2Chanrelnak 2

Solomon Nih Siangpahrang Huram He Hnatlaknak A Ser

(1Sia 5.1-18; 7.13-14)

1 Bawipa min caah biakinn le amah caah siangpahrang inn sak kha Solomon cu aa tim. 2Solomon nih thil phortu ah mi sang sarih, cun tlang ram i lung khoihtu ah sang riat, cun anmah a kilkawitu hna ah thong thum le za ruk a thiah hna. 3Cun Solomon nih Tair ram siangpahrang Huram kha bia a cah i, “Ka pa David cungah na rak tuah i amah a umnak ding inn saknak caah sidar thing na rak kuat bantuk khan, keimah zong ka kua ve tuah. 4 Bawipa ka Pathian upatnak caah biakinn sak kaa tim. Cu inn cu ka mi hna le keimah nih rimthaw zihmui khanghnak in Pathian kan biaknak hmunthiang a si lai. Cun Israel mi cu nan tuah zungzal lai tiah nawlpek a simi: hun camcinmi changreu kan pekchanh zungzalnak hmun le Bawipa kan Pathian upatnak caah zingfa zanfa, sabbath hna le thla thar puai hna le nizarh hna ah khangh thawinak kan pekchanhnak hmun a si lai. 5Kan Pathian cu pathian vialte nakin a ngan deuh caah ka sak laimi inn cu a nganmi a si lai. 6Asinain vancung, a sang bik vancung hmanh nih khin amah cu a tlum lo caah, aho nih dah inn cu a sakpiak khawh lai? Amah hmai i zihmui khanghnak hmun ca men ah dah ti lo ahcun, amah ca i inn sa dingah cun kei cu aho hen dah ka si i? * 7Cun ka pa David nih a rak i roihmi hna, Judah ram le Jerusalem i ka sinah a ummi zungthiam hna sin i a um dingah, sui le ngun le dar le thir lei i zung a thiammi, puan sendung, senpau le a dum lei zong i zung a thiammi, cun ṭamhnak zei ṭial paoh a thiammi pakhat in rak ka kua. 8Sidar thing le saipres thing le algum thing zong Lebanon in rak ka kua, zeicahtiah na sinum hna nih Lebanon i thing ah an thiam kha ka hngalh. Cun ka sinum hna cu na sinum hna sinah, 9thingah kha tam piin a ka timhpiaktu dingah an um lai, zeicahtiah ka sak laimi inn cu a ngan i a ṭha ngaingai dingmi a si. 10Na sinum hna, thing attu hna kha denmi changvut rel sang hnih, barli rel sang hnih, mitsur hang bath sang hnih le chiti bath sang hnih ka pek hna lai,” tiah a ti.

11Khi tikah Tair siangpahrang Huram nih Solomon cu ca in a leh i, “ Bawipa nih a mi kha a dawt hna caah nangmah cu siangpahrang ah an ser,” tiah a ti. 12Huram nih cun hi ti zong hin a ti fawn, “ Bawipa, Israel Pathian, van le vawlei a ser i Bawipa caah biakinn le amah caah siangpahrang inn i saknak ding caah ruahnak fim le hngalhthiamnak a ngeimi fapa David Siangpahrang a petu cu thangṭhat si ko seh.

13“Atu ah zungthiam, hngalh-thiamnak a ngeimi, Huram-abi cu kan kuat, 14amah cu Dan phun minu hna lak i pakhat nu fa a si, a pa cu Tair mi a si. Amah cu sui, ngun, dar, thir, lung le thing lei rian, cun puan sendung, a dum, a senpau le puan hmangṭhia, cun ṭamhnak zei ṭial paoh ah le thil muisam tuahnak paohpaoh ah zungthiam a si; na zungthiammi hna, na pa David ka bawipa zungthiam hna sinah cun a ra ṭuan ve lai. 15Cucaah ka bawipa nih na chimmi changvut, barli, chiti le mitsur hang hna cu na sal hna hi hun kua hna; 16cun kannih nih na herhmi thing paoh cu Lebanon in kan rak in haupiak lai i rili in Joppa khua ah pum in kan ratpi lai i nang nih Jerusalem khua ah na hun kalpi hna lai,” a ti.

17Cun Solomon nih, a pa David nih a rak rel hna hnuah khan, Israel ram i a ummi ramdangmi vialte kha a rel hna i sing khat, sang nga, thong thum le za ruk an um. 18Annih chung i sang sarih cu thil phorh a thiah hna, sang riat cu tlang ram i lung khoih a thiah hna, thong thum le za ruk cu mi kha rian ṭuanter awk caah zohtu ah a thiah hna.

⇑

[Remove Footnotes]