GALATI

PENG KHRIHFABU HNA SIN PAUL CAKUAT

Galatians

Biahmaiṭhi

Jesuh Khrih kong Thawngṭha kha Judah mi a si lomi hna sin a phak tikah, Khrihfa taktak si awkah hin Moses Nawlbia kha zulh a herh maw herh lo ti biahalnak kha a chuak. Paul nih cun a herh lo, zeicahtiah Pathian le minung kan i remnak cu zumhnak thawng lawnglawng in a si, a ti. Sihmanhsehlaw Galatia peng chung Khrihfabu lakah cun mi a cheukhat an ra i Pathian he i rem nan duh ahcun Moses Nawlbia kha nan zulh hna a herh, an hung ti hna. Galatia hi Asia Minor ramchung i Rom cozah ukmi peng pakhat a si.

Paul nih Galati cakuat a ṭial ah hin, lam ping i hruaimi hna kha zumhnak hmaan i kirpi ṭhan kha aa tinhmi a si. Paul nih, Jesuh Khrih lamkaltu a si taktaknak khan a bia cu a thawk i cu lamkaltu a sinak cu minung fialnak thawngin si loin Pathian auhnak thawngin a si kha a langhter. Cun a rianṭuannak zong hi Judah mi a si lomi hna caah a si khun a ti fawn. Cun minung le Pathian kan i remnak ah hin zumhnak thawng lawnglawng in a sinak kha a chim i a donghnak leiah Khrih kan zumhnak thawngin a chuakmi dawtnak chungin Khrihfa ziaza cu a chuakmi a si kha a langhter.

Tlangpi Hna
Biahmaiṭhi 1.1-10
Paul Lamkaltu a sinak 1.112.21
Pathian vel thawngṭha 3.14.31
Khrihfa luatnak le ṭuanvo 5.16.10
Tlangkawmnak 6.11-18

Galati 1

1Galati peng Khrihfabu hna, Paul nih ca kan kuat hna.

Keimah cu lamkaltu si dingah hin minung nih fialmi le minungnih thlahmi si loin, Jesuh Khrih le Jesuh Khrih thihnak in a thawhtertu Pathian kan Pa nih an ka kawhmi ka si. 2Hika i a ummi kan unau vialte hna le-tin nan kut kan tlaih hna.

3Pathian kan Pa le Bawipa Jesuh Khrih nih vel le daihnak in pe ko hna seh.

4Atu chan, chan ṭhalo chung hin kannih cu luatter awkah, Pathian kan Pa duhnak zulh in, Khrih cu kan sualnak caah aa pe. 5Pathian cu zungzal donglo in sunparnak pek si ko seh! Amen.

Kan In Chimhmi Hna Lawng Kha Thawngṭha A Si

6Ka khuaruah nan har ko. Luklak ah Khrih velngeihnak in an autu hna kha nan hlawt i thawngṭha dang kha nan zuan. 7A ngaingai ti ahcun, “thawngṭha dang,” timi hi a um lo, asinain hitin ka chimnak cu, nan lung an tuaitamtu hna le Khrih thawngṭha kha thlen aa zuammi an um caah a si. 8Kanmah kan si zongah, vancungmi a si zongah, kan in chimhmi hna thawngṭha he aa dangmi thawngṭha an chimtu hna cu, hell ah tla ko seh. 9Hmasa zongah kan rak chim cang i atu zongah kan chim ṭhan: nan rak cohlan cangmi thawngṭha he aa dangmi thawngṭha an chimtu hna paoh cu hell ah tla ko seh!

10Hiti ka chim tikah hin minung lungtlinnak kawl ning law cu ko cu ka lo maw? Cucu ka kawlmi a si lo. Pathian lungtlinnak tu kha ka duhmi cu a si. Zapi sinin thangṭhatnak kha hmuh kaa zuammi cu a si maw? Cucu a si ahcun, Khrih sal cu ka si hnga lo.

Paul, Lamkaltu Ah A Canning

11Ka u le ka nau hna, nan sin i ka chimmi thawngṭha kha minung serchommi a si lo ti kha chimh kan duh hna. 12Cu thawngṭha cu minung sinin ka hmuhmi a si lo i minung nih an ka cawnpiakmi zong a si lo. Ka sinah a phuangtu cu Jesuh Khrih hrimhrim kha a si.

13Judah biaknak ka rak ṭanh lioah khan, zeitindah ka umtuning a rak si kha nan theih cangmi a si ko, Pathian Khrihfabu kha ka rak hrem hna i hrawh awkah fak piin ka rak i zuam. * 14Judah phung ka zulhnak ah khan ka ṭhirual Judah mi kha tampi ka lonh hna. Anmah nakin kan pupa phung kha fak piin ka ṭanh deuh. *

15Sihmanhsehlaw Pathian nih a ka zaangfah caah, ka chuah hlan khan a ka thim i amah rian ṭuantu dingah khan a ka auh. Cun Jentail mi hna sinah Thawngṭha cu ka chim nakhnga, * 16a Fapa cu ka sin i a phuan tikah, ahohmanh ruahnak hal awkah ka fuh hna lo, 17keimah hlan i lamkaltu a rak simi hna ton awk zongah khan Jerusalem ah ka va kal lo. Arabia ram tu ah khan ka kal zau i cuka cun Damaskas khua ah ka ra kir. 18Kum thum hnuah Peter sinin thawngpang theih duh ah Jerusalem ah ka hung kal i amah sinah cun zarh hnih ka cam. * 19Kan Bawipa nau Jeim dah ti lo cu, lamkaltu dang ahohmanh kha ka chawn hna lo.

20Ka ṭialmi hi biatak a si. Ka lih ka chim lo kha Pathian nih a hngalh.

21Cu hnuah cun Siria ram le Silisia ram ah khan ka kal. 22Cucaah cun Judea ram i a ummi Khrihfabu chungmi hna nih khan pumpak in an ka hngal lo. 23Midang nih, “A rak kan hremtu nih khan atu cu hrawh a rak i zuammi phung kha a ṭanh i a chim lengmang,” an ti lawng kha an theih i 24keimah ruangah cun Pathian kha an thangṭhat.

⇑

[Remove Footnotes]