THESALON

KHUAMI SIN PAUL CAKUAT PAHNIHNAK

2 Thessalonians

Biahmaiṭhi

Khrih rat ṭhannak kong nih khan Thesalonika khua Khrihfabu kha a tuai ṭhiamṭhiam rih hna i a cakuat pahnihnak hi, Bawipa rat ṭhan ni cu a phan diam cang, a timi hna bia a lehnak hna a si. Cu ruahnak hmaan lo cu Paul nih hin remh a duh i Khrih a rat ṭhan hlanah hin ṭhat lonak cu a zik a phan lai i cu ṭhat lonak nganpi a chuahpitu le a hruaitu cu “Miṭhalo Pa” Khrih dotu timi kha a si lai, a ti.

Paul nih hin fak piin chimh a duhmi hna cu, harnak le temhinnak fak piin tlung hmanh seh law nan zumhnak ah khan fek tein um ko u law nan khuasak nan tintuknak caah keimah le ka hawile kha kan zohchun zungzal u law rian kan ṭuan bantuk khan ṭuan zungzal ve u law ṭhatnak tuah kha ngol hlah u, ti hi a si.

Tlangpi Hna
Biahmaiṭhi 1.1-2
Thangṭhatnak hla le lawmhnak 1.3-12
Khrih rat ṭhannak cawnpiaknak 2.1-17
Khrihfa ziaza forhnak 3.1-16
Biatlangkawm 3.17-18

2Thesalon 1

1Paul, Silas le Timote nih,

Thesalonika khuachung Khrihfabu chung i a ummi,
Pathian kan Pa le Bawipa Jesuh Khrih ta a simi Khrihfami kha ca kan in kuat hna. *

2Pathian kan Pa le Bawipa Jesuh Khrih nih vel le daihnak in pe ko hna seh.

Khrih Rat Tikah Biaceihnak

3U le nau hna, nanmah ruangah Pathian cu a zungzal in kan lawmh. Nannih nan zumhnak kha a ṭhan i pakhat le pakhat nan i dawtnak le midang nan dawt hnanak kha a ngan chinchin caah, cu ti Pathian kan lawmh cu ahmaanmi thil a si. 4Cucaah Pathian Khrihfabu hna sinah nanmah kong cu kan i porhlaw i hremnak le temhnak nan inmi vialte chungah fel tein nan um i nan zumhnak a dorh lo caah kan in thangṭhat hna. 5Hi nih hin Pathian biakhiahnak a dinning cu a langhter. Sifahnak nan in hnawhchanmi Pathian Pennak he khan aa tlakmi an siter hna lai. 6Pathian nih a hmaanmi thil kha a tuah lai. Sifahnak nan cungah a tluntertu hna cungah khan sifahnak a tlunter ve lai i 7sifah a ingmi nan cung le kanmah cung zongah damnak a tlunter lai. Bawipa Jesuh nih a vancungmi miṭhawng hna le 8meizik he, Pathian a hngal lomi hna le Bawipa Jesuh kong Thawngṭha a ngai duh lomi hna dantat awkah, a rung ṭum tikah ding tein a tuah lai. 9-10Bawipa cu a mi hna lakah sunparnak hmuh awkah a rat i a zummi vialte nih an hlorh ni, cu Ni lianngan ah cun, annih cu zungzal rawhralnak dantatnak kha an huah lai, Bawipa hmaika khan dawi an si lai i a liannganmi a ṭhawnnak kha an hmu lai lo. Sihmanhsehlaw nannih cu kan in chimhmi hna bia kha nan zumh caah sunparnak a pe i a hlorhtu hna lakah cun nan i tel ve lai. *

11Hi ruangah hin nan ca i thla kan cam zungzal cu a si. Pathian nih an kawhnak hna he aa tlakmi nunning in nan nun nakhnga kan Pathian cu kan hal lengmang. Amah nih cun nan duhmi vialte cu ṭhatnak caah tlinter seh law nan zumhnak rianṭuannak cu tlamtlinter ko seh. 12Hitihin kan Bawipa Jesuh min nih nan sinin thangṭhatnak a hmuh lai i kan Pathian le Bawipa Jesuh velngeihnak thawngin nannih zong nih amah sinin sunparnak nan hmuh ve lai.

⇑

[Remove Footnotes]