1Chanrelnak 13

Biakam Kuang Jerusalem Ah An Ratpi

1David nih a thong pawl haotu hna le a za pawl haotu hna le haotu paohpaoh kha lungthin cheuh awk a hal hna. 2Cun David nih Israel mi aa pummi vialte cu a thawh hna i, “Nannih nih a ṭha tiah nan ruah i Bawipa kan Pathian duhnak a si ahcun, Israel ram chung i a um rihmi kan unau hna le an sin i a ummi tlangbawi hna le Levi mi hna, saṭil tlonnak ram a ngeimi khua chung i a ummi hna kha, kan sinah i pumh ve awkah an rat nakhnga, hei sawm hna u sih. 3Cun kan Pathian kuang kha kan sinah ratpi ṭhan u sih; zeicahtiah Saul chan lioah khan kannih nih kan rak daithlanh ai,” tiah a ti. 4Aa pummi vialte nih cu bantukin tuah awkah an hna a tla, zeicahtiah cu thil cu mi vialte mithmuhnak ah thil dik a si.

David Cu Kuang Lakah Khan A Kal

(2Sam 6.1-11)

5Cucaah David nih Israel mi vialte cu Izipt ram tiva Shihor in Hamath luhnak tiang Kiriath-jearim in Jerusalem Pathian kuang cu ratpi awkah, a pumh hna. * 6Cun David le Israel mi vialte cu Baalah ah khan an hung kal, cucu Judah ta a simi Kiriath-jearim kha a si; cherubim hna cungah a ṭhumi Bawipa min in kawhmi Pathian kuang va lak awkah khan a si. * 7Cun annih nih Abinadab inn khan Pathian kuang cu cawleng thar cungin an kalpi i Uzza le Ahio nih khan cawleng cu an mawngh. 8Cun David le Israel mi vialte kha Pathian hmaiah cun an thazang dihlak le hla le tingtang le thonglawi le khuang tete le sumsel le muko he tiah thanuam in an um.

9Cun Khidon phuhri an va phak tikah, cawtum cu an lumhrilh caah Uzza nih cun kuang kha tlaih awkah a kut in a hei banh. 10Cun Bawipa thinhunnak cu Uzza cungah cun a alh i kuang kha a hei banh caah a thah i cuka ah cun Pathian hmaiah a thi. 11Cun Bawipa nih Uzza cungah a thinhunnak a langhter caah David cu a thin a hung i cuka hmun cu nihin ni tiang hin Perez-uzza tiah ti a si. * 12Cun David nih Pathian cu khi ni ah a ṭih i, “Zeitindah inn ah ka sinah Pathian kuang cu ka ratpi khawh lai?” tiah a ti. 13Cucaah David nih inn ah David khua chungah khan kuang cu a luhpi lo, sihmanhsehlaw Git mi Obededom inn ah khan a kalpi. 14Cun Pathian kuang cu Obededom inn chungah khan a innchungkhar hna he thla thum a um; cun Bawipa nih Obededom innchungkhar le a ngeihmi vialte cu thluachuah a pek hna. *

⇑

[Remove Footnotes]