CHANRELNAK PAHNIHNAK

2 Chronicles

Biahmaiṭhi

Chanrelnak Pahnihnak hi Chanrelnak Pakhatnak peh kha a si. A chimmi cu Solomon uknak kong, Solomon fapa Rehoboam uk lioah Chaklei Pennak an i cheunak kong, Chaklei pennak cu Jeroboam nih a hruai hna i ral an tho i an i ṭhen, cun Judah pennak kong kha a chim i B.C. 586 i Jerusalem a rawhnak tiang kha a chim.

Tlangpi Hna
Solomon Pennak 1.19.31
     a. A thawkter kum hna 1.1-17
     b. Biakinn sak a si 2.17.10
     c. A donghlei kum hna 7.119.30
Chaklei hrin pawl ral an tho 10.1-19
Judah siangpahrang hna 11.136.12
Jerusalem rawhnak 36.13-23

2Chanrelnak 1

Solomon Nih Fimnak Caah Thla A Cam

(1Sia 3.3-15)

1David fapa Solomon cu a ram chungah khan fek tein a um i Bawipa a Pathian cu a sinah khan a um i fak piin a nganter.

2Solomon nih cun Israel mi vialte, a thongthong pawl haotu si hna seh, a zaza pawl haotu si hna seh, biaceihtu si hna seh, Israel ram chung i hruaitu a simi, innchungkhar lu a si ciomi vialte hna kha bia a chimh hna. 3Cun Solomon le a sinah aa pummi vialte hna cu Gibeon i a ummi khuahrum bo ah khan an kal; zeicahtiah Bawipa sal Moses nih ramlak ah a sermi Pathian tonnak thlam kha khika ah cun a um. 4(Sihmanhsehlaw David nih Pathian kuang kha cu Kiriath-jearim in David nih hmun a serpiakmi, Jerusalem i thlam pakhat a bunhpiakmi ah khan a rak hunpi cang.) * 5Cuhleiah Hur fapa Uri i fapa Bezalel nih a sermi dar biakṭheng kha khika ah cun Bawipa puan biakinn hmaiah a um. Cun Solomon le aa pummi nih khan Bawipa cu an kawl. * 6Cun Solomon cu Bawipa hmai i a ummi dar biakṭheng, tonnak thlam i a ummi ah cun a hung kal i a cungah khangh thawinak thong khat a pekchanh.

7Cu zan ah cun Pathian cu Solomon sinah a lang i amah cu a thawh i, “Zeidah kan pek lai, ka hal tuah,” tiah a ti. 8Cun Solomon nih Pathian sinah cun, “Ka pa David cungah a fek i a nganmi dawtnak cu na langhter i amah hmun ah keimah cu siangpahrang ah na ka ser cang. 9Maw Bawipa Pathian, ka pa David sinah bia na rak kammi cu atu ah hin tlinter ko, zeitintiah keimah cu vawleicung leidip zat in a tammi miphun hna cungah hin siangpahrang ah na ka ser cang. * 10Cucaah hi miphun hmai i chuahnak ca le luhnak caah hin fimnak le hngalhnak ka pe tuah, zeicahtiah hi na mi, a ngan hringhranmi hi aho nih dah a uk khawh hna lai?” tiah a ti. 11Pathian nih Solomon cu a leh i, “Mah hihi na lung chungah a um i nangmah nih chawva siseh, rumnak siseh, upatnak siseh, nangmah an huatu hna thah awk kha siseh, nun saunak hmanh kha siseh, na ka hal lo i an cung i siangpahrang ah keimah nih kan chiahmi ka mi hna uknak ding caah khan nangmah caah fimnak le hngalhnak na ka hal caah, 12fimnak le hngalhnak cu kan pek. Nangmah hlan i a rak ummi siangpahrang hna nih an rak ngeih bal lo i nangmah hnu i a um laimi zong nih an ngeih bal lai lomi rumnak le chawva le upatnak zong kan pek fawn lai,” tiah a ti. 13Cucaah Gibeon i a ummi khuahrum bo, tonnak thlam hmai cun Solomon cu Jerusalem ah a ra. Cun Israel mi kha a pen hna.

Rang le Rangleng In Chaw A Let

(1Sia 10.26; 2Cha 9.25-28)

14Solomon nih rangleng le rangcung ralkap kha a pumh hna; amah nih cun rangleng thong khat za li le rangcung ralkap thong hleihnih a ngeih hna i annih cu rangleng khua hna le Jerusalem khua chung i a ummi siangpahrang sinah khan a chiah hna. * 15Cun siangpahrang nih cun sui le ngun cu Jerusalem ah khan lungtekem tlukin a tamter i sidar thing cu Shefelah i saikamor thing zat in a tamter. 16Cun Solomon nih a cawkmi rangtum hna cu Izipt le Kue in an si i siangpahrang chawlettu hna nih khan a man aa khat in Kue ah khan an cawk tawn hna. * 17Izipt ram in rangleng pakhat cu ngun shekel za ruk in an cawk i rangtum pakhat cu shekel za le sawm nga in an cawk; cu bantukin anmah sin ṭhiamṭhiam cun Hit mi siangpahrang hna le Siria siangpahrang hna sinah khan zuarh an si ṭhan.

⇑

[Remove Footnotes]