MARKA

SININ THAWNGṬHA

Mark

Biahmaiṭhi

Marka Thawngṭha nih hin, “Pathian Fapa Jesuh Khrih kong Thawng ṭha,” tiin hram aa thawk. Jesuh cu rianṭuanmi le nawl ngei kho ngaimi a si ti kha a langhter. Nawl a ngeihnak cu a cawnpiaknak ah le khuachia a ṭhawl hna le misual a ngaihthiam khawh hnanak ah khan a lang. Jesuh nih amah kong aa chim tikah, Mi Fapa, tiah aa ti i misual ngaihthiam awk i a rat kha amah hrimhrim nih cun a chim.

Marka nih Jesuh kong a ṭial tikah hin Jesuh nih a chimmi le a cawnpiaknak kong nakin a tuahmi kha a biapi deuh ah a chiah. Tipil petu Johan kong le Jesuh tipil innak le tukforhnak innak kha tlawmte a chim dih in Jesuh nih mi a damter hnanak kong le a cawnpiaknak kong kha a chim colh ko. Cun caan a hung sau deuh tikah Jesuh cu a zultu hna nih khan an hun hngalhthiam deuh i asinain a huatu hna nih an huat chin venak zong kha a langhter.

Marka cauk a donghnak nih hin Jesuh vawlei cung i a nun chung i a hmanung bik zarh le vailam tahnak a innak le thihnak in a thawh ṭhannak kong kha a chim.

Marka Thawngṭha nih hin donghnak pahnih a ngei i hi hna hi bereket chungah chiah an si, zeicahtiah hi donghnak hna hi Marka nih si loin midang nih an ṭialmi an si ti kha zapi nih hngalh a si ko cang. Marka Thawngṭha taktak hi cu dal 16 cang 8 ah hin a dong cang.

Tlangpi Hna
Thawngṭha hramthawk 1.1-13
Galilee ram ah Jesuh zapi sin rianṭuannak 1.149.50
Galilee in Jerusalem tiang 10.1-52
Jerusalem le a pawngkam i donghnak zarh chung i a tuahmi 11.115.47
Jesuh thawhṭhannak 16.1-8
A tho ṭhanmi ‘Bawipa’ a langhnak 16.9-20

Marka 1

Tipil Petu Johan Phungchimnak

(Mat 3.1-12; Luk 3.1-18; Jhn 1.19-28)

1Pathian Fapa Jesuh Khrih kong Thawngṭha cu hitihin aa thawkning a si. 2Profet Isaiah nih,

3Cun mi pakhat kha ramlak ah a au i,

4Cucaah Johan cu ramlak ah khan a hung chuak i mi kha tipilnak a pek hna i phung kha a chimh hna. “Nan lung i thleng u law tipilnak kha ing tuah u; cun Pathian nih nan sualnak kha an ngaihthiam hna lai,” tiah a ti hna. 5Judea ram le Jerusalem khua i a ummi hna nih khan amah cu an fuh luaimai i an sualnak kha an i phuang i Jordan tiva ah khan tipilnak kha a pek hna.

6Johan cu kalauk hmul in tahmi hnipuan kha aa hruk i a tai ah saphaw taisawm aa sawmh, khaubawk le khuaihliti in aa cawm. * 7Mizapi cu a thawh hna i, “Ka hnu in a ra lai ding pa hi keimah nakin tampi in a ngan deuhmi a si; a kedan hri a phoihtu ding hmanh ah kei cu kaa tlak lo. 8Kei nih cun tiin tipilnak kha kan pek hna, sihmanhsehlaw anih nih cun Thiang Thlarau in tipilnak cu an pek hna lai,” tiah a ti.

Jesuh Tipil Innak le Tukforh Innak

(Mat 3.13—4.11; Luk 3.21-22; 4.1-13)

9Cu hnu tlawmpal ah cun Jesuh cu Galilee ram Nazareth khua khan a ra i Johan nih khan Jordan tiva ah cun tipilnak kha a pek. 10Ti chungin a hung thawh dih kate ah khan, van kha aa cheu i Thlarau cu ṭhuro bantukin a cung i a run i fut kha Jesuh nih cun a hmuh. 11Cun van in aw pakhat kha a theih i, “Nangmah hi ka Fapa dawt cu na si. Na cungah ka lung a tling ngaingai,” tiah aw nih cun a ti. *

12Hmakhatte ah Thlarau nih cun ramlak ah a kalter i 13khika ah ni sawm li a va um i Satan nih khan a rak tukforh. Cuka ah cun saram zong kha an rak um ve, sihmanhsehlaw vancungmi kha an ra i an rung hramh.

Jesuh Nih Ngatlaitu Pali A Kawh Hna

(Mat 4.12-22; Luk 4.14-15; 5.1-11)

14Johan kha thong i thlak a si hnuah Jesuh cu Galilee ram ah khan khual a tlawng i Pathian sinin a rami Thawngṭha kha a chimh hna. 15“A caan kha a phan cang. Pathian Pennak cu a phan dengmang cang. Nan sualnak kha kaltak hna u law Thawngṭha kha zum tuah u,” tiah a ti hna. *

16Galilee Rili kam i aa chawh lengmang lioah khan Jesuh nih cun ngatlai pahnih, Simon le a nau Andru kha a hmuh hna i annih cu sur in nga kha an rak tlai len ko. 17Jesuh nih cun a thawh hna i, “Ka zul tuah u, mi tlaitu ah kan ser hna lai,” tiah a ti hna. 18Chikkhatte ah an sur kha an kaltak i amah kha an zulh colh.

