2Chanrelnak 7

1Solomon nih thla a camnak a dih tikah, van in mei a rung tla i khangh thawinak le raithawinak hna kha a kangh hna i Bawipa sunparnak cu biakinn kha a khat. * 2Cun Bawipa sunparnak cu Bawipa inn kha a khah caah tlangbawi hna cu Bawipa inn ah khan an lut kho lo. 3Israel fale vialte nih mei a rung ṭum le biakinn cung i Bawipa sunparnak kha an hmuh tikah, vawlei lei hoih in lung phahmi cungah khan an lu an i khun i Bawipa cu an biak i an lawmh i,

4Cun siangpahrang le Israel mi vialte nih Bawipa hmaiah raithawinak kha an pekchanh. 5Siangpahrang Solomon nih raithawinak caah cawtum sang hnih le thong hnih le tuu sing khat le sang hnih a pekchanh. Cuticun siangpahrang le mi vialte nih khan Pathian inn cu an pekchanh. 6Tlangbawi cu an umnak hmun cio ah khan Levi mi hna he hmaitonh in an dir. Levi mi hna cu Bawipa thangṭhatnak caah David nih a rak sermi aw dawh tumnak thilri hna he khan an dir i David nih an rian ah a rak thiah hna bang khan, “A fekmi a dawtnak cu zungzal in a hmun,” timi hla kha lawmhnak in an sa. Tlangbawi hna nih khan mi zapi an dir ah khan muko kha an tum hna.

7Cun Solomon nih Bawipa inn hmai i a ummi tual laifang kha a thianter; Solomon nih a sermi dar biakṭheng nih khan khangh thawinak le changvut thawinak le a thau hna kha a tlum hna lo caah, khika ah khangh thawinak le daihnak thawinak thau hna kha an pekchanh hna.

8Cu tan ah cun Solomon le a sin i a ummi Israel mi vialte, bu nganpi, Hamath khua luhnak in Izipt tivate tiang, cu hna nih cun puai cu ni sarih chung an tuah. 9Cun a ni riatnak ni ah a thiangmi pumhnak an tuah; zeitintiah annih nih biakṭheng pekchanhnak kha ni sarih chung an tuah i puai kha ni sarih chung an tuah. 10Thla sarihnak thla, a ni kul le ni thumnak ni ah mi cu an inn ah an tlunter hna i Bawipa nih David le Solomon le a mi Israel mi hna cung i ṭhatnak a langhtermi ruangah lunglawm le thanuam in an tlung.

Solomon Sinah Bawipa Voi Hnihnak A lang Ṭhan

(1Sia 9.1-9)

11Cuticun Solomon nih Bawipa inn le siangpahrang inn cu a lim hna; Solomon nih Bawipa inn chungah siseh amah a inn chungah siseh, tuah a timhmi vialte kha tling tein a lim dih hna. 12Cun Bawipa cu Solomon sinah zan ah a lang i amah cu a thawh i, “Na thlacamnak cu ka theih cang i hi hmun cu raithawinak inn caah kaa thim cang. 13Van cu ka phih hna i ruah a um lo tikah siseh, khaubawk hna cu vawlei ei awkah nawl ka pek hna tikah siseh, ka mi hna lakah rai ka tlunter tikah siseh, 14ka min in kawhmi ka mi hna nih khan an lung an ṭhumh i thla an cam i ka hmai kha an kawl i an lam ṭhalo khan an i mer ahcun, van khin ka run theih lai i an sualnak cu ka ngaihthiam hna lai i an ram cu ka damter lai. 15Cun hi hmun i thla an cammi cu ka mit nih a hmuh lai i ka hna nih a theih lai. 16Ka min cu zungzal in hika ah a um nakhnga hi inn cu ka thim cang i ka thianter cang; ka mit le ka lung cu hika ah an um camcin lai. 17Cun nangmah kong ah cun, na pa David nih a rak kal bantuk khan ka hmaiah na kal i nawl kan pekmi vialte ningin na tuah i ka nawlbia hna le ka phunglam hna cu na zulh hna ahcun, 18khi tikah na pa David sinah, ‘Israel mi uktu dingah mi na ṭhing lai lo,’ tiin bia ka rak kam bang khan na siangpahrang bawi ṭhutdan cu ka fehter lai. *

19“Sihmanhsehlaw na pial i na hmai i ka chiahmi ka nawlbia hna le ka phungbia hna cu na hlawt hna i na kal i pathian dang hna kha an rian na ṭuan hna i na biak hna ahcun, 20kan pekmi ram hin kan phawi lai i hi inn ka min ca i ka thiantermi hi ka mit hmuh phak lo ah khin ka hlonh lai i mi vialte lakah phungthluk bia le nihchuak capo bia ah ka ser lai. 21Cun hi inn a sunglawimi ah hin a pawng i a kalmi paoh an khuaruah a har lai i, ‘Zeicahdah mahtihin Bawipa nih hi ram cung le hi inn cungah hin a tuah hnga?’ tiah an ti lai. 22Khi tikah annih nih an i thawh lai i, ‘Zeicahtiah annih nih Bawipa, an pupa hna Pathian, Izipt ram in a chuahpitu hna kha an hlawt i pathian dang kha an i tlaih i an biak hna i an rian an ṭuan hna caah a si; cucaah hi ṭhat lonak vialte hi an cungah a tlunter,’ an ti lai,” tiah a ti.

⇑

[Remove Footnotes]