmaanlo hna 2.1-22
Jesuh rat ṭhannak 3.1-18

2Peter 1

1Jesuh Khrih sal le lamkaltu a simi Simon Peter nih,

Kan Pathian a dinnak thawng le kan Khamhtu Jesuh Khrihthawngin kan zumhnak tlukin a sunglawimi zumhnak a hmu vemi nan sinah ca kan kuat hna.

2Pathian nan hngalhnak thawng le kan Bawipa Jesuh nan hngalhnak thawngin vel le daihnak cu tlamtling tein nan ta si ko hna seh.

Pathian Kawhnak le Thimnak

3Pathian sunparnak le ṭhatnak i hrawm ve awkah a kan kotu kan hngalhnak thawngin Pathian ṭihzah in nun awkah kan herhmi thil vialte cu amah Pathian ṭhawnnak lila nih cun a kan pek. 4Cuticun a ngan ngaingaimi le a sung ngaingaimi laksawng a kan kamhmi cu a kan pek i cu laksawng a kan pekmi thawng cun a kan hrawkhral khotu vawlei pumsa duhnak chung hin nan luat kho lai i Pathian sining cu nan i hrawm kho lai. 5Hi ruang hrimhrim ah hin, nan zumhnak i ṭhatnak chap kha fak piin i zuam u; cun nan ṭhatnak ah khan hngalhnak i chap u; 6nan hngalhnak ah khan mah le mah i uk khawhnak i chap u; mah le mah i uk khawhnak ah khan in khawhnak i chap u; in khawhnak ah khan Pathian ṭihzahnak i chap u; 7Pathian ṭihzahnak ah khan unau bantukin i dawtnak i chap u law unau bantukin i dawtnak ah khan zawnruahnak i chap u. 8Hi thil hi nan herhmi an si i tam piin nan ngeih hna ahcun Bawipa Jesuh Khrih nan hngalhnak ah khan ṭhawnnak an pek hna lai i rian tampi an ṭuanter khawh hna lai. 9Sihmanhsehlaw cu thil a ngei lomi cu lamnaite lawng a hmu khomi a si i thil dang zeihmanh a hmu kho lomi bantuk a si, amah nih cun ka sualnak kha ṭawlpiak ka si cang, ti kha a philh.

10Cucaah cun ka u le ka nau hna, Pathian nih an thimnak hna le an kawhnak hna cu nan chungah fehter chinchin ko u; cu ti nan tuah ahcun nan tlu bal lai lo. 11Cuticun kan Bawipa le kan Khamhtu Jesuh Khrih Pennak, zungzal in a hmunmi chungah khan luhnak nawl nan hmu lai.

12Hi thil hi nan hngal ko cang nain le biatak nan hmuhmi chungah fek tein nan dir cang ko nain kan chimh ṭhan lengmang ko rih hna lai. 13Ka nun chung paoh cu, hi kong kan hngalhter ṭhan lengmang hna hi a herh hrimhrimmi a si, tiah ka ruah. 14Kan Bawipa Jesuh Khrih nih fiang tein a kan chimh bantukin, hi a thi khomi pum hi cu, tuan ah kaa phoih ko lai. 15Cucaah cun ka thih hnuah hi thil hi nan run philh hna nakhnga lo nan ca i lam serpiak kha kaa zuam khawh chungin kaa zuam lai.

Khrih Sunparnak Hmutu Tehte

16Kan Bawipa Jesuh Khrih ṭhawnnak in a rat kha, kannih nih kan in chimh hna tikah, mi phuahchommi tuanbia ṭukṭak kha kan i rinhmi an si lo. A lianhngannak kha kan mit hrimhrim in kan hmuh. 17Sunparnak Cung Nung Bik nih, “Hi hi ka dawtmi ka Fapa a si, ka lung a ka tongtu a si,” tiah a ti i Pathian kan Pa nih upatnak le sunparnak a pek tikah khan, cuka hmun ah cun kannih kha kan um. * 18Tlang thiang cung i amah sin kan um lioah, hi aw cu vancung in a run kha kanmah hrimhrim nih kan theih.

19Cucaah cun profet hna nih an rak chimmi bia kha kan zumh chinchin. Cu bia cu nannih zong nih ṭha tein nan ngaih ahcun a ṭha lai, zeicahtiah khua a hung dei i deirel arfi nan lung chung i a hung ceu hlantiang, muihnak hmun i a ceumi mei-inn bantuk khi, cu bia cu a si. 20Cun cu pinah hihi philh hlah u. Cathiang chung i a ummi profet bia kha ahohmanh nih anmah tein a sullam an i hngalh kho lo. 21Zeicahtiah profet bia cu minung duhnak chung menmen in a chuakmi a si lo, sihmanhsehlaw Pathian sinin a rami bia kha mi nih an chim tikah, Thiang Thlarau nih a fial hna caah a si.

⇑

[Remove Footnotes]