2Chanrelnak 12

Shishak Nih Judah A Tuk

(1Sia 14.21-31)

1Rehoboam uknak cu a feh i a ṭhawn tikah Bawipa phungbia cu a hlawt i amah sin ṭang Israel mi vialte zong nih khan an hlawt ve. 2Siangpahrang Rehoboam a bawi kum nganak ah, annih cu Bawipa sinah zumhawktlak an si ti lo caah, Izipt siangpahrang Shishak nih Jerusalem cu, 3rangleng thong khat za hnih le rangcung ralkap thong sawm ruk he a hunhnawh. Izipt ram in amah he a rami hna cu rel cawk lo an si — Libia mi, Sukkiim mi le Ethiopia mi an si. 4Cun Judah ram chung i kulhnak a ngeimi khua kha a lak hna i Jerusalem tiang a ra. 5Khi tikah profet Shemaiah kha, Jerusalem i Shishak ruangah aa pummi Rehoboam le Judah bawi hna sinah khan a ra i annih cu, “Hi bangin Bawipa nih, ‘Nan ka kaltak caah kei zong nih Shishak kut chungah kan kaltak ve hna lai,’ a ti,” tiah a ti hna. 6Cun Israel bawi hna le siangpahrang nih cun an lung an ṭhumh i, “ Bawipa cu a ding,” tiah an ti. 7 Bawipa nih an lung an ṭhumh kha a hmuh tikah Bawipa bia cu Shemaiah sinah khan a ra i, “Annih nih an lung an ṭhumh cang, cucaah ka hrawk hna lai lo, sihmanhsehlaw luatnak tlawmpal ka pek hna lai i Shishak kut in Jerusalem cungah ka thinhunnak cu thlet a si lai lo. 8Asinain, annih cu a sal an si ko lai, zeicahtiah annih nih ka rianṭuan le ramdang hna pennak rianṭuan an i dan kha an hngalh nakhnga,” tiah a ti.

9Cuticun Izipt siangpahrang Shishak nih Jerusalem cu a hung doh; Bawipa inn chung rothil le siangpahrang inn chung rothil kha a lak hna; zeizong vialte kha a lak dih hna. Solomon nih a sermi sui phaw vialte zong kha a lak hna i * 10Siangpahrang Rehoboam nih anmah can ah cun dar phaw a ser hna i siangpahrang inn innka a cawngtu ralkap bawi hna kut chungah khan a chiah hna. 11Cun siangpahrang nih Bawipa inn chungah a luh fate, ralvengtu kha an ra i an rak put hna i ralvengtu hna khaan ah khan an kalpi ṭhan tawn hna. 12Cun a lung a ṭhumh tikah, hloh hirhiar a si nakhnga lo, Bawipa thinhunnak cu a sin khan aa mer i Judah ram chungah thil umtuning a ṭha.

13Cucaah Siangpahrang Rehoboam cu Jerusalem ah cun aa fehter i khika in a pen hna. Rehoboam cu bawi hram aa thawk tikah khan kum sawm li le kum khat a si i Jerusalem ah kum hleisarih a bawi, cu khua cu Israel miphun dihlak chungin khika i a min chiah awkah Bawipa nih aa thimmi a si. A nu min cu Naamah a si, amah cu Ammon mi a si. 14Cun ṭhat lonak kha a tuah i Bawipa kawl kha a lung in aa sehchih lo.

15Rehoboam tuahsernak hna cu a hramthawk in a donghnak tiang, profet Shemaiah le hmutu Iddo chan relnak cauk ah khan an i ṭial lo mei? Rehoboam le Jeroboam karlak ah khan ral a um thluangthluan ko. 16Cun Rehoboam cu a pupa hna sinah a it i David khua chungah khan an vui; cun a fapa Abijah kha amah hmun ah cun a hung bawi.

⇑

[Remove Footnotes]