KOLOSE

KHUAMI SIN PAUL CAKUAT

Colossians

Biahmaiṭhi

Kolose khua hi Asia Minor ram i a ummi a si i Efesa khua hin nichuahlei ah a um. Kolose khua Khrihfabu hi Paul nih a sermi a si lo, asinain an cungah hin ṭuanvo ka ngei tiin a ruah ngaingai, zeicahtiah Efesa khua khan rianṭuantu kha a thlah hna i cu hna nih cun hi khua hrawngah hin Khrihfabu cu an va ser hna. Paul nih hin, Kolose khua ah hin, cawnpiaktu hmaanlo kha an um i cu hna nih cun Pathian hngalhnak le khamhnak tling hmuh khawhnak ah hin “uktu bawi le nawlngeitu hna” kha biak an herh, an ti kha a theih. Cun cuhleiah, hi cawnpiaktu pawl nih hin, Khrihfa mi nih cun phungphai tampi zulh awk hrimhrim kan si i kan cuarpar hoi hna zong hi kan i tan hrimhrim awk a si an ti hleiah ei le din kong zongah hin ulh-amhmi kan ngeih hrimhrim awk a si, an ti fawn. Paul nih hi hna pawl cawnpiaknak hmaan lo cu Khrihfa phung cawnpiaknak a si lo ti kha langhter a duh. A lehnak hna a muru cu hitihin a si ko: Jesuh Khrih lawnglawng nih hin khamhnak tling cu a kan pek khawh i hi a dang cawnpiaknak hna hi cu Jesuh Khrih sinin a kan pialtertu an si lehlam ti hi a si. Khrih thawngin Pathian nih vawlei kha a ser i Khrih thawng ṭhiamṭhiam in Pathian nih vawlei cu amah sinah khan a kirpi ṭhan lai. Cucaah cun vawlei caah hin Khrih he i pehtlaihnak lawnglawng in khamhnak ca ruahchannak a um. Cun Paul nih hi cawnpiaknak hi a zummi caah nifate kan nunnak ah zei sullam dah a ngeih ti kha a hun langhter.

Hi ca Kolose khua Khrihfabu sinah a hei phortu hi Taikhikas a si i amah cu Onesimas nih khan a zulh. Onesimas cu Filemon salpa, amah kong i Paul nih Filemon ca a kuat phahmi pa kha a si.

Tlangpi Hna
Biahmaiṭhi 1.1-8
Khrih sining le rianṭuannak 1.92.19
Khrih chungah nunnak thar 2.204.6
Tlangkawmnak 4.7-18

Kolose 1

1Kolose khua i a um Pathian mi, Khrih chungah zumh awk tlak a simi kan u le kan nau hna,

2Pathian duhnak in Khrih Jesuh lamkaltu a simi keimah Paul le kan nau Timote nih ca kan in kuat hna.

Pathian kan Pa nih vel le daihnak in pe ko hna seh.

Lawmhnak Thlacam

3Nan ca i thla kan cam tikah, kan Bawipa Jesuh Khrih i a Pa kan Pathian sinah lawmhnak bia kan chim zungzal. 4Zeicahtiah Khrih Jesuh nan zumhnak le Pathian mi nan dawtnak hna kong kha kan rak theih. 5Biahmaan taktak, Thawngṭha Bia kha, nan sin a phak terte ah khan, ruahchannak zeidah an pek hna ti cu nanmah nih nan hngalh. Cuticun nan zumhnak le dawtnak nan ngeihmi cu vancung i nan ca i chiahmi ruahchannak cungah an hram cu a dir. 6Thawngṭha nih hin Pathian vel nan theih kate le cucu zeidah a si taktak ti nan hngalh ri in nan cungah rian a ṭuan bantuk khan, vawlei cung dihlak zongah a karh i thluachuahnak kha a pek hna. 7Cucu Epafras sin khan nan theih; amah cu kan rianṭuanhawi, kanmah aiawh in Khrih ca i rian a ṭuanmi, zumh awk tlak ngaimi a si. * 8Thlarau nih an pekmi hna dawtnak kong kha a kan chimh.

