2Chanrelnak 20

Moab Mi le Ammon Mi A Tei Hna

1Hi hnuah hin Moab mi hna le Ammon mi hna cu Meunim mi a cheukhat hna he Jehoshafat tuk awkah an i thawh. 2Mi zeimaw kha an ra i Jehoshafat kha an chimh i, “Nangmah doh awkah mibu nganpi Edom ram in, rili lengin an ra lio i zohhmanh, Hazazontamar ah an um” tiah an ti (mah cucu Engedi kha a si). 3Khi tikah Jehoshafat cu a thin a phang i Bawipa kawl awk kha aa tim i Judah ram chung vialte ah khan rawl ulhnak a thanh. 4Cun Judah ram mi cu Bawipa sinin bawmhnak kawl awkah an i pum; Judah ram chung khua dihlak khan Bawipa kawl awkah cun an ra.

5Cun Judah ram mi le Jerusalem mi aa pummi hna chungah cun; Jehoshafat cu Bawipa inn chungah, tual thar hmaiah khan a dir i, 6“Maw Bawipa, kan pupa hna Pathian, nangmah cu vancung i Pathian na si lo maw? Miphun hna ram vialte cu nangmah nih na uk lo maw? Nangmah na kut chungah lianhngannak le ṭhawnnak cu an um i ahohmanh nih an in celh lo. 7Maw kan Pathian, nangmah nih hika ram mi hna cu na mi Israel mi hna hmai i na dawi hna i na hawi Abraham tefa hna sinah zungzal ca in na pe hna lo mei? * 8Cu ram chungah cun khua an sa i na min caah hmunthiang pakhat an in sakpiak i, 9‘Kan cungah ṭhat lonak, vainam maw, biaceihnak maw, rai maw, mangṭam maw a tlun ahcun, hi inn hmaiah le nangmah hmaiah hin kan dir lai, zeicahtiah na min cu hi inn chungah hin a um i kannih nih kan harnak chungin nangmah cu kan in auh lai i nang nih na kan theihpiak lai i na kan khamh lai,’ tiah an ti. 10Cun atu cu zohhmanh, Ammon mi hna le Moab mi hna le Seir Tlang mi hna, Israel mi hna nih Izipt ram in an chuah tikah tuk na thlauh hna ca i an hrial hna i an hrawh lomi hna nih khan * 11zohhmanh nangmah nih co awkah na kan pekmi na ta chung hin kannih cu dawi i cuticun lehrulh an kan timh. 12Maw kan Pathian, an cungah biaceihnak na tuah hnga lo maw? Zeitintiah kannih doh awkah a kan rathnawhtu hi bu nganpi hmaiah hin kannih cu santlailo kan si ko. Zei tuah awk kan hngal lo, sihmanhsehlaw kan mit lawng kha na cungah a um ko,” tiah a ti.

13Cu lioah cun Judah mi vialte hna cu an ngakchia hna le an nupi le an fale hna he, Bawipa hmaiah khan an dir. 14Cun Bawipa thlarau cu aa pummi hna lak i a ummi Jahaziel cungah khan a tlung; amah cu Zekhariah fapa a si, Zekhariah cu Benaiah fapa a si, Benaiah cu Jeiel fapa a si, Jeiel cu Mattaniah fapa a si, Mattaniah cu Levi mi, Asaf fapa hna tefa kha a si. 15Cun anih nih a thawh i, “Judah mi vialte le Jerusalem mi hna le Siangpahrang Jehoshafat hna, thei tuah u: Bawipa nih hi bangin nan sinah, ‘Hi mibu nganpi ruangah nan thinphang in nan lung dong hlah u; zeicahtiah hi raldohnak cu nanmah ta a si lo, Pathian i a si. * 16Thaizing ah vung do hna u; zohhmanh, Ziz hung kainak khan an hung lai; nelrawn dongh, Jeruel ramlak nichuahlei ah khan nan hmuh hna lai. 17Hi i tuknak chungah hin nannih nih nan tuk a hau lai lo; nan um hmun kha i tlaih u law dai tein dir ko u law nanmah ca i Bawipa nih teinak an tuahpiakmi hna kha zoh ko u, maw Judah le Jerusalem hna,’ a ti. Nan thinphang hlah u, nan lungdong hlah u; thaizing ah chuahhnawh hna u law Bawipa cu nan sinah a um lai,” tiah a ti. *

18Cun Jehoshafat nih vawlei lei zoh in a lu a khun i Judah ram mi vialte le Jerusalem mi vialte kha Bawipa hmaiah an bawk i Bawipa kha an biak. 19Cun Levi mi Kohath pawl hna le Korah pawl hna kha Bawipa, Israel Pathian cu aw thang piin thangṭhat awkah an dir.

