SIANGPAHRANG PAKHATNAK

1 Kings

Biahmaiṭhi

Samuel Pakhatnak le Pahnihnak ah aa thawkmi Israel siangpahrang hna kong kha Siangpahrang Pakhatnak ah hin peh a si. Hi cauk hi ṭhen thum ah ṭhen khawh a si:

1. Solomon kha Israel le Judah siangpahrang a sinak le a pa David thihnak kong.

2. Solomon siangpahrang a sinak le a rian ṭuannak. Jerusalem Biakinn a saknak kong.

3. Chaklei Pennak le Thlanglei Pennak an i cheunak kong. Cun cu Pennak pahnih hna chung i B.C. kum za riat tiang hrawng siangpahrang a cangmi hna kong.

Siangpahrang Cauk Pahnih hna chungah hin, uktu paohpaoh kha Pathian an tlaihchan maw tlaihchan lo tiin cuaithlai an si i an tlaihchan ahcun hlawhtlinnak an hmu i a nawl an ngaih lo ahcun rawhnak an tong, ti kha a si. Chaklei Pennak siangpahrang hna cu cu bantuk cuaithlainak ahcun an sung dih, Thlanglei Pennak siangpahrang hna cu a cheu an awng a cheu an sung.

Siangpahrang Pakhatnak cauk chungah hin Pathian profet hna rian ṭuannak kha kan hmuh i cu hna nih cun siasal biak lo ding le Pathian nawl ngaih ding kha an forh hna. Cu hna lak i minthang bik cu Elijah a si i Baal profet hna he an i zuamnak kong kha a ngan 18 chungah a um.

Tlangpi Hna
David pennak donghnak 1.12.15
Solomon siangpahrang a cang 2.13-46
Solomon pennak 3.111.43
     a. A thawkter kum hna 3.14.34
     b. Biakinn saknak 5:1—8.66
     c. Donghlei kum hna 9.111.43
Pennak Aa Cheu 12.122.58
     a. Chaklei chung pawl ral an tho 12.114.20
     b. Judah le Israel siangpahrang hna 14.2116.34
     c. Profet Elijah 17.119.21
     d. Israel siangpahrang Ahab 20.122.40
     e. Judah siangpahrang Jehoshafat le Israel siangpahrang Ahaziah 22.41-53

1Siangpahrang 1

Abishag Nih David Kha A Bultawl

1David Siangpahrang cu a upa i a tar ngaingai cang; puan an vorh nain a khua a lum kho hlei lo. 2Cucaah a sinum hna nih khan amah cu, “Siangpahrang ka bawipa caah hin ngaknu in kawlpiak u si law, siangpahrang hi in tuammuai seh law in zohkhenh seh law; siangpahrang ka bawipa nih hin lumnak na hmuh khawh nakhnga, na ṭang cungah it seh law,” tiah an ti. 3Cucaah Israel ram chung dihlak ah khan ngaknu dawhte cu an kawl i Shunam mi Abishag kha an va hmuh i siangpahrang sinah cun an ratpi. 4Ngaknu cu aa dawh ngaingaimi a si; cun amah cu siangpahrang tuammuaitu ah khan a cang i amah kha a bultawl; sihmanhsehlaw siangpahrang nih amah cu a theihngal lo.

Adonijah Nih Bawi Aa Cuh

5Cun Haggith fapa Adonijah kha amah le amah aa hlorh i, “Siangpahrang ka si lai,” tiah a ti i amah caah khan rangleng hna le rangcung ralkap hna le a hmai i a tli dingah minung sawm nga kha a timh hna. * 6A pa nih zeitikhmanh ah, “Zeicahdah cu bantuk, kha bantukin na tuah?” tiin amah kha a ing a puanter bal lo. Amah cu Absalom a hun changtu kha a si i a dawh zong aa dawh ngaingai. 7Zeruiah fapa Joab le tlangbawi Abiathar kha a chimh a ruah hna i annih nih Adonijah kha an zulh i an bawmh. 8Sihmanhsehlaw tlangbawi Zadok le Jehoi-ada fapa Benaiah le profet Nathan le Shimei le Rei le David miṭhawng hna nih khan cun Adonijah kha an ṭanpi lo.

9Adonijah nih khan tuu hna le cawtum hna le cenhmi saṭil thauthau hna kha Rulpi Lung. Enrogel pawng i a ummi ah khan a thawi hna i siangpahrang fapa a unau vialte le Judah ram i siangpahrang bawi hna cu an dihlak khan a sawm hna, 10sihmanhsehlaw profet Nathan siseh, Benaiah siseh, miṭhawng hna kha si hna seh, a unaupa Solomon kha siseh, a sawm hna lo.

