TITAS

SIN PAUL CAKUAT

Titus

Biahmaiṭhi

Titas hi Jentail mi a si i Khrihfa a can hnuah Paul bawmtu ah a cang. Paul nih ca a kuat ah hin a rianṭuannak cu Krit tikulh ah khan a si i cuka Khrihfabu zohkhenhtu ah khan Paul nih a chiahtakmi a si. Hi ca a kuatmi nih hin thil pathum a chim duhmi a um:

1. Khrihfabu hruaitu a simi nih an ngeih awk a simi ziaza kha Titas cu a hngalhter ṭhan. Hi bantukin hngalhter ṭhan a herh khunnak cu Krit mi hi ṭhat lonak lei i minthang an si caah a si.

2. Khrihfabu chung i pa upa deuh pawl le nu upa deuh pawl le tlangval pawl le sal a simi hna cawnpiak thiam a herhnak kong kha a chimh.

3. Khrihfa ziaza kongah ruahnak a cheuh. Dai tein um i rem tein khuasak i huatnak le bia i al lengmangnak Khrihfabu chung rianṭuannak i a ṭhathnem loning le Khrihfabu chung i kuainak a um lo a herhning kha a chimh.

Tlangpi Hna
Biahmaiṭhi 1.1-4
Khrihfabu chung rianṭuantu hna 1.5-16
Khrihfabu chung bu hna le an rian cio 2.1-15
Forhnak le ralrin peknak 3.1-11
Biatlangkawm 3.12-15

Titas 1

1Zumhnak kan i hrawmmi chung i ka fa taktak a simi Tias, hi ca hi kan kuat.

Pathian kan Pa le Khrih Jesuh kan Khamhtu nih vel le daihnakin pe ko hna seh.

2,3,4 Pathian sal le Khrih Jesuh sal ka sinak a langhtertu cu zumhnak le hngalhnak le ruahchannak an si, zumhnak cu Pathian nih a thimmi hna chung i a hung thomi zumhnak, hngalhnak cu kan biaknak phung nih a kan cawnpiakmi biatak hngalhnak, ruahchannak cu zungzal nunnak i ruahchannak. Cu zungzal nunnak cu lih a chim kho lomi Pathian nih caan hramthawk hlan in a kan kamh cangmi nunnak kha a si i atu ah amah nih a caan a rem a timi caan ah a phuan cang. Cu bia a phuanmi rian cu keimah kha ṭuan awkah a ka fial i kan Khamhtu Pathian nawl in cu bia cu ka chim. *

Titas Nih Krit Tikulh I Rian A Ṭuannak

5Krit tikulh i kan chiahtak ah khan ka rak i tinhmi cu, kan ṭuannak i kan nganh tami kha a ningcang tein na hun sersiam hna lai i khua kip ah Khrihfa upa kha na hun chiah hna lai, ti a si. Na hun zulh awkah tiin cawnpiaknak kan chiahtami kha philh hna hlah. 6Cu hna cu: Khrihfa upa cu mawhchiat awk a um lomi an si lai, nupi pakhat lawng a ngeimi an si lai, an fale kha a zumtu a simi an si lai i puarhran lei le nawlngaih lo leiah minthang lomi an si lai, ti kha an si. * 7Khrihfabu hruaitu cu Pathian rian ṭuantu a si caah mawhchiat awk a um lomi a si lai. Miruamkai a si lai lo, mithintawi a si lai lo, zurit hmang a si lai lo, mi-aukhuan hmang a si lai lo, mihakkau a si lai lo. 8Khualtlung a dawmi a si lai i thil ṭha a duhmi a si lai. Amah le amah aa uk khomi, a dingmi, a thiangmi le aa sum khomi a si lai. 9Cawnpiaknak ahmaanmi aa tlaih pengmi a si lai, cuticun a bia a ngaitu pawl kha cawnpiaknak ṭha in an lung a thawhter khawh hna lai i cawnpiaknak ṭha a altu pawl kha an palhnak a langhter khawh lai.

10Uk khawh lomi tam tuk an um i Judah phung in Khrihfa phung i a hung lutmi hna lakah hin an tam khun; an duhduh in bia an chim i mi ruahnak kha a ping a pang ah an kalter. 11Kha hna pawl kha kham an hau, zeicahtiah an chim awk a si lomi thil an chimmi nih khan innchungkhar hna an dihlak in a tuaiter hna i cu zong cu ningzah awk tlak a simi thil, tangka hmuh duh men caah khan a si. 12“Krit mi cu milihchim, saram bantuk, mithathu, mi-orkhu,” tiah anmah Krit mi lila nih a rak ti hna i 13a chimmi cu a hmaanmi a si. Cucaah cun fak piin na chimhhrin hna lai. Cuticun a ngan a dammi zumhnak kha an ngei kho lai i 14Judah mi hna tuanbia ṭukṭak le biatak a hlawmi hna nih an chuahpimi minung nawlbia kha zeihmanh ah an rel ti hna lai lo. 15A thiangmi caah cun zeizong vialte hi a thiang dih ko, sihmanhsehlaw a hnawmtammi hna le a zum duh lomi hna caah cun, an lungthin le an chiaṭha thleidannak kha a thur caah, zeihmanh a thiangmi a um lo. 16Pathian kan hngalh ti cu an ti, sihmanhsehlaw an tuahnak nih an chimmi cu a si lo ti kha a langhter. Mi huat awkin an um, nawl ngai loin khua an sa i thil ṭha tuah dingah an i tlak lo.

⇑

[Remove Footnotes]