9Nan kong kan theih ri in nan caah thla kan cam lengmang. Pathian nih nannih cu amah hngalhnak le a Thlarau nih an pekmi hna fimnak le hngalhnak in in khahter hna seh tiah Pathian cu kan nawl. 10Cuticun Bawipa duhning in nan nung kho lai i amah duhnak kha nan tuah zungzal khawh lai. Thil ṭha tuahnak kip ah nan nunning cu zumh awk tlak a si lai i Pathian nan hngalhnak ah khan nan ṭhang lai. 11Zeizong vialte kha lungsau thinfual in nan in khawh nakhnga, amah thazang chungin a chuakmi thazang nih in ṭhawnter ko hna seh. 12Cun ceunak ram chungah Pathian nih a mi hna ca i a chiahmi thil i hrawm ve awkah aa tlak dingin an sertu hna kan Pa cu, lawmhnak he thangṭhat ko u. 13Zeicahtiah amah nih cun muihnak ṭhawnnak chung khan a kan chuah i a dawtmi a Fapa pennak chungah khan him tein a kan luhpi i 14a Fapa thawng cun luatnak kan hmu i kan sualnak cu ngaihthiam kan si. *

Khrih le A Rianṭuannak

15Khrih cu hmuh khawh lomi Pathian mui a si. Khrih cu Pathian fater, sermi thil vialte hna nakin a cungnung deuhmi a si. 16Pathian nih Khrih thawng cun van le vawlei i a ummi thil vialte kha a ser hna, hmuh khawhmi thil si hna seh, hmuh khawh lomi thil si hna seh, amah thawng cun a ser hna; cun nawlngeitu thlarau hna le uknak thlarau hna le ṭhawnnak thlarau hna zong kha amah thawng cun a ser hna. Pathian nih vanle vawlei hi a dihlak in Khrih thawng cun a ser hna i Khrih caah cun a ser hna. 17Zeizong vialte hlanah a rak um cang i amah nih cun zeizong vialte hi i ṭhenṭhek dih loin a funtom dih hna. 18Khrih cu a pum a simi Khrihfabu lu kha a si; Khrih cu fater, thihnak in thawhter hmasa bikmi kha a si, thihnak in thawhter a si cu zeizong vialte ah hin pakhatnak a si zungzal nakhnga caah a si. 19Fapa nih Pathian sinak tlamtling tein a chungah a ngeih cu Pathian biakhiahnak thawngin a si. 20Cucaah a Fapa thawng cun Pathian nih van le vawlei cu a dihlak in amah sin i kirter ṭhan kha a timh. Pathian nih a Fapa vailamtahnak cung i a thihnak thawng khan remnak a ser i cuticun van le vawlei i a ummi thil vialte kha amah sinah cun a kirpi ṭhan hna. *

21Hlan ah cun thil ṭhalo nan tuahmi le nan ruahmi ruangah khan Pathian he nan rak i hlat i a ral ah nan rak i ser. 22Sihmanhsehlaw atu cu a Fapa, a pum le a titsa in a thihnak thawng khan Pathian nih a hawi ah aan ser cang hna i cu ti a tuah cu a hmaika ah thiangte le dotla le sualnak ngei loin luhter aan duh hna caah a si. 23Cucaah nan zumhnak kha fek tein nan i tlaih zungzal lai i nan dirhmun ah khan fek tein nan dir zungzal lai; nan theihmi Thawngṭha nih an phorhmi hna ruahchannak kha thlau hrimhrim hlah u. Hi Thawngṭha hi vanrang tang khuazakip ah sermi thil vialte sinah chimmi Thawngṭha kha a si i keimah Paul hi cu Thawngṭha sal cu ka si.

Khrihfabu Chung Paul Rianṭuannak

24Nan ca i temhinnak ka huahmi ah hin kaa lawm ko. Zeicahtiah ka pum in ka inmi temhinnak ah hin, Khrih nih a pum a simi khrihfabu ca i a inmi temhinnak a baumi kha ka tlinter. 25Cun Khrihfabu sal ah cun Pathian nih khan a ka ser i Pathian nih hi rian cu nanmah ṭhatnak ding caah a ka pek. Cu rian cu Pathian bia tlamtling tein chim kha a si i 26cu a bia cu, kan hnulei chan chung vialte Pathian nih a thuh i atu i a mi hna sin i a phuanmi hi a si. 27Pathian nih aa tinhmi cu, mi vialte caah si seh tiah a rak ruahmi biathli, a sunglawi i a lianngan ngaingaimi biathli, a mi hna sin i a phuanmi cu a si. Cu biathli cu, Khrih cu nan chungah a um i cucaah nannih cu Pathian sunparnak kha nan i hrawm lai, timi hi a si. 28Cucaah Khrih kong cu mi vialte kha ka chimh hna. Cucaah a mi kip kha kan fimnak nih a phanh khawh chungin ralrinnak kha kan pek hna i kan cawnpiak hna, cucu zeicahdah kan tuah ti ahcun Khrih he i pehtlai in ahopaoh kha nutling patling in Pathian hmaika ah chuahpi hna u sih ti kan duh caah a si. 29Khrih ṭhawnnak le thazang ka chung i rian a ṭuanmi vialte kha hmang in, hi thil hi a can khawh nakhnga, heh tiah kaa zuam i ka ṭuan.

⇑

[Remove Footnotes]