2Chanrelnak 4

1Dar biakṭheng pakhat a ser i dong kul a sau i dong kul a kau i dong hra a sang. * 2Hmaihum a ser i a pum i khattelei tlang in khattelei tlang cu dong hra a si i dong nga a sang i a tlang velchum cu dong sawm thum a si. 3A tangah cun umruang mui hri an um i dong sawm thum an sau i hmaihum cu a velchum in an kulh; umruang cu tlang hnih in an um i hmaihum an thlet ah khan an thlet chih hna. 4Hmaihum cu cawtum hleihnih cungah a dir, pathum cu chaklei an hoih, pathum cu nitlaklei an hoih, pathum cu thlanglei an hoih i pathum cu nichuahlei an hoih; hmaihum cu an cungah cun khin a si i an hnulei cu a chunglei an chanh cio. 5A chahlei cu zapar a si i a tlang cu hrai tlang bantukin an ser, lili pangpar bantuk a si; bath thong thum ring lo a tlum. 6Kut ṭawlnak kheng pahra a ser fawn hna, panga cu thlanglei kamah a chiah hna i panga cu chaklei kamah a chiah hna. Hi hna chungah hin khangh thawinak ca a simi thil kha an tlengh hna i hmaihum cu tlangbawi hna an i ṭawlnak ding caah a si. *

7Cun rak ruah cia bang khan, sui mei vannak tung pahra a ser hna i biakinn chungah khan a hun hna, thlanglei kamah panga a chiah hna i chaklei kamah panga a chiah hna. * 8Cabuai zong pahra a ser hna i biakinn chungah khan, thlanglei kamah panga, chaklei kamah panga a chiah hna. Cun sui khengkuar za khat a ser hna. * 9Tlangbawi hna tual le tual ngan le tual ca i innkhar kha a ser hna i an innkhar hna cu dar in a hut hna; 10cun hmaihum cu inn thlanglei-nichuahlei kamah khan a hun.

11Huram nih um hna le cawhlek hna le khengkuar hna kha a ser hna. Cuticun Huram nih Bawipa inn ca i Siangpahrang Solomon a tuahpiakmi rian kha a lim: 12tungpi pahnih le kheng hna le tungpi dong i a ummi luchin pahnih hna; cun tungpi dong i a ummi luchin kheng khuhtu ding ca i sur bantukin sermi pahnih; 13cun tungpi dong i a ummi luchin kheng khuhtu hna ca i sur pahnih hna caah khan taleti za li, sur pakhat caah taleti rual hnih lengmang. 14Cun hunnak hna le hunnak cung i ṭawlnak kheng hna le 15hmaihum pakhat kha le a tang i cawtum hleihnih hna zong kha a ser hna. 16Um hna le cawhlek hna le keuṭe hna le hi hna ca i thilri vialte cu Huram-abi nih khan Siangpahrang Solomon caah Bawipa inn caah khan dar tleu in a ser hna. 17Jordan nelrawn, Sukkoth le Zeredah karlak i tlak hmun ah khan siangpahrang nih a thlet hna. 18Solomon nih hi thil vialte hna cu tam piin a ser hna i cucaah dar cu a khing zeizat a si kha hngalh khawh a si lo.

19Cuticun Solomon nih Pathian inn chung i a ummi thil vialte cu a ser hna: sui biakṭheng, Hun Camcinmi changreu ca i sui cabuai, 20ruah cia ningin hmunthiang chungchin i van awk ca meiinn tung hna le an meiinn hna, sui thiang in sermi; 21sui thiang bik in sermi pangpar hna le meiinn hna le cengceh hna; 22sui thiang in sermi mei hmihnak hna, khengkuar hna, zihmui kheng hna le mei zahnak hna; cun hmun thiang bik luhnak chungchin innkhar hna le biakinn ṭuangpi innkhar hna ca i sui thiang in sermi biakinn kapza hna.

⇑

[Remove Footnotes]