Lamkaltu 19

Efesa Khua Ah Paul A Phan Ṭhan

1Apollo kha Korinth khua i a um lioah Paul cu kha peng chungah khan khual a tlawng i Efesa khua kha a phan. Khika ah zultu tlawmpal kha a va hmuh hna i 2annih cu a thawh hna i, “Nan zumh ah khan Thiang Thlarau nan rak hmu maw?” tiah a hal hna.

Annih nih, “Thiang Thlarau cu a um le um lo hmanh kan hngalhṭung lo,” tiah an leh.

3“A si kun ahcun, zei bantuk tipilnak dah nan in kun?” tiah Paul nih cun a hal hna. Annih nih, “Johan tipilnak,” tiah an leh.

4Cun Paul nih cun a thawh hna i, “Johan tipilnak cu lungthlen hmelchunhnak caah a si, asinain Johan nih khan, ‘Ka hnu in a ra liomi hi nan zumh awk cu a si,’ tiah a ti zungzal hna i cu a hnu in a rami cu Jesuh hi a si,” tiah a ti hna. *

5Cucu an theih tikah annih cu Bawipa Jesuh min in tipilnak kha an ing. 6Paul nih an cungah a kut a chuan i Thiang Thlarau kha an cungah a tlung; holh theih loin an holh i Pathian bia zong kha an chim. 7Annih cu an dihlak in pa pahleihnih tluk an si.

8Paul cu pumhnak inn chungah khan a lut i thla thum chung mizapi kha ralṭha ngaiin a chimh hna, annih kha heh tiah a al hna i Pathian Pennak kong i an lung a pem nakhnga aa zuam. 9Sihmanhsehlaw annih lak i a cheukhat cu an lung a khong i an zum duh lo; Bawipa Lam kong kha zapi hmaiah a ṭhalo tiah an ti. Cucaah Paul nih khan a chuahtak hna i zultu pawl kha aa kalpi hna; ni fate in Tirannas biachimnak inn timi ah khan mi kha a cawnpiak hna. 10Cuticun kum hnih chung a tuah i Asia ram chung i a ummi vialte nih, Judah mi si hna seh, Grik mi si hna seh, Bawipa bia kha an theih.

Skeva Fapa Hna

11Pathian nih voi dang i a um tawn lomi khuaruahharnak kha Paul kut in a tuah. 12A pavuah le a hngawngngerh hna hmanh kha mizaw sin i an hei kalpi hna tikah an zawtnak kha a dam i an chungin khuachia kha an chuak. 13Judah mi a cheu khuachia ṭhawl i aa chawk lengmangmi hna nih khan cu khuachia ṭhawlnak ah cun Bawipa Jesuh min kha an hman ve. Khuachia cu an thawh hna i, “Paul nih a chimmi Jesuh min in chuak kaan ti,” an ti hna. 14Cu bantukin a tuahmi cu, Judah mi Tlangbawi Ngan Skeva fapa pasarih an si.

15Sihmanhsehlaw khuachia nih cun a thawh hna i, “Jesuh cu ka hngalh i Paul zong cu ka hngalh, sihmanhsehlaw nannih cu ahodah nan si?” tiah a ti hna.

16Khuachia a ngeimipa nih cun a ṭhuat ciammam hna i a tei hna i hmapu le an puan tlek dihlak in a inn cun an zaam. 17Efesa khua i a ummi Judah mi le Grik mi vialte hna nih cu kong cu an theih i an thin a phang i Bawipa Jesuh min cu an upat chinchin. 18A zummi lak i mi tampi kha an ra i zapi hmaiah an tuahmi vialte kha an phuan. 19Camh a rak hmang tawnmi hna nih khan an cauk kha hmunkhat ah an pumh hna i zapi hmaiah khan an khangh hna. Cauk man cu an tuak tikah tangka thong sawm nga tluk a si. 20Cuticun Bawipa bia cu a karh chin lengmang i a ṭhang i a ṭhawng chin lengmang.

Efesa Khua Chungah Hnahnawhnak

21Hi bantukin thil a um hnuah Paul nih Masidonia ram le Grik ram kha ka tlawng lai i Jerusalem ah ka lan colh te lai, tiah a ruah. “Cun cuka ka phak hnuah Rom zong hmuh hrimhrim kaa zuam lai,” tiah a ti. 22Cucaah amah a bawmtu pahnih Timote le Erastas kha Masidonia leiah a thlah hna i amah tu cu Asia ram chungah khan caan tam deuh a run hmang.

