2Chanrelnak 23

1Sihmanhsehlaw a kum sarihnak kum ah Jehoiada cu a ral a hung ṭha i a zaza pawl haotu hna Jehoram fapa Azariah, Jehonan fapa Ishmael, Obed fapa Azariah, Adaiah fapa Maaseiah le Zikhri fapa Elishafat hna he khan biakamnak an tuah. 2Cun Judah ram chungah khan an i chawk i Judah ram chung khua vialte khan Levi mi hna le Israel innchungkhar i lu a si ciomi hna kha an pumh hna i Jerusalem ah an ra. 3Cun aa pummi vialte nih siangpahrang he Pathian inn chungah khan biakamnak an tuah. Cun Jehoiada nih a thawh hna i, “Zohhmanh u, siangpahrang fapa hi! Bawipa nih David fapa hna kong ah a chim bantuk khan amah hi ukter ko u. * 4Mah hihi nan tuah awk thil cu a si lai: Nannih tlangbawi le Levi mi sabbath ni i rian a ṭuanmi hna, cheu thum cheu khat cu kutka hngaktu nan si lai, 5cun cheu thum cheu khat cu siangpahrang inn ah nan um lai i cheu thum cheu khat cu Hram Kutka ah nan um lai; cun mi zapi vialte cu Bawipa inntual ah khan an um lai. 6Tlangbawi hna le rian a ṭuantu Levi mi hna dah ti lo cu ahohmanh Bawipa inn chungah lut hlah u; annih cu an thian caah an lut kho lai; sihmanhsehlaw zapi vialte nih cun Bawipa nawl kha an zulh awk a si lai. 7Levi mi hna nih an hriam kha i put cio in siangpahrang kha an kulh lai i inn chungah a lutmi paoh cu thah an si lai. Siangpahrang cu a luh a chuah tikah a sinah nan um lai,” tiah a ti.

Joash Cu Bawi Luchin An Chinh

(2Sia 11.9-12)

8Levi mi hna le Judah ram mi vialte hna nih khan tlangbawi Jehoiada nawl pek bang cun an tuah: an minung cio kha sabbath ni i rian a ngei ding he a ngei lo ding he khan an i ratpi hna; zeicahtiah Jehoiada nih khan rian thiahmi bu hna kha a ṭinter hna lo. 9Cun tlangbawi Jehoiada nih khan fei hna le phaw a ngan pawl le a hme pawl, Siangpahrang David ta a rak si i Pathian inn chungah an rak chiahmi hna kha, haotu pawl cu a pek hna; 10cun mizapi cu an dihlak in, an hriam kha i put cio ah, inn cu a thlanglei le a chaklei in kulh in, biakṭheng velchum le inn velchum ah cun, siangpahrang cawngtu ah a chiah hna. 11Cun siangpahrang fapa cu a rak chuahpi i bawi luchin cu a chinh i hngalhternak bia kha a pek; cun siangpahrang a si tiah an thanh i Jehoiada le a fapa hna nih khan chiti an thuh i, “Siangpahrang cu saupi nung ko seh!” tiah an ti.

12Athaliah nih mi zapi cu an tlik an choipah in siangpahrang an thangṭhat kha a hmuh tikah, Bawipa inn chungah mi zapi sinah khan a vung lut; 13cun a hei zoh tikah luhnak ka ah khan siangpahrang cu a tungpi pawng i a dir i siangpahrang pawngah cun haotu pawl le muko tumtu hna an um le ramchung mi vialte cu an i lawm i muko an tum i an hlasatu pawl hna nih an awdawh tumnak thilri hna he conglawmh tuahnak cu an hrui hna kha a hmuh. Cun Athaliah nih a puan kha a thleh hna i, “Rawinak a si! Rawinak a si!” tiah a au. 14Cun tlangbawi Jehoiada nih ralkapbu cung i thiahmi haotu pawl kha a rak chuahpi hna i, “Amah cu ralkap hna lak khan rak chuahpi u; ahohmanh amah a zulmi cu vainam in thah a si lai,” tiah a ti. Zeitintiah tlangbawi nih cun, “Amah, cu Bawipa inn chungah cun that hlah u,” tiah a ti hna. 15Cucaah an tlaih i siangpahrang inn Rang Kutka luhnak ah khan a lut i khika ah amah cu an thah.

16Cun Jehoiada nih amah le mizapi hna le siangpahrang karlak ah khan, annih cu Bawipa mi si awkah biakamnak a ser. 17Khi tikah mi vialte cu Baal inn ah khan an va kal i an ṭheh i a biakṭheng hna le a milem hna cu an khuai dih hna; cun Baal tlangbawi Mattan kha biakṭheng hna hmaiah cun an thah. 18Cun Moses phungbia chungah aa ṭial bangin, lawmhpah le hlasak pah in David nawl pekning in Bawipa sin i khangh thawinak pekchanh awkah David nih Bawipa inn zohkhenhtu ah a chiahmi Levi tlangbawi hna le Levi mi hna kut tangah khan, Jehoiada nih Bawipa inn cawngtu kha a chiah hna. 19Ahohmanh zei bantuk thian lonak hmanh in a thiang lomi paoh cu an luh nakhnga lo, Bawipa inn kutka ah khan kutka hngaktu a chiah hna. 20Cun ralbawi pawl le tuavon pawl le mi a uktu hna le ramchung mi vialte kha a lak hna i annih nih siangpahrang cu Bawipa inn khan an runpi i cunglei kutka khan siangpahrang inn ah an ra. Cun siangpahrang cu siangpahrang bawi ṭhutdan cungah khan an ṭhutter. 21Cucaah ram chungah mi vialte cu an i lawm; Athaliah kha vainam in an thah hnuah cun khua kha a dai.

⇑

[Remove Footnotes]