2Chanrelnak 26

Uzziah Pennak

(2Sia 15.1-7)

1Cun Judah ram mi vialte nih khan kum hleiruk a timi Uzziah kha an lak i a pa Amaziah hmun ah khan siangpahrang ah an ser. 2Siangpahrang cu a pupa hna sinah a ih hnuah Eloth kha a sak i Judah ta ah a siter ṭhan. 3Uzziah cu pen hram a thawk ah kum hleiruk a si i Jerusalem in kum sawm nga le kum hnih a pen. A nu min cu Jekoliah a si, Jerusalem mi a si. 4Cun a pa Amaziah nih a rak tuahmi vialte bantuk khan, Bawipa mithmuh ah a dikmi kha a tuah. 5 Bawipa ṭihnak kha a cawnpiaktu Zekhariah chan ah khan, Pathian kawl kha aa sehchih i Bawipa a kawl chung vialte cu Pathian nih khua awng a pemhter.

6A chuak i Filistin mi kha a doh hna i Gath kulhnak vampang le Jabneh kulhnak vampang le Ashdod kulhnak vampang kha a chimh dih hna; cun Ashdod ram chung le Filistin mi hna lak hmun dang ah khan khua a ser hna. 7Pathian nih, Filistin mi hna le Gurbaal i a ummi Arab mi hna le Meunim mi hna lakah khan amah cu a bawmh. 8Ammon mi hna nih Uzziah cu ngunkhuai an pek i amah cu a ṭhawn ngaingai caah Izipt ramri tiang hmanh in a min a thang. 9Cuhleiah Jerusalem ah cun Kil Kutka le Nelrawn Kutka le kulhnak vampang a kawinak ah khan innsang a sak hna i a kulh hna. 10Cun chimram le nelrawn ah khan saṭil run tampi a ngeih