11Cun Nathan nih Solomon nu Bathsheba kha a thawh i, “Haggith fapa Adonijah kha kan bawipa David hngalh loin siangpahrang a si cang, ti hi na hngal lo dahra? * 12Cucaah ra law ruahnak kan cheu tuah lai, nangmah na nunnak le na fapa Solomon nunnak kha na khamh khawh nakhnga. 13David Siangpahrang sinah cun khulrang in va kal law amah cu, ‘Siangpahrang ka bawipa, nangmah nih na salnu ka sinah, “Keimah hnuah Solomon na fapa hi a rung bawi lai i ka bawi ṭhutdan cungah hin a ṭhu lai,” tiin chiat na ser lo maw? Zeicahdah Adonijah hi siangpahrang a si kun?’ tiah va ti. 14Cun siangpahrang na chawnh lioah cun kei zong nih ka run in zulh colh ve lai i na bia cu ka fehter lai,” tiah a ti.

15Cucaah Bathsheba cu siangpahrang sinah a khaan chungah khan a vung lut (siangpahrang cu a tar ngaingai cang i Shunam mi Abishag nih khan siangpahrang cu a tuammuai). 16Bathsheba nih cun a lu a khun i siangpahrang sinah upatnak kha a tuah, cun siangpahrang nih, “Zeidah na duh?” tiah a ti. 17Cun anih nih amah sinah cun, “Ka bawipa, nangmah nih na salnu sinah hin, Bawipa na Pathian min chalh in chiat na rak ser i, ‘Na fapa Solomon hi keimah hnuah a rung bawi lai i ka bawi ṭhutdan cungah a ṭhu lai,’ tiah na ti. 18Sihmanhsehlaw, zohhmanh, siangpahrang ka bawipa, nangmah nih na hngal lo nain, Adonijah cu siangpahrang a si ko cang. 19Amah nih cawtum hna le cenhmi saṭil thauthau hna le tuu hna kha tam piin a thawi cang hna i siangpahrang fapa vialte hna le tlangbawi Abiathar le ralkapbu haotu Joab kha a sawm hna, sihmanhsehlaw na sal Solomon cu a sawm lo. 20Cucaah siangpahrang ka bawipa, atu cu Israel mi vialte hna nih, ahodah siangpahrang ka bawipa ṭhutdan ah hin amah hnu in a ṭhu lai, ti chimh awkah nangmah cungah an mit an chiah dih. 21Cu ti a si lo ahcun, siangpahrang ka bawipa hi a pupa hna sinah a ih tikah, keimah le ka fapa Solomon cu sualnak tuahtu ah rel kan vung si te ko lai,” tiah a ti.

22Siangpahrang cu a chawnh lioah cun profet Nathan kha a rung lut. 23Cun siangpahrang cu, “Hika ah hin profet Nathan a um,” tiah an chimh. Cun siangpahrang hmaiah a rung luh tikah, vawlei lei hoih in siangpahrang hmaiah cun a kun. 24Cun Nathan nih cun a thawh i, “Siangpahrang ka bawipa, nangmah nih, ‘Keimah hnuah Adonijah hi a rung bawi lai i ka bawi ṭhutdan ah a ṭhu lai,’ tiah na rak ti maw? 25Zeitintiah nihin ni ah hin a vung kal i cawtum hna le cenhmi saṭil thauthau hna le tuu hna kha tam piin a thawi hna i siangpahrang fapa vialte le ralkapbu haotu Joab le tlangbawi Abiathar kha a sawm hna i zohhmanh, a hmaika ah cun an ei an ding i, ‘Siangpahrang Adonijah cu saupi nung ko seh,’ tiah an ti. 26Sihmanhsehlaw na salpa keimah le tlangbawi Zadok le Jehoiada fapa Benaiah le na sal Solomon kha cu a kan sawm lo. 27Mah hi thil hi siangpahrang ka bawipa nih na tuahmi a si i nangmah hnuah hin siangpahrang ka bawipa bawi ṭhutdan cungah ahodah a ṭhu lai ti kha na kan chimh lo a si maw?” tiah a ti.

Solomon Siangpahrang Ah An Ser

28Cun David Siangpahrang nih, “Bathsheba kha ka sinah hei au tuah,” tiah a leh. Cucaah siangpahrang hmaika ah khan a rung lut i siangpahrang hmaika ah cun a dir. 29Cun siangpahrang nih chiat a ser i, “Harnak kip chungin ka nunnak a ka tlantu Bawipa cu a nun bangin, 30 Bawipa, Israel Pathian min chalh in na sinah chiat ka ser i, ‘Ka hnuah na fapa Solomon cu a rung bawi lai i keimah hmun ah amah cu ka bawi ṭhutdan cungah a ṭhu lai,’ tiin ka ti bantuk khan, cu bantuk ṭhiamṭhiam cun nihin zongah hin ka tuah lai,” tiah a ti. 31Cun Bathsheba cu vawlei lei hoih in a kun i siangpahrang sinah cun upatnak a tuah i, “David Siangpahrang ka bawipa cu zungzal in nung ko seh!” tiah a ti.