19A va kal deuh i a dang unau pahnih zong kha a hmuh hna, annih cu Zebedi fapa Jeim le Johan kha an si. Annih cu an sur kha an rak tholh len ko. 20A hei hmuh cangka hna khan Jesuh nih cun a auh hna i an pa Zebedi cu nihlawh phalhmi ngatlaitu hna he khan lawngah khan an kaltak i Jesuh cu an zulh.

Khuavang A Ngeimi Mipa

(Luk 4.31-37)

21Kapernaum khua kha a va phan i Sabbath ni ah cun Jesuh cu pumhnak inn ah khan a kal i a cawnpiak hna. 22Phungbia cawnpiaktu saya pawl nih an cawnpiak hna bantuk khan si loin hmual ngei ngaiin a cawnpiak hna caah an khuaruah a har. *

23Cu liote ah cun khuavang nih a tuahmi mipa pakhat kha pumhnak inn chungah cun a rung lut i 24“Nazareth khuami Jesuh, zeidah na kan duhnak a um? Kanmah hrawh duh ah maw na rat? Nangmah cu Pathian lamkaltu a thiangmi na si kha kan hngalh ko ṭung!” tiah a ti. 25Jesuh nih khuavang cu, “Dai tein um, mipa chung khan chuak,” tiah a ti. 26Khuavang nih cun mipa cu fak piin a thin a thin tak i fak piin a au i mipa chung cun a chuak. 27Mizapi cu an khuaruah a har tuk hringhran i, “Mah hihi zeidah a si ee? Cawnpiaknak thar phun khatkhat maw a si? Hi pa nih hin khuavang kha chuak u, a ti hna i an ngaih ko dah ngai” tiah an ti lengmang. 28Cucaah Jesuh thawngpang cu Galilee ram hmun kip ah khan a thang.

Jesuh Nih Mi A Damter Hna

(Mat 8.14-17; Luk 4.38-41)

29Pumhnak inn khan khuazei hmanh ah pialpah loin Simon le Andru inn ah khan an kal i Jeim le Johan zong kha an sinah cun an kal ve. 30Simon nupi nu kha a rak zaw i ihkhun ah a rak ril ko. Jesuh cu a phak cangka in an chimh. 31Amah sinah cun a va kal i a kut in a va thawh. A tak linh cu a dai i annih kha a bultawl hna.

32Zanlei, ni a tlak hnuah khan Jesuh sinah cun a zawmi vialte le khuavang nih a tuahmi vialte hna kha an ratpi hna i 33inn hmaiah cun cu khua mi vialte cu an i pum. 34Jesuh nih cun zawtnak a phunphun in a zawmi mi tampi kha a damter hna i khuavang tampi kha a ṭhawl hna. Khuavang nih khan Jesuh cu ahodah a si kha an hngalh caah Jesuh nih cun a holh in a holhter hna lo.

Galilee Ram Ah Phung A Chim

(Luk 4.42-44)

35A thaizing cu zingkate in, ni a chuah hlanpi ah, Jesuh cu a tho i khua leng hmun king ah thlacam awkah a kal. 36Sihmanhsehlaw Simon le a hawile hna nih cun amah kha an va kawl. 37An va hmuh tikah, “Mi kip nih an in kawl lengmang dahkaw,” tiah an ti. 38Sihmanhsehlaw Jesuh nih cun a leh hna i, “Hika hrawng i a ummi khua dang hna zong hi ka tlawn awk an si. Annih zong kha phung ka chimh ve hna awk a si, zeicahtiah anmah phung chimh awkah cun pei ka rat cu,” tiah a ti. 39Cucaah Galilee peng kha a tlawn dih i pumhnak inn ah khan phung a chimh hna i khuavang kha a ṭhawl hna. *

Mithinghmui A Thianter

(Mat 8.1-4; Luk 5.12-16)

40Jesuh sinah cun thinghmuimi pakhat kha a ra i a khuk aa bil i, “Na duh ahcun na ka thianter khawh,” tiah bawmhnak kha a hal. 41Jesuh nih cun a zaang a fak ngaingai i a hei banh i a hei tongh. “Nangmah thianter kha ka duh, va thiang cang,” tiah a ti. 42Chikkhatte ah thinghmui zawtnak nih khan cu pa cu a kaltak i a thiang. 43Khi tikah Jesuh nih cun aw hrang ngaiin a thawh i, 44“Ngai hmanh, hi kong hi ahohmanh va chim hna hlah. Tlangbawi sin tu ah khan ding teomao in va kal law rak in zoh seh. Cun mi nih a thiang cang ti kha an in hngalh nakhnga, Moses nih tuah awk a timi raithawinak kha va tuah,” tiah a ti i a kalter. * 45Sihmanhsehlaw mipa nih cun a kalnak paoh ah khan cu kong cu a chimh hna i tam tuk in a chim caah Jesuh cu khua chungah khan langhngan in a lut kho ti lo. Hmunking tu ah khan a um i cuka ah cun a kenkip khan mi nih an rak fuh.

⇑

[Remove Footnotes]