20Cun zingka tein an tho i Tekoa ramlak ah khan an va kal; cun an kal lioah khan Jehoshafat cu a dir i, “Judah ram mi hna le Jerusalem mi hna, ka bia thei tuah u! Bawipa nan Pathian cu zum u law fehter nan si lai; a profet hna kha zum hna u law nan hlawh a tling lai,” tiah a ti. 21Cun mizapi kha ruahnak a hal hna hnuah, puan thiang i aih in ralkapbu hmai i an kal pah ah:

22Cun annih nih hlasak le thangṭhat kha an thawk tikah Bawipa nih Ammon, Moab le Seir Tlang mi, Judah tuk awk i a rami hna kha lamhruang a ahter hna i cucaah an sung dih. 23Zeitintiah Ammon mi le Moab mi hna nih khan Seir Tlang mi kha an tuk hna i an hloh cikcek hna, cun Seir i a ummi hna cu an thah dih hna hnuah anmah le anmah cu an i nawng dih.

24Judah mi cu ramlak i ralvennak innsang kha an phak tikah, mibupi cu an hei zoh hna i zohhmanh, annih cu an thi i vawlei ah khan an ril liangluang ko; pakhat hmanh an luat lo. 25Cun Jehoshafat le a mi hna kha hranchaw lak awkah an rat tikah saṭil tampi, thilri, hnipuan man sungmi thilri, an hmuh hna i an i phorh khawh ti lo tiangin an i lak hna. Hranchaw laknak ah cun ni thum tiang an rau, a tam hringhran ko. 26A ni linak ni ah Berakal Nelrawn ah an i pum i khika ah Bawipa kha an thangṭhat; cucaah cuka hmun min cu nihin tiangin Berakah Nelrawn tiah ti a si. 27Cun annih cu, Judah ram mi le Jerusalem mi vialte cu, Jehoshafat nih a hmaisat hna i an tlung, Bawipa nih an ral hna cungah a lawmhter hna caah lunglawm in an tlung. 28Jerusalem ah, tingtang, thonglawi le muko he, Bawipa inn ah khan an ra. 29Cun Bawipa nih Israel mi hna i an ral cu a tuk hna ti an theih tikah ram kip mi nih Bawipa cu an ṭih. 30Cucaah a Pathian nih a velchum in dinhnak a pek caah Jehoshafat pennak cu a dai.

Jehoshafat Pennak

(1Sia 22.41-50)

31Cuticun Jehoshafat nih Judah ram cu a pen. Pen hram a thawk ah kum sawm thum le kum nga a ti i Jerusalem in kum kul le kum nga a pen. A nu min cu Azubah a si, Shilhi fanu a si. 32A pa Asa lam kha a zul i a pial tak lo; Bawipa mithmuh i a dikmi kha a tuah. 33Asinain khuahrum bo kha cu a hrawk hna lo; mi zapi nih khan an pupa hna Pathian cungah khan an lung an bunh rih lo.

34Jehoshafat tuahsernak a tang rihmi hna cu a hramthawk in a donghnak tiang, Hanani fapa Jehu ṭialmi chanrelnak chungah an um i cucu Israel Siangpahrang hna Cauk chungah khumh a si.

35Mah hi hnuah hin ṭhat lonak a tuahtu Israel siangpahrang Ahaziah he khan Judah siangpahrang Jehoshafat cu an i kom. 36Tarshish i a kal hnga ding tilawng kha an ser hna i tilawng cu Ezion-geber ah an ser hna. 37Cun Mareshah i a ummi Dodavahu fapa Eliezer nih Jehoshafat ralchanh in profet bia a chim i, “Ahaziah he nan i komh caah na ser ciami cu Bawipa nih a hrawh lai,” tiah a ti. Cun tilawng hna cu an rawk i Tarshish ah khan an kal kho lo.

⇑

[Remove Footnotes]