JOHAN HMUHMI BIATHLAM

Revelation

Biahmaiṭhi

Biathlam hi Khrihfa mi nih Jesuh Khrih cu kan Bawipa a si tiah an zumh ruang i hremnak an in lio caan i ṭialmi a si. A ṭialtu nih aa tinh bikmi cu ca a kuatmi hna kha lungṭhawnnak le ruahchannak ngei hna seh law harnak le hremnak an inmi chungah hin lungdong loin fek tein an zumhnak kha i tlaih hna seh ti hi a si.

Hi cauk chung biachimning hi phun dangte a si i langhnak le hmanthlak bia kha a hman hna. Hi bantukin chimmi hi midang le chandang i a ummi Khrihfa hna caah cun hngalh awkah a har ngaingai, asinain anmah nih cun fiang tein an hngalh ko. Hi bantukin ṭialmi a si caah hi cauk hi a bia tenek kongah cun ruahnak a phunphun in a chuak i atu tiang zong hin i alnak tampi a um. Asinain a chim duh bikmi a tlangpi cu a fiang ko: cucu zeidah a si ti ahcun, Pathian nih Khrih thawngin a ral vialte le Satan kha a tei dih cikcek hna lai i amah a zummi a mi hna cu van thar le vawlei thar thluachuahnak cu a pek hna lai, ti hi a si ko.

Tlangpi Hna
Biahmaiṭhi 1.1-8
Langhnak le khrihfabu pasarih sin cakuat hna 1.93.22
Cazual cakhenh pasarih ngei 4.18.1
Muko pasarih 8.211.9
Limkeng le sahrang pahnih 12.113.8
Langhnak dangdang 14.115.8
Pathian thinhunnak kheng pasarih 16.1-21
Babilon rawhnak, sahrang thahnak,
     nal profet le khuachia 17.120.10
Donghnak biaceihnak 20.11-15
Van thar, vawlei thar, Jerusalem thar 21.122.5
Biatlangkawm 22.6-21

Biathlam 1

1Hi cauk hi Jesuh Khrih nih a phuanmi thil kong a si. Cu a phuanmi cu a um zau dingmi thil, Pathian nih a sal hna hmuhsak awkah a pekmi kha a si. Cu thil hna cu Khrih nih a sal Johan kha a hngalhter i cu hngalhtertu ah cun a vancungmi kha a thlah i 2Johan nih cun a hmuhmi thil vialte cu a chim dih. Pathian sinin hmuhmi bia le Jesuh Khrih nih a phuanmi biatak Johan nih a chim chinmi cu hihi a si. 3Hi cauk a relmi le hi profet bia a ngai i hi cauk chung i aa ṭialmi a zulmi cu lunglawmmi an si. Zeicahtiah hi thil vialte a tlin lai caan cu a naite cang.

Khrihfabu Pasarih Biakchawnhnak

4Asia peng chung i a ummi Khrihfabu pasarih kha Johan nih bia kan cah hna:

Atu i a um liomi le a rak um cangmi le a um lai ding a simiPathian le a bawiṭhutdan hmai i a ummi thlarau pasarih le Jesuh Khrih nih vel le daihnak in pe ko hna seh. * 5Jesuh Khrih cu zumh awk a tlakmi tehte, hrin hmasa bikmi Fapa, thihnak in thawhter a simi a si i vawlei cung siangpahrang hna a uktu zong a si fawn.

Kannih cu a kan dawt i a thihnak thawngin kan sualnak chungkhan a kan chuah i * 6a Pathian le a Pa rian kha tlangbawi bantukin a ṭuantu dingah siangpahrang phun ah a kan ser. Cu Jesuh cungah cun sunparnak le ṭhawnnak kha zungzal in zungzal tiang um camcin ko seh! Amen. *

7Zohhmanh u, khuadawm sin khin a ra lio! Mi kip nih an hmuh lai, a rak chuntu hna zong nih khan an hmuh lai. Cun vawlei cung mi vialte cu a cung i an rak tuahmi kha i ngaichih in an ṭap lai. Cu ti hrimhrim cun a si lai! Amen. *

8Lianngan Bik Bawipa Pathian nih cun, “Kei cu Alfa le Omega ka si,” a ti, cu Pathian a um liomi le a um cangmi le a um laimi cu, zeizong vialte siangpahrang Bawipa a si. *

Khrih Kha A Hmuh

9Kei cu nan unau Johan kha ka si. Jesuh ah kan i pehtlaihnak thawngin hremnak nan innak ah ka ing ve, nan umnak a Pennak chungah khan ka um ve i temhinnak nan inmi kha ka ing ve. Pathian bia ka chim ca le Jesuh nih a phuanmi biatak ka phuan ruangah, Patmos tikulh ah khan an ka chiah. 10Bawipa Ni ah Thlarau nih a ka tlak i ka hnulei in aw thangpi pakhat kha ka theih, cu aw cu muko aw thawng bantuk a si. 11A ka thawh i, “Na hmuhmi kha ṭial law na ṭialnak cauk cu Khrihfabu pasarih kha kua hna: cu Khrihfabu hna cu Efesa khua le Smyrna khua le Pergamum khua le Thiatira khua le Sardis khua le Filadelfia khua le Laodisia khua i a ummi kha an si,” tiah a ti.

12A ka chawntu cu ahodah a si hnga tiah ka hun i mer i cuka ah cun sui mei vannak pasarih ka hmuh hna. 13Cu mei vannak hna lakah cun minung a lomi pakhat a dir i a kemit phiak in angki fual aa hruk i a ṭang ah sui taisawm pakhat aa sawmh. * 14A sam cu tuuhmul bantuk a si i hawhra bantukin a rang i a mit cu mei bantukin a alh; * 15a ke cu somei chungah an tit i tleu tein an hnormi dar bantukin a tleu i a aw cu tisor nganpi thawng bantuk a si. * 16A orhlei kut in arfi pasarih aa put hna i a ka chungin kap hnih in a harmi nam a chuak. A hmai cu chunlai ni ceu bantukin a ceu. 17Amah cu ka hmuh tikah mithi bantukin a ke hramah ka tlu. A orhlei kut in a vun ka tawngh i, “Na thinphang hlah! Kei cu hmasa bik le hmanung bik kha ka si. * 18Kei cu a nungmi kha ka si. Ka rak thi, sihmanhsehlaw zohhmanh, zungzal in zungzal tiang ka nung cang. Thihnak cung le mithikhua cungah nawl ka ngei. 19Cucaah cun na hmuhmi thil, atu i a um liomi thil hna le hmailei ah a um lai dingmi thil hna kha ṭial hna. 20Ka orhlei kut i na hmuhmi arfi pasarih hna le sui mei vannak pasarih hna an sullam biathli cu hihi a si: arfi pasarih hi Khrihfabu hna i an vancungmi kha an si i mei vannak pasarih hna hi Khrihfabu pasarih hna kha an si,” tiah a ti.

⇑

[Remove Footnotes]