EFESA

KHUAMI SIN PAUL CAKUAT

Ephesians

Biahmaiṭhi

Paul nih Efesa khuami hna ca a kuatmi hna chungah hin biapi bik in a ruahmi cu “Pathian tinhmi cu, sermi thil paohpaoh zeizong vialte, van i a ummi si hna seh, vawlei i a ummi si hna seh, hmunkhat ah pumh dih i Khrih kha an lu i ser” kha a si, (1.10). Cun cu bantukin Pathian nih aa tinhmi cu, Pathian mi hna nih hin kan zulh awk le kan nunnak ah hin kan langhter awk a si ti kha a forh duhmi hna a si. Efesa cakuat a hramthawknak leiah hin Bawi Jesuh chung i pum khat sinak kong cu a chim i cu kong langhternak ah cun Pathian nih a mi a thimning hna le a Fapa Jesuh Khrih thawngin an sualnak a ngaihthiam hnanak le a luatter hnanak kong kha a chim i cu Pathian biakamnak aamahkhan cu Thiang Thlarau hi a si tiah a langhter. Cun cu dih cun a ca a reltu pawl kha Bawi Khrih chung i pum khat an sinak kha pakhat le pakhat an khuasaknak cio ah an langhter awk a si kha a forh hna.

Pathian mi Bawi Khrih chung i a ummi pum khat an sinak langhternak caah hin hmanthlak bia a phunphun a hman hna: Khrihfabu cu pum a si i a lu cu Khrih a si, a ti. Khrihfabu cu inn a si i Khrih cu a innkil lung a si, a ti; Khrihfabu cu nupi a si i Khrih cu a va a si, a ti. Pathian vel Khrih chungin a langmi nih hin ruahnak sangpi a phakter i cu mit cun zeizong vialte hi a zoh i a cuanh.

Tlangpi Hna
Biahmaiṭhi 1.1-2
Khrih le Khrihfabu 1.33.21
Bawi Khrih ah nunnak thar 4.16.20
Tlangkawm 6.21-24

Efesa 1

1Pathian duhnak in Khrih Jesuh lamkaltu a simi keimah Paul nih,

Efesa khua i a ummi Pathian mi hna, Khrih Jesuh chung i nannunnak ah zumh awk tlak in khua a sami hna, ca kan kuat hna. *

2Pathian kan Pa le Bawipa Jesuh Khrih nih vel le daihnak in pe ko hna seh.

Khrih Chungin Hmuhmi Thlarau Lei Thluachuahnak

3Kan Bawipa Jesuh Khrih i a Pa le a Pathian cu lawm ko u sih. Zeicahtiah Khrih he kan i pehtlaihnak thawngin kannih cu vancung ram ah hin thlarau laksawng phun kip kha a kan pek. 4Vawlei a ser hlan in Pathian nih kannih cu Khrih chung i amah ta si dingin a kan thim cang, cucaah a hmaiah a thiangmi le soi awk um lomi kan si awk a si. 5Pathian nih cun kannih cu Jesuh Khrih thawngin a fa i cohlan awk kha a rak timh cangmi le a duhmi a si. 6Pathian cu a sunglawimi a laksawng ruangah hin thangṭhat ko u sih, a dawtmi a Fapa in a kan pekmi a laksawng caah hin thangṭhat ko u sih.

7Khrih thihnak nih kannih cu a kan luatter, cucu kan sualnak kha ngaihthiam kan si tinak a si. Pathian vel cu a va lianngan hringhran dah. * 8Cu tluk tam in a kan pekmi a vel cu a va lianngan hringhran dah! 9Pathian nih a fimnak le a thil hmuh khawhnak in a rak i timhmi cu a hun tuah i Khrih thawngin tlinter a timhmi a khuakhannak a rak i thupmi kha kannih cu a kan hngalhter cang. 10Caan a cut tikah Pathian nih tlinter a timhmi cu hihi a si: van i a ummi thil vialte le vawlei i a ummi thil vialte kha hmunkhat ah a pumh dih hna lai i Khrih cu an lu ah a ser lai.

11Zeizong vialte hi Pathian khuakhanning le tinhning in an kal ko; Khrih he kan i pehtlaihnak thawngin Pathian nih amah mi si ding i a kan thim cu amah nih a rak i tinhmi a si ko i a hramthawk tein tuah awkah a rak i khiah ciami a si. 12Cucaah Khrih chung i ruahchannak a bunh hmasa bik pawl kannih nih hin Pathian sunparnak cu thangṭhat ko u sih.

13Nannih zong cuticun nan si ve: khamhnak an phorhtu hna Thawngṭha biatak kha nan theih tikah Khrih kha nan zumh i Pathian nih a ta nan si hmelchunhnak cu nan cungah a khenh; cu hmelchunhnak cu bia an kamhmi hna Thlarau an pek hna hi a si. 14Pathian nih a mi hna bia a kan kamhmi kha kan hmuh hrimhrim lai tinak aamahkhan cu Thlarau hi a si i Pathian nih a ta a simi hna cu luatnak tling a pek hna lai ti a kan hngalhtertu zong a si. A sunparnak cu thangṭhat ko u sih!

Paul Thlacamnak

15Bawipa Jesuh nan zumhnak le Pathian mi hna nan dawtnak ka rak theih thawkte khan, 16nanmah ruang i Pathian lawmh cu a ngol in ka ngol lo. Ka thlacamnak ah kan philh hna lo. 17Kan Bawipa Jesuh Khrih i a Pathian, a liannganmi kan Pa cu, nanmah kha Thlarau pek awkah ka hal lengmang, thlarau nih cun an fimter hna lai i Pathian kha nan sinah a phuan lai i Pathian cu nan hngalh lai. 18Zei ruahchannak hmuh awkah dah an kawh hna ti le, a mi a kamhmi hna a thluachuahnak khuaruahhar cu zeitluk in dah a tam i 19a zummi hna chung i rian a ṭuantu a ṭhawnnak cu zeitluk in dah a ngan ti kha nan hngalh khawh nakhnga caah a ceunak cu nan hmuh khawhnak hnga, nan lung kha in hunpiak ko hna seh. Hi kan chung i a ummi ṭhawnnak hi, 20thihnak in Khrih a thawhtertu le vancung khua i Pathian orhlei kamah a ṭhuttertu Pathian ṭhawnnak he khan aa khatmi a si. * 21Khika ah khan vancung uktu vialte hna le nawlngeitu vialte hna le ṭhawnnak vialte hna le bawi vialte hna cungah Khrih cu uktu a si; hi vawlei le hmailei vawlei zongah khin Khrih cu ṭhawnnak a ngeimi bawi vialte cung bawi a si. 22Pathian nih zeizong vialte cu Khrih ke tangah khan a chiah dih hna i Khrih cu Khrihfabu lu ah a ser i zeizong vialte uktu Bawi ngan bik ah a chiah. * * 23Khrihfabu hi Khrih pum cu a si, Khrih nih zeizong vialte kha a tlinter i amah Khrih hrimhrim a tlinnak cu a pum ah cun a si.

⇑

[Remove Footnotes]