ROM

KHUAMI SIN I PAUL CAKUAT

Romans

Biahmaiṭhi

Paul nih Rom khua Khrihfabu kha tlawn a duh hna i asinain a hngalhmi Khrihfabu an si lo ca le annih zong nih amah kha an hngalh ve lo caah ca hi a kuat hmasa hna. Aa tinhning ah cun an sinah rianṭuan i cu hnuah cun anmah bawmhnak in Spain ram tiangin lanh kha a si. Khrihfa phung a hngalhning le nifate kan nunning le kan ziaza ah cu phung cu zeitindah kan i lak awk a si ti fianter kha hi cakuat ah hin aa tinh bikmi a si. Paul nih a cakuat dang vialte hna nakin hi cakuat chungah hin cu kong cu tlamtling bik in a chim.

Rom khua Khrihfabu cu a biakchawnh hna dih in an ca i thla a cam lengmangnak kong kha a chimh hna i cu hnuah a cakuat chung i biapi bik chim a duhmi cu a chim colh: “Thawngṭha nih hin, zeitindah Pathian nih mi cu amah he a remter hna, ti kha a chim i cucu zumhnak thawngin a hramthawk in a donghnak tiang a si,” a ti (1.17).

Cu kong cu Paul nih fiang deuh in a vun chim rih. Minung vialte hi Judah mi si u sih, Jentail mi si u sih, sualnak ṭhawnnak tang i a ummi kan si dih caah, kan dihlak in Pathian he i rem kan hau. Cu i remnak cu Jesuh Khrih zumhnak thawngin a si. Cun Khrih he aa pehmi nunnak chung cun nunnak thar a chuak i a zummi cu Pathian he an i rem i sualnak le thihnak ṭhawnnak chung khan Pathian Thiang Thlarau nih a luatter hna. Dal 5 in 8 tiangah hin Pathian Nawlbia nih aa tinhmi kong le Pathian Thlarau nih a zummi hna an nunnak chungah zei ṭhawnnak dah a umter timi kong kha a chim. Cu dih cun Judah mi he Jentail mi he Pathian nih mi vialte ca i a timhmi chung i an i telnak kong kha a chim. Judah mi nih Jesuh an duh lo i an hlawt kha Pathian nih minung vialte Khrih chungah a ummi Pathian vel chungah khan an i khumh khawh nakhnga caah a si tiin a ti i a donghnak ah cun Judah mi nih hin Jesuh hi an hlaw zungzal lai lo, a ti. A donghnak ah Khrihfa nunning kan timi hi dawtnak nunning a si kha a chim i pumpak i chawnhbiaknak in a cakuat cu a donghter.

Tlangpi Hna
Biahmaiṭhi 1.1-7
Minung nih khamhnak a herh 1.183.20
Pathian nih khamhnak lam a ser 3.214.25
Khrih chungah nunnak thar 5.18.39
Pathian timhnak chungah Israel 9.111.36
Khrihfa ziaza 12.115.13
Donghnak le pumpak biacah 15.1416.27

Rom Cakuat 1

1Khrih Jesuh sal le Pathian nih a Thawngṭha chim awkah a thim i a auhmi lamkaltu keimah Paul nih ca kan kuat hna.

2Cu Thawngṭha cu Pathian nih hlanpi in a profet hna sinin a rak kan kamh i Cathiang chung i a rak i ṭialmi kha a si i 3cucu a Fapa kan Bawipa Jesuh Khrih kong kha a si. Minung lei in ti ahcun David hrinsor a si, 4thlarau lei in le a thiannak kong in ti ahcun, ṭhawnnak nganpi in thihnak in thawhter a sinak nih khan Pathian Fapa a si kha a langhter. 5Amah thawngin Pathian nih lamkaltu sinak kha a ka pek i miphun kip chungmi kha zumhnak le Pathian nawlngaihnak i phakter awkah a ka fial; 6cu hna lakah cun nannih, Rom khua ah a um i Pathian nih Jesuh Khrih ta si dingin an kawhmi hna zong nan i tel ve.

7Cucaah Pathian nih a dawt i amah mi si dingah an kawhmi hna, Rom khua i a ummi nan dihlak in ca kan kuat hna:

Pathian kan Pa le Bawipa Jesuh Khrih nih vel le daihnak cu inpe ko hna seh.

Lawmhnak Thlacam

8A hmasa bik ah, nan dihlak ruangah ka Pathian cu Jesuh Khrih thawngin ka lawmh; zeicahtiah vawlei khuazakip ah nan zumhnak thawng hi an rak theih dih cang. 9Ka chimmi bia hi ahmaan tiah Pathian cu tehte ah kaa lak ngam — cu Pathian rian, a Fapa kong Thawngṭha chim hi ka lungthin dihlak in ka ṭuanmi cu a si. 10Thla ka cam fate nannih kan hngalh zungzal hna cu Pathian nih a hngalh ko. Cun Pathian sinah cun, annih cu zei maw ti tal in ka hmuhter ko hna, tiin thla ka cam lengmang. 11Zeicahtiah nanmah hmuh cu kaa ngaih hringhran i nanmah he thlarau thluachuahnak i hrawm i nanmah thazang pek cu ka duh ngaingaimi a si. 12Ka chim duhmi cu, pakhat le pakhat kan i bawm cio hnga; ka zumhnak nih nannih an bawmh hna hnga i nan zumhnak nih kei zong a ka bawmh ve hnga, ti hi a si.

