JOHAN

CAKUAT PATHUMNAK

3 John

Biahmaiṭhi

Johan cakuat pathumnak hi “Khrihfa Upa” nih Khrihfabu hruaitu Gaius sinah a kuatmi a si. Hi cakuat ṭialtu nih hin Gaius cu Khrihfa dang a bawmh hnanak kong ah khan a thangṭhat i Diotrefes kha rak i ralring tiah bia a cah.

Tlangpi Hna
Biahmaiṭhi 1-4
Gaius kha a thangṭhat 5-8
Diotrefes kha a thangchiat 9-10
Demetrius kha a thangṭhat 11-12
Biatlangkawm 13-15

3Johan 1

1Khrihfa Upa nih,
Ka dawt taktakmi Gaius, ca kan kuat. * 2Ka dawtmi ka hawi, ngandam tein khua na sak i zeizong vialte na caah rem tein a um nakhnga thla kan campiak — thlarau leiah siarem in khua na sa ti kha ka hngalh. 3Biatak leiah zeitluk in dah zumhawktlak in na um ti kha kan unau cheukhat nih an ra ka chimh tikah ka lung aa lawm tuk hringhran — nang cu biatak chungah na um zungzal tawn ko bantuk khan. 4Ka fale biatak chungah khua an sa, ti thawng hlei in a ka lawmhter deuhtu zeihmanh a um ti lo.

Gaius Kha A Thangṭhat

5Ka dawtmi ka hawi, kan unau hna kha na theihhngalh bal lomi an si nain an ca i nan rak tuahmi kha rian ṭha le zumhawktlak ngaingai a si. 6Na rak dawt hnanak kha hika Khrihfabu sinah hin an chim. Hmailei an kalnak ding zongah Pathian duhnak he aa tlak dingin rak bawm ko rih hna. 7Zeicahtiah Khrih rian ṭuan awk khualtlawn ah khan, a zum lomi sinin bawmhnak zeihmanh la loin, an i thawh. 8Cucaah biatak rian kha a ṭuanpitu kan si nakhnga, kannih Khrihfami nih hi hna cu kan bawmh awk an si.

Diotrefes le Demetrius

9Khrihfabu sinah ca tawite hi ka ṭial, sihmanhsehlaw an hruaitu si a duhmi Diotrefes nih khan cun ka chimmi hi zeihmanh ah a rel lai lo. 10Ka rat tikah a tuahmi vialte kha ka phuan dih lai; kan konglam i thil ṭhalo tampi a chimmi le lih a chimmi tehna vialte kha. Cun cu lawng cu aa za rih lo, kan unau pawl kha an rat tikah a rak dawnh hna i kan tlung hna seh tiah a titu hna kha i tlunter hna hlah u, tiah a thlauh hna i Khrihfabu chung khan chuah a timh hna.

11Ka dawtmi ka hawi, a ṭha lomi nawl cu i cawn hlah, a ṭhami nawl tu i cawn ko. Thil ṭha a tuahmi paoh cu Pathian mi an si, thil ṭhalo a tuahmi paoh nih cun Pathian kha an hmu lo.

12A mi kip nih Demetrius cu an thangṭhat i biatak hrimhrim zong nih a thangṭhat. Cun kannih zong nih kan thangṭhat ve i kan chimmi cu biatak a si ti kha na hngalh.

Biatlang Kawmnak

13Chimh awk tampi kan ngei ko hna, asinain ca le cahang in chimh cu ka duh lo. 14Tuan ah ka rak in hmuh hna lai i cu tikah kan pum tu in kan i ruah hna lai.

15Nan cungah daihnak um ko seh.

⇑

[Remove Footnotes]