2Chanrelnak 9

Siangpahrangnu Sheba

(1Sia 10.1-13)

1Siangpahrangnu Sheba nih Solomon minthannak kha a theih tikah, amah cu a harmi biahalnak in hneksak awkah Jerusalem ah a ra; mizul tampi, zihmui phormi kalauk hna le sui tampi le lung mansung tampi aa phorh hna. Solomon sin a phak tikah a lung chung i a ummi vialte cu a chim dih. * 2Solomon nih a biahalnak vialte cu a leh dih; Solomon nih a sullam a chimh khawh lomi thil, Solomon sinin aa thupmi zeihmanh a um lo. 3Cun Siangpahrangnu Sheba nih Solomon fimnak le a inn sakmi le 4a cabuai i rawl le a bawi pawl an ṭhut-umning le a sinum hna nih an tuammuai hna ning le an hnipuan le a hrai putu hna le an hnipuan le Bawipa inn i a pekchanhmi a khangh thawinak hna kha a hmuh tikah, a chungah thlarau a tang ti lo.

5Cun siangpahrang cu a thawh i, “Ka ram chungin, na rian ṭuanning le na fimnak kong ka rak theihmi kha bia dik a si ko, 6sihmanhsehlaw an chimmi cu keimah hrim ka rat i keimah mit hrim nih a hmuh hlanah cun ka rak zum lo; zohhmanh, na fimnak a ngan ning a cheu hmanh an rak ka chimh ṭung lo; ka rak theihmi bia cu na lonh diam. 7Na nupi hna hi an van a va ṭha dah! Hi na sinum hna, nangmah hmaiah a dir zungzal i na fimnak a theimi hna hi an van a va ṭha dah! 8 Bawipa na Pathian, nangmah chungah lawmhnak a ngei i Bawipa na Pathian ca i siangpahrang ah a bawi ṭhutdan cungah an ṭhuttertu cu thangṭhat si ko seh! Na Pathian nih Israel mi cu a dawt hna i zungzal in hmunhter a duh hna caah, nangmah nih biading le dinnak kha na tuah nakhnga, an cung i siangpahrang ah an ser,” tiah a ti. 9Cun siangpahrang cu sui talen za khat le kul le zihmui tampi le lungvar man sung hna kha a pek: Siangpahrangnu Sheba nih Siangpahrang Solomon a pekmi zihmui bantuk cu a dang a um ti lo.

10Cuhleiah Huram sinum hna le Solomon sinum hna, Ofir in sui a rak phortu nih khan, algum thing le lungvar man sung an rak phorh hna. 11Cun siangpahrang nih algum thing cun Bawipa inn hleihlak hna le siangpahrang inn hleihlak hna le hlasatu hna ca i tingtang hna le ruakhuang hna zongah a ser hna; Judah ram chungah cu bantuk cu hmuh an si bal lo.

12Cun Siangpahrang Solomon nih siangpahrangnu Sheba cu a duhmi vialte, siangpahrang sin i a rak phorhmi hleiah a halmi vialte kha a pek dih. Cucaah aa let i a sinum hna he amah ram ah khan an tlung ṭhan.

Solomon Rumnak le Minthannak

(1Sia 10.14-29; 2Cha 1.14-17)

13Solomon sinah kum khat ah a lutmi sui a rih lei cu talen za ruk, sawm ruk le paruk a si, 14mah hihi chawlet hna le chawdawr hna nih an luhpimi lengah a si; cun Arabia siangpahrang vialte le ram uktu bawi hna nih khan Solomon sinah sui le ngun kha an ratpi. 15Siangpahrang Solomon nih phaw a nganmi za hnih, denmi sui in a ser hna; phaw pakhat ah denmi sui shekel za ruk cio a lut. 16Cun denmi sui in phaw za thum a ser hna; sui shekel za thum cio phaw pakhat ah cun a lut; cun siangpahrang nih cun Lebanon Tupi Inn chungah khan a chiah hna. 17Siangpahrang nih cun vuiho bawi ṭhutdan nganpi zong a ser i sui thiang in a hut. 18Bawi ṭhutdan nih cun lamhbak paruk le sui in sermi kedanh a ngei i cu hna cu bawi ṭhutdan ah khan an i peh, ṭhutnak kam veve ah ban chiahnak an um i ban chiahnak pawng veve ah cun chiandeih pahnih an dir; 19lamhbak kam kip ah khan a lamhbak paruk in, chiandeih hleihnih an dir. Cu bantuk cu khuazei ram hmanh ah an ser bal lo. 20Siangpahrang Solomon dinnak hrai vialte cu sui an si i Lebanon Tupi Inn umkheng vialte cu sui thiang an si; Solomon chan ah cun ngun cu zeihmanh ah an rak rel lo. 21Zeicahtiah Huram sinum hna he khan siangpahrang i a sangphawlawng cu Tarshish ah an kal tawn; kum thum ah voi khat lengmang Tarshish sangphawlawng nih sui, ngun, vui ho, zawng le awtaw kha an rak phorh tawn hna.

22Cuticun Siangpahrang Solomon nih vawlei cung siangpahrang vialte cu rumnak le fimnak ah a lonh dih hna. 23Cun Pathian nih a lung chung i a chiahmi fimnak theih awkah vawlei cung siangpahrang vialte hna nih cun Solomon cu an fuh. 24Cun kumfate in, cu zat in tiin, an laksawng ngun in sermi thilri hna le sui in sermi thilri hna le, puan hna le mura le zihmui le rangtum hna le laa hna kha an rak put cio hna. 25Cun Solomon nih cun rangtum hna le rangleng hna caah ranginn thong li a ngei i rangleng khua hna le Jerusalem i siangpahrang sinah a chiahmi rangcung ralkap sang khat thong hnih a ngeih hna. * 26Cun Zufrates tiva in Filistin mi hna ram tiang, cun Izipt ramri tiang, cuka i a ummi siangpahrang vialte kha a uk hna. * 27Cun siangpahrang nih Jerusalem ah ngun cu lungtekem tlukin a lenter i sidar thing cu Shefelah i saikamor thing bantukin a tamter. 28Cun rangtum hna cu Solomon caah Izipt ram le ram kip ah an va cawk hna. *

Solomon Thihnak

(1Sia 11.41-43)

29Cun Solomon tuahsernak a tang rihmi cu, a hramthawk in a donghnak tiang, profet Nathan ṭialmi tuanbia chungah le Shilon mi Ahijah nih a chimmi bia ṭialnak cauk chungah le Nebat fapa Jeroboam kong i hmutu Iddo nih langhnak a hmuhmi ṭialnak cauk chungah khan an i ṭial lo mei? 30Solomon nih Israel vialte cu Jerusalem in kum sawm li a pen hna. 31Cun Solomon cu a pupa hna sinah a it i a pa David khua ah khan an vui; cun a fapa Rehoboam cu amah hmun ah khan a hung bawi.

⇑

[Remove Footnotes]