FILIPI

KHUAMI SIN PAUL CAKUAT

Philippians

Biahmaiṭhi

Filipi khua Khrihfabu hi Paul nih Zurup (Europe) ram chungah cun a ser hmasa bikmi Khrihfabu a si. Filipi khua cu Masidonia peng i a ummi a si. Paul nih Filipi khua Khrihfabu ca a kuat hna ah hin thong chung i a um i Khrihfa rianṭuantu a dang nih an doh i Filipi khua ah cawnpiaktu ding lomi nih Khrihfami an hlen hnanak a theih tik i a lungre a theih ngaingai lio caan a si. Asinain a cakuat hi lawmhnak le hnangamnak in a khat i hi lawmhnak le hnangamnak hna cu Jesuh Khrih a zumhnak thawng lawngin a hmuhmi an si kha a langhter.

Cun Paul nih Filipi khua Khrihfabu sin i ca a kuatnak chan cem cu, a herh lio caan i an bawmhnak a lung aa lawmhnak langhternak caah khan a si. Amah cu harnak ing hmanh seh law annih cu lungṭhawnnak le lungfehnak an ngeih awk a si tiin hi caan rem a hmuhmi kha annih forhnak caah a hman. Bawi Jesuh bantukin toidornak lungthin ngeih kha a forh hna i porhlawtnak le mah zawn lawng ruahnak nih minung a pingah a kan kalpi tawnnak kha ralrinnak a pek hna. Khrih he aa pehmi nunnak an ngeihmi cu Pathian vel thawngin an hmuhmi laksawng, zumhnak thawngin an comi a si kha a chimh ṭhan hna i cucu Judah phung le lam zulhnak thawngin a si lo kha a hngalhter ṭhan hna. Cun Khrih he aa pehtlai in a nungmi nih lawmhnak le daihnak an hmuhnak kha a chimh fawn hna.

Hi cakuat ah hin lawmhnak, hnangamnak, lungkhahnak le Khrihfa zumhnak le ziaza ah i biatak a herhnak kha kan hmuh. Cu pinah Paul nih Filipi khua Khrihfabu kha a dawt ngaingai hna ti zong kha kan hmuh fawn.

Tlangpi Hna
Biahmaiṭhi 1.1-11
Paul tonmi thil hna 1.12-26
Khrih chung nun 1.272.18
Timote le Epafroditas 2.19-30
Ralrin peknak 3.1-49
Filipi khua hawikom hna 4.10-20
Tlangkawmnak 4.21-23

Filipi 1

1Khrih Jesuh sal Paul le Timote nih, Filipi khua i a ummi Pathian mi nan dihlak, Khrih Jesuh a zummi hna cu, nan pastor hna le Khrihfa upa hna he, ca kan in kuat hna. *

2Pathian kan Pa le Bawipa Jesuh Khrih nih vel le daihnak in pe ko hna seh.

Paul Nih Thla A Campiak Hna

3Nan kong ka ruah fate, nan dihlak ruangah ka Pathian cu ka lawmh zungzal; 4cun nan ca i thla ka cam fate lunglawmhnak in ka cam, 5zeicahtiah a hramthawk tein nihin ni tiang, hi Thawngṭha rian ka ṭuannak ah hin nan ka bawmh zungzal. 6Cucaah cun, nan chungah hi rian ṭha a thawktu Pathian nih, Khrih Jesuh Ni ah hi rian cu a lim tiangin, a ṭuan zungzal lai. 7Ka hnakkar ah nan i tenh zungzal ko. Hi bantukin nan cungah lungthin ka ngeih hi ka ngeih hrim awk a si ko, zeicahtiah nan ka dawt tuk hringhran i thong i ka tlak ah siseh, leng i ka luat ah siseh, Thawngṭha kha ahmaan i biatak a si tiin ka chimnak rian ah khan nan ka bawmh zungzal. 8Khrih Jesuh lungthin chungin a chuakmi ngaihnak in kan ngai hna, hi ti ka ti tikah hin ka lih a si lo ti cu Pathian nih a hngalh.

9Nan ca i thla ka cam tawnmi cu, nan dawtnak ngeihmi cu hngalhnak ahmaanmi le a chia a ṭha thleidan khawhnak fimnak he ṭhang seh law, 10cuticun a ṭha bik i thim awk kha nan hngalh lai, ti hi a si. Cun thurhhnawmhnak vialte le mawhchiatnak in Khrih Ni ah cun nan luat lai. 11Jesuh Khrih lawng nih a kan pek khawhmi ziaza ṭha taktak in nan nunnak cu a khat lai i cucu Pathian sunparnak le thangṭhatnak caah a si lai.