13Ka u le ka nau hna, hihi rak ka hngalhpiak u ti kan duh hna: nanmah tlawn hi voi tampi kaa tim tawn, sihmanhsehlaw zei nih dik a ka donh zungzal. Jentail mi a dang hna lak i lungthlengmi ka umter hna bantukin nannih lak zong i lungthlengmi umter ve cu ka duh hringhranmi a si. * 14Miphun vialte hna sinah leiba ka ngei, a fimmi si hna seh, a hrutmi si hna seh, cathiammi si hna seh, cathiam lomi si hna seh, an dihlak cungah leiba ka ngei. 15Cucaah cun nannih Rom khua i a ummi sin zong i Thawngṭha chim ka duhnak cu a si.

Thawngṭha Hmual

16Thawngṭha hi ka zahpi lo, zeicahtiah a zummi vialte hna caah Pathian khamhnak hmual a si, Judah mi hna caah a si hmasa i cun Jentail mi hna ca zongah a hung si. * 17Cucu zeitindah a hung si ti ahcun, Thawngṭha nih cun Pathian nih zeitindah minung kha Amah he aa remter hna ti kha a langhter i Cathiang nih, “Zumhnak thawngin Pathian he aa remmi cu an nung lai,” a ti bang khan, Pathian he i remnak cu a hram in a dong tiang zumhnak thawngin a si. *

Minung Sualnak

18Sihmanhsehlaw Pathian thinhunnak cu vancung in a rung lang i minung sualnak le ṭhat lonak dihlak cungah khan a rung tlung; cu an ṭhat lonak cu biatak kha lang kho loin a dawntu an ṭhat lonak kha a si. 19Minung cu Pathian kong hngalh khawh a simi thil hna kha Pathian hrimhrim nih fiang tein a hmuhsak ko hna nain 20an hmu duh lo, cucaah dan a tat hna. Vawlei a ser hramthawkte khan Pathian nih cun, hmuh khawh a si lomi a sining, zungzal hmunmi a ṭhawnnak le a Pathian sinak kha, fiang tein a langhter ko. Cucaah i silhnalh khawhnak zeihmanh an ngei lo! 21Pathian cu hngalh cu an hngalh ko, sihmanhsehlaw pek awk a simi upatnak kha an pe duh lo; a lawmh zong an lawm duh fawn lo. An ruahnak kha pakpalawng tu ah a cang i an lungthin kawlawngpi cu muihnak in a khat. * 22Annih nih cun, kan fim, an ti, sihmanhsehlaw mihrut an si; 23thih a thiam lomi Pathian tu kha bia loin thih a thiammi minung le va le saram le a lawn in a lawnmi thilnung he aa loin sermi milem tu kha an biak hna. *

24Cuticun minung cu, cu bantuk mihrut cu an si caah, Pathian nih khan, an lungthin nih tuah a duhmi thil fihnung kha a tuahter ko hna i pakhat le pakhat cungah ningzak thil kha an tuah. 25Pathian kong i biatak kha lih ah an thlen; Sertu kha bia loin sermi thil tu kha an biak hna, Sertu cu pei zungzal in thangṭhat awk a simi cu a si cu! Amen.

26Cuti an tuah caah cun, minung cu Pathian nih ningzak a simi pumsa duhnak ah khan a thlah hna. Nu hmanh nih khan ningcang tein hman awk a simi an nu sinak cu ningcang lo piin an hman i pakhat le pakhat kha an sual. 27Cu bantuk ṭhiamṭhiam in pa zong nih khan ningcang tein nu he um awk cu an hlawt riangmang i anmah le anmah kha an sual. Cu bantuk ningzah awk thil cu pa nih khan an tuah caah cu bantuk thil ṭhalo nih hmuh awk a tlakmi dantatnak cu an hmuh.

28Pathian kong hngalh taktak cu minung nih khan an lung chung i chiah an duh lo caah a thurhnawmmi lungthin ngeih awkah khan a thlah hna i cucaah cun tuah awk a si lomi thil kha an tuah. 29Annih cu ṭhat lonak a phunphun le duhfahnak le puarnak le nahchuahnak in an khat i an lungthin cu lainawnnak le i dohnak le i hlennak le ziarngeihnak in a liam in a liam. Pakhat le pakhat an i congoih, 30an i thangchiat, Pathian kha zei ah an rel lo, an lung a puam, tla ngialngual in an um, an i porhlaw, ṭhat lo tuahnak lam kha an ruat, nu le pa nawl an ngai lo; 31an ziaza a ṭhalo, an biakam kha an let lengmang, midang cungah zaangfahnak le zawnruahnak zeihmanh an ngei lo. 32Hi bantukin a nunning a simi cu thih awk a tlakmi a si, tiah Pathian nawlbia nih a timi kha an hngalh ko. Asinain hi bantuk thil cu anmah nih an tuah lengmang lawng si loin midang a tuah vemi zong kha an hnatlakpi hna.

⇑

[Remove Footnotes]