32David Siangpahrang nih, “Tlangbawi Zadok le profet Nathan le Jehoiada fapa Benaiah kha ka sinah au hna u,” tiah a ti. Cucaah siangpahrang hmaiah khan an ra. 33Cun siangpahrang nih annih cu, “Nan bawipa sinum hna kha i kalpi hna u law, ka fapa Solomon cu keimah laa cungah khan citter u law, Gihon ah runpi u; 34cun tlangbawi Zadok le profet Nathan nih khan khika ah Israel mi vialte cung i siangpahrang ah chiti thuh hna seh; cun muko kha tum u law, ‘Solomon Siangpahrang cu saupi nung ko seh!’ ti in au u. 35Cun nannih nih nan hun zulh lai i a ra lai i ka bawi ṭhutdan ah a ṭhu lai; zeitintiah amah cu keimah hmun ah siangpahrang a si lai; cun amah cu Israel le Judah cung i uktu si awkah rian ka pek cang,” tiah a ti. 36Cun Jehoiada fapa Benaiah nih khan siangpahrang cu a leh i, “Amen! Bawipa, siangpahrang ka bawipa i Pathian nih cun cu bantukin chim ve ko seh. 37Siangpahrang bawipa sinah Bawipa cu a um bang khan, cu bantuk ṭhiamṭhiam in Solomon sinah um seh law, a bawi ṭhutdan cu ka bawipa David Siangpahrang i a bawi ṭhutdan nakin nganter deuh seh,” tiah a ti.

38Cucaah tlangbawi Zadok, profet Nathan le Jehoiada fapa Benaiah le Khereth mi hna le Peleth mi hna kha an vung kal i Solomon cu David Siangpahrang laa cungah khan an citter i Gihon ah an ratpi. 39Khika ah tlangbawi Zadok nih thlam chung khan chiti chiahnak ki cu a lak i Solomon kha a thuh. Cun muko kha an tum i, mi vialte nih khan, “Solomon Siangpahrang cu saupi nung ko seh!” an ti. 40Cun mi vialte nih khan an hun zulh i thonglawi kha an tum pah i an i lawm ngaingai, an thawngpang nih vawlei kha a tlerh dih.

41Adonijah le a sawmmi amah sin i a ummi vialte hna nih cun an rawldangh a dih pah ah khin mah thawng cu an theih. Cun Joab nih muko thawng kha a theih tikah, “Khua chung i an i tuai ur ko hi, a sullam zeidah a si?” tiah a ti. 42Bia a chim lioah cun, zohhmanh, tlangbawi Abiathar fapa Jonathan kha a rung lut i Adonijah nih cun, “Rung lut tuah, zeitintiah nang cu misantlai na si i thawng ṭha na rak phorh ṭheo lai,” tiah a ti. 43Jonathan nih cun Adonijah cu a leh i, “Asilo zeitintiah kan bawipa David Siangpahrang nih Solomon cu siangpahrang ah a ser cang; 44cun siangpahrang nih khan a sinah tlangbawi Zadok le profet Nathan le Jehoiada fapa Benaiah le Khereth mi le Peleth mi hna kha a thlah hna i siangpahrang laa cungah khan an citter; 45cun tlangbawi Zadok le profet Nathan nih khan Gihon ah chiti an thuh i cuka cun lunglawmhnak he an hung kal i cucaah khua cu aa tuai ur hi a si. Mah hihi nan theihmi thawng cu a si. 46Solomon cu siangpahrang bawi ṭhutdan ah a ṭhu. 47Cuhleiah siangpahrang sinum hna nih khan David Siangpahrang kan bawipa cu, ‘Na Pathian nih Solomon min cu nangmah min nakin minthang deuh ah ser seh law a bawi ṭhutdan cu na bawi ṭhutdan nakin nganter deuh seh,’ tiin lawmhpi awkah an ra. Khi tikah siangpahrang nih cun ihkhun cungah cun a lu a khun. 48Cun siangpahrang nih cun, ‘Keimah mit hmuh hrimhrim ah, ka bawi ṭhutdan cung i keimah tefa pakhat a ṭhuttertu Bawipa, Israel Pathian cu thangṭhat si ko seh’ ti zongah a ti fawn,” tiah a ti.

49Khi tikah Adonijah nih a sawmmi vialte hna cu an ther i an tho i anmah le an lam cio ah khan an kal. 50Cun Adonijah nih Solomon kha a ṭih i cucaah a tho i a kal i biakṭheng ki kha aa tlaih hna. 51Cun Solomon cu an chimh i, “Zohhmanh, Adonijah nih Solomon Siangpahrang kha a ṭih; zeitintiah, zohhmanh, biakṭheng ki kha aa tlaih hna i, ‘Solomon Siangpahrang nih a salpa hi vainam in ka that lai lo,’ tiin ka sinah chiat ser hmasa seh, a ti,” tiah an ti. 52Cun Solomon nih, “Santlaimi a sinak a langhter ahcun, a samfa fa khat hmanh vawlei ah a tla lai lo, sihmanhsehlaw a chungah ṭhat lonak hmuh a si ahcun, a thi lai,” tiah a ti. 53Cucaah Solomon Siangpahrang nih mi a hei thlah hna i biakṭheng khan an runpi. Cun a ra i Solomon Siangpahrang sinah khan upatnak a tuah i Solomon nih amah cu, “Na inn ah va kal,” tiah a ti.

⇑

[Remove Footnotes]