Nun Hi Khrih A Si

12Ka u le ka nau hna, ka cung i thil a tlungmi kha Thawngṭha karhtertu a si lehlam ti kha hngalhter kan duh hna. 13Kha ti ka cung i thil a tlungmi ruangah khan siangpahrang inn a cawngtu vialte hna le a dang vialte hna zong nih Khrih sal ka si ruang i thong tlaknak ka in hi an hngalh. * 14Cun thong ka tlaknak nih hin kan unau pawl a tam deuh kha Bawipa an zumhnak ah lungfehnak a pek hna i cucaah an ral a ṭha chinchin i ṭih lo tein Thawngṭha bia kha an chim.

15A cheu cu nahchuahnak an ngeih ca le mi he i al duhnak lungthin an ngeih ruangah Thawngṭha bia a chimmi an si taktak, sihmanhsehlaw a cheu cu lungthin ṭha te he a chimmi an si. 16Pathian nih Thawngṭha ṭanh awk rian cu a ka thiah kha an hngalh caah, cu bantuk lungthin thiangte he a chimmi hna nih cun, keimah an ka dawtnak lungthin chung khan an chimmi bia cu an chim. 17Sihmanhsehlaw a dang hna nih khan cun, keimah entai ruangah lungthin thianglo in Khrih kong kha an chim i thong i a um chungah hin harnak nih chuahhnawh chin lengmang seh ti duhnak in an chim.

18Zeihmanh a poi lo! Khrih kong chim a si paoh ahcun kaa lawm ko — tinhmi ṭha in a si zongah, tinhmi chia in a si zongah — kaa lawm lengmang ko lai. 19Zeicah ti ahcun, nan thlacamnak thawng le Jesuh Khrih sinin a rami thlarau bawmhnak thawngin luatter ka si lai, ti kha ka hngalh. 20Ka duhnak ngan bik le si kho seh ti ka duh bikmi cu, ka rian hi a tlam tlinh kho ning ti hi a si i a zungzal in, cun atu thengte chinchin ah hin, ka nun zongah ka thih zongah, ralṭhatnak in khah i ka pum hrimhrim in Khrih cu upatnak pek kha a si. 21Nunnak hi ka caah zeidah a si? Kei ka caah cun nunnak cu Khrih a si ko. Cucaah thihnak nih hin a ṭha deuh chinchinmi thil hmanh a chuahpi lai. 22Asinain ka nun ko rih i cu ka nun ruang i thil ṭha tam deuh ka tuah khawh ding a si ahcun, a zei cu dik kaa thim deuh hnga, ka hngal lo. 23Thil pahnih karlak ah kaa tenh: hi nunnak hi kaltak i Khrih he um cu ka duh hringhran, cucu a ṭha deuh suaumaumi a si; 24asinain ka nun rih cu nanmah ruangah a herh deuh rih fawn. 25Cucu nan caah a ṭha deuh ti kha fiang tein ka hngalh caah nung ko rih ning. Zumhnak i nan ṭhannak le nan i lawmhnak kha chap awkah nan sinah ka nung ko rih lai. 26Cucaah nan sin i ka um ṭhan tikah, keimah ruang i Khrih Jesuh chung i nan i lawmhnak kha a karh chinchin lai.

27A biapimi cu hi tu hi a si: Khrih Thawngṭha nih si hna seh ti an duhmi hna kha nan nuncan a si awk a si. Cucaah kan hmuh khawh hna ah siseh, kan hmuh khawh hna lo ah siseh, tinhmi pakhat he fek tein nan dir i Thawngṭha zumhnak ah hmunkhat i ral a do ṭimi nan si kha theih ka duhmi cu a si. 28Nan ral kha ṭih hna hlah u; ralṭha ngaiin um zungzal u law cu nih cun annih an sungh i nannih teitu nan si lai kha a langhter lai — teinak petu cu Pathian a si. 29Khrih ca rianṭuan thiah nan si tikah, a zumh lei lawng hi si loin a ca i temhinnak hmuh ding zong hi a si chih. 30Cucaah i dohnak chungah hin ka sinah nan i tel ve kho lai; hi i dohnak cu, hlan i ka rak dohmi nan rak hmuh cangmi le atu zong i ka doh lengmangmi nan rak theihmi ṭhiamṭhiam hi a si ko. *

⇑

[Remove Footnotes]