FILEMON

SIN PAUL CAKUAT

Philemon

Biahmaiṭhi

Filemon hi Khrihfabu chungah bochan awk tlakmi a rak si i Kolose khua Khrihfabu chung i a ummi sal pakhat a min Onesimas a simi i a bawipa si dawh a si. Onesimas hi a bawipa sin cun a zaam i zeimaw tiin Paul sinah khan a thongtlaknak ah khan a va chuak. Paul nih a rak chimh i Onesimas cu Khrihfa ah a cang. Paul nih cun Filemon sinah khan ca a kuat i a salpa he an i rem ṭhannak ding le hi a salpa cu ngaihthiammi sal si loin Khrihfa unau a si cang i cu bantukin a rak cohlan khawh nakhnga a nawlnak a si.

Tlangpi Hna
Biahmaiṭhi 1-3
Filemon a thangṭhatnak 4-7
Onesimas ca nawlnak 8-22
Biatlangkawm 23-25

Filemon 1

1Khrih Jesuh ruangah thong i a tlami keimah Paul le kan nau Timote nih, kan hawikom le kan rianṭuan hawi a simi Filemon le 2na inn ah aa pum tawnmi Khrihfabu le kan far le kan ralkap hawi Arkhipas kha ca kan in kuat hna. *

3Pathian kan Pa le Bawipa Jesuh Khrih nih vel le daihnak in pe ko hna seh.

Filemon Zumhnak le Dawtnak

4Ka nau Filemon, thla ka cam fate nangmah kong kha ka chim i ka Pathian kha ka lawmh. 5Hi kaa lawmhnak cu Pathian mi vialte na dawtnak hna le Bawipa Jesuh na zumhnak kong ka rak theih caah khan a si. 6Khrih chung i kan nunnak ah thluachuahnak kan hmuhmi vialte hna hi, a zummi kan si ca i kan i hawikomhnak nih hin thuk deuh in a sullam kan hngalhter seh, ti hi ka thlacamnak a si tawn. 7Ka dawtmi ka nau, dawtnak na ngeihmi nih ka lung a ka lawmhter ngaingai i lungṭhawnnak tampi a ka pek. Pathian mi vialte cu an lung na lawmhter dih ko hna.

Onesimas Caah Kan Nawl

8Hi bantuk mi na si ti kha ka hngalh caah na tuah awk rian a si ti i ka ruahmi ah cun, ralṭha ngaiin kan fial ngam ko hnga i Khrih chung i na unau pakhat bantukin nawl zong kan pek ngam ko hnga, 9asinain dawtnak lei in ka ruah tikah a nawl tu in kan nawl ahcun a ṭha deuh, ka ti. Atu ah keimah tarpa, Khrih Jesuh ruang i thong i a tlami nih nawl kan duhmi cu, 10thonginn chungah ka fa i a cangmi Onesimas * kong hi a si. * 11Hlanah cun na caah santlaihnak zeihmanh a rak ngei taktak lo, sihmanhsehlaw atu cu nangmah ca he keimah ca he santlaimi a si cang.

12Amah cu na sinah ka rak in kuat ṭhan i hi kan kuat ah hin ka lung kha kan kuat chih. 13Thawngṭha ruang i thong chung i ka um lioah hin, nangmah can i a ka bawmtu dingah amah hi ka sinah um seh ti cu ka duh ko. 14Sihmanhsehlaw hnekchom in i bawmhter cu kan duh lo, nangmah nih nangmah lungtho tein na ka bawmh kha ka duh deuh. Cucaah cun nangmah hnatlak lomi cu zeihmanh ka tuah lai lo.

15Onesimas he caan tlawmpal nan i ṭhen hi zungzal in hmunkhat i nan um ṭi nakhnga ding ca tu ah a rak si deuh ko lai. 16Atu cu sal menmen a si ti lo, sal nak let tampi ṭha, Khrihfa chung i dawtmi unau a si cang. Kei nih cun ka dawt hringhran, nang nih zeitluk in dik na dawt chinchin lai — na caah sal lawng si ti loin Bawipa chung i unau a si cang.

17Cucaah kei cu na hawi i na ka ruah a si ahcun, keimah na ka lawmh lai bantuk tein amah hi rak lawm law ka duh. 18Na cungah ṭhat lonak a tuahmi a um le lei an bat a si ahcun, keimah cham awkah rak chia. 19Ka kut hrimhrim in Keimah Paul nih kan cham lai, tiin ka ṭial hih. (Na nunnak hrimhrim na ka bat kha cu, kan chimh ṭhan awk a herh lem lo.) 20Cucaah ka nau, Bawipa ruangah, hi thilte hi cu rak ka tuahpiak ko; Khrih chung i unau pakhat bantukin ka lung ka lawmhter ko.

21Hi ca ka ṭial pah ah hin, kan fialmi cu na tuah lai, ti cu ka hngalh ko, kan fialmi nak tam deuh hmanh na tuah lai ti kha ka hngalh ko. 22Cun inn zong rak ka damhpiak law ka duh hnga. Pathian nih nan thlacamnak kha an leh ṭheo hna lai i nanmah sinah a ka ratter ṭhan lai ti kha ka zumh.

Donghnak Bia

23Khrih Jesuh ruangah keimah sin i thong a tla vemi Epafras nih nan kut an tlaih hna. * 24Cun ka rianṭuan hawi Marka le Aristarkas le Demas le Luka nih nan kut an in tlaih ve hna. *

25Bawipa Jesuh Khrih vel cu nan dihlak sinah um ko seh.

⇑

[Remove Footnotes]