23Hi caan lioah hin Bawipa Lam kong ah Efesa khua chungah hnahnawhnak a um. 24Ngun sosertu pakhat, a min Demetrius a simi nih khan Artemis khuazingnu biakinn lem tete kha ngun in a ser hna i cu rian nih cun a rianṭuantu pawl kha tampi miaknak a pek hna. 25Cucaah annih cu hmunkhat ah a auh dih hna i, anmah rian bantuk an rian a si vemi zong kha a auh chih hna i, “Ka duale hna, nannih nih nan hngalh bantukin kan chaw hmuhnak cu hi rian hi a si. 26Cun hipa Paul nih hin zeidah a tuah ti cu nanmahte nih nan i hmuh khawh i nan i theih khawh fawn ko. Aa thawh i, ‘Mi sermi pathian cu pathian an si lo,’ a ti i Efesa khua ah hin siseh, cun Asia ram chung zongah hin a dihlak dengmang in, mi tampi kha an lung a pemter hna. 27Cucaah cun hi kan rian hi a min a chia cang lai tiah thinphan awk a si ko. Cu lawng hmanh cu si loin, a liannganmi khuazingnu Artemis, Asia ram chung le vawleicung dihlak ah mi kip nih an biakmi hi a lianhngannak hi a lo lai i a biakinn zong hi sullam ngei lo a si lai ti phan awk a si fawn,” tiah a ti hna.

28Aa pummi hna nih cun cu bia cu an theih tikah an thin a hung ciammam i an au i, “Efesa i a ummi Artemis cu a lianngan ko,” an ti. 29Cuti i an i tuainak cu khuachung kha a khat dih. Mibu nih cun Paul sin i khual a tlawng vemi Masidonia mi pahnih, Gaius le Aristarkas kha an tlaih hna i bual ah khan an tlikpi hna. 30Paul nih amah pum in mizapi hmai i va kal kha a duh, sihmanhsehlaw zumtu hna nih khan an thlauh. 31Cun ram uktu bawi a cheukhat, a hawikom a simi hna zong nih khan, bual ah cun rak chuak hlah seh tiin bia an cah. 32Cun an i pumhnak cu a ningpi in hnahnawk luri ngaiin a um: mi a cheu an aumi cu thil pakhat a si i a dang an rak aumi cu thil dang a si ve; a tam deuh nih cun zeicahdah kan i pumh ti hmanh kha an hngal lo. 33Judah mi nih Alekzandar kha hmailei ah an hei chuahter caah khan, hi thil a chuahtertu hi Alekzandar cu a si rua tiah an ruah. Alekzandar nih cun mizapi cu, dai u, tiah a kut a hun zaoh hna i an hmaiah cun aa runvennak bia kha chim hram a hun thawk. 34Sihmanhsehlaw Judah mi a si kha an hngalh tikah an dihlak cun an au bon khan suimilam pahnih chung an au i, “Efesa khua i a ummi Artemis cu a lianngan ko,” an ti.

35A donghnak ah khua cazi nih khan mizapi cu a daihter khawh hna. A thawh hna i, “Efesa khuami hna, Efesa khua hi a liannganmi Artemis biakinn a umnak le vancung in a rung tlami lung thiang a umnak a si ti kha ahodah a hngal lomi a um? 36Ahohmanh nih, hihi a si lo tiah an ti kho lai lo. Cucaah cun nannih cu nan daih awk a si; ruat setsai loin zeihmanh nan tuah awk a si lo. 37Hi mi hna nih hin biaknak inn thil kha zeihmanh an fir lo i kan khuazingnu kha zeihmanh a thang an chiat lo nain, hika ah hin nan chuahpi hna. 38Demetrius le a rianṭuantu hna nih taza an cuai duhmi an um ahcun biaceihnak zung chuah ni a um ko i biaceihtu zong an um fawn ko; cuka ah cun pakhat le pakhat taza i cuai khawh a si ko. 39Cun cu nak biapi deuh kha nan duh a si ahcun khuami zapi pumhnak ah khiah awk a si fawn ko. 40Nihin i hi thil a ummi ruangah hin kannih cu hnahnawhnak nan chuahter tiin mawhchiatnak pek kan fawite. Hi hnahnawhnak kongah hin i sonhtarh awk zeihmanh a um lo i hihi zeicahdah hi bantukin a si ti hi ṭha tein chim awk bia kan ngei fawn lo,” tiah a ti. 41Cu bia a chim dih in pumhnak khan a ṭianter hna.

⇑

[Remove Footnotes]