SAMUEL PAKHATNAK

1 Samuel

Biahmaiṭhi

Samuel Pakhatnak nih hin, Israel miphun hi an tuanbia ah, biaceihtu hna chan in siangpahrang chan ah an i ṭhialnak kong kha a chim. Hi bantukin an i ṭhialnak ah hin minung pathum biapi bik an si i cu hna cu Samuel, Saul le David an si. Samuel hi biaceihtu hna lak i hmanung bik a si, Saul hi Israel siangpahrang hna lak i hmasa bik a si, David hi Israel siangpahrang hna lak i a ngan bik a si. David siangpahrang i a hung cannak kong hi Samuel le Saul kong he khan chim chih lengmang a si.

Hi cauk nih hin biapi bik in a hlermi cu, Pathian cungah zumhawktlak tein um ahcun hlawhtlinnak a um ti le Pathian nawl ngaih lo ahcun lohralnak a chuak ti hi a si bik ko. Hi bia hi fiang tein 2.30 ah hin kan hmuh i cuka bia cu Pathian nih Eli tlangbawi bia a chimhmi kha a si.

Tlangpi Hna
Samuel cu Israel mi biaceihtu a si 1.17.17
Saul siangpahrang a cang 8.110.27
Saul uknak kum thum hmasa bik 11.115.35
David le Saul 16.130.31
Saul le a fapa hna thihnak 31.1-13

1Samuel 1

Samuel Hrinnak Kong

1Efraim tlangram Ramathaim-zofim khua ah mipa pakhat a um i a min cu Elkanah a si; amah cu Jeroham fapa a si, Jeroham cu Elihu fapa a si, Elihu cu Tohu fapa a si, Tohu cu Efraim mi Zuf fapa a si. 2Nupi pahnih a ngei, pakhat min cu Hannah a si i a dang pakhat min cu Peninnah a si. Cun Peninnah cu fa a ngei, sihmanhsehlaw Hannah cu fa a ngei lo.

3Cun hi pa cu kumfate in, Eli fapa pahnih Hofni le Phinehas, Bawipa tlangbawi an sinak Shiloh khua ah khan, ralkapbu Bawipa biak awk le raithawi awkah, amah khua in a hung kal tawn. 4Elkanah nih rai a thawi ni ah khan, a nupi Peninnah le a fapa hna le a fanu hna cu an dihlak in covo kha a pek cio hna; 5cun Hannah cu a daw ko nain Hannah cu Bawipa nih a nau inn a kharpiak caah covo pakhat lawng kha a pek. 6Cun Bawipa nih a nau inn a khar caah khan amah a engtaitu nih khan amah cu a thin hunter awkah ṭhalo tein a ti hram tawn. 7Cuticun kum khat hnu kum khat a si lengmang i, Bawipa inn i a hung kal fate amah cu a ti hram lengmang tawn. Cucaah Hannah cu a ṭap i rawl ei kha a duh lo. 8Cun a va Elkanah nih khan a sinah, “Hannah, zeicahdah na ṭah? Zeicahdah rawl ei na duh lo? Zeicahdah na thinlung a fah? Nangmah caah keimah cu fapa pahra nakin ka si deuh lo maw?” tiah a ti.

9Cun Shiloh i an ei an din dih khan Hannah cu a tho. Cun tlangbawi Eli cu Bawipa biaknak inn innka tung pawng i ṭhutnak ah khan a ṭhu. 10Cun Hannah cu a lungre a thei ngaingai i Bawipa sinah thla a cam i lunghno ngai tein a ṭap. 11Cun biatiamnak a tuah i, “Maw ralkapbu Bawipa, na salnu intuarnak hi na ka hmuhpiak i na ka cinken i, na salnu kha na philh lo i na salnu hi fapa na ka pek ahcun, a nun chung vialte amah cu Bawipa sinah ka pek lai i, luei nam nih a lu kha a tawng lai lo,” tiah a ti. *

12 Bawipa hmai i thla a cam lengmang lioah cun Eli nih a kaa kha a rak i chingchiah. 13Hannah nih cun a lung chungin a chim; a hmur lawng kha an caang i a aw cu theih a si lo; cucaah Eli nih zuri nu ah a rel. 14Cun Eli nih amah cu a thawh i, “Zei can dah na rit lai? Na zu cu chia cang ngat,” tiah a ti. 15Sihmanhsehlaw Hannah nih a leh i, “Asilo, ka bawipa, lung rethei ngaingai in a ummi nu ka si; mitsur hang siseh, zu siseh ka ding lo, sihmanhsehlaw Bawipa hmaiah ka lungthin ka bungh a si. 16Na salnu hi nu ṭhalo ah ka rel hlah, zeitintiah ka lung retheihnak le ka ngaihchiatnak pei ka chim lengmangmi hi a si cu,” tiah a ti. 17Cun Eli nih a leh i, “Dai tein va kal ko, Israel mi Pathian nih amah na halmi cu in pe ko seh,” tiah a ti. 18Cun anih nih, “Na salnu nih na mit ah duhdawtnak hmu ko seh,” tiah a ti. Cun minu cu a kal i rawl kha a ei i ngaihchia mithmai a pu ti lo.

19Zingka tein an tho i Bawipa cu an biak i Ramah khua i an inn ah khan an tlung. Cun Elkanah nih a nupi Hannah kha a hngalh i Bawipa nih amah kha a philh lo; 20cun a caan a tlin tikah Hannah cu fa a pawi i fapa a hrin i, “Amah cu Bawipa sinin ka halmi a si,” tiin a min ah Samuel a sak.

21Cun Elkanah le a chungle vialte cu Bawipa sin i kum fate thawinak pekchanh awk le a biahrennak pek awkah an hung kal. 22Sihmanhsehlaw Hannah cu a hung kal lo, zeitintiah amah nih a va sinah cun, “Ngakchia hi hnuk ka thlei cangka in ka ratpi lai, Bawipa hmaiah a chuah i khika ah a um zungzal nakhnga,” tiah a ti. 23Cun a va Elkanah nih cun “A ṭha bik ti i na ruahmi paoh cu tuah ko, amah kha hnuk na thlei hlantiang rak ngang rih ko; Bawipa nih a bia bel kha fehter ko seh,” tiah a ti. Cucaah hnuk a thlei hlantiang minu cu a um i a fapa kha hnuk a dinh. 24Cun hnuk a thlei dih in, kum thum a timi cawtum pakhat le changvut ephah pakhat le mitsur hang cua khat he tiah, amah sinah a hun i kalpi; Shiloh i Bawipa inn ah khan a ratpi; ngakchia cu a note ko. 25Cun cawtum kha an thah i ngakchia cu Eli sinah an ratpi. 26Cun amah nih, “Maw ka bawipa! Na nun bangin, ka bawipa, keimah hi hika na hmai i Bawipa sin i thla a rak cam minu kha ka si. 27Hi ngakchia caah hin thla kha ka rak cam; cun Bawipa nih ka halnak kha a ka pek. 28Cucaah Bawipa kha amah cu ka hlanh cang; a nun chung vialte amah cu Bawipa sinah hlanh a si,” tiah a ti.

Cun khika ah Bawipa kha an biak.

⇑

[Remove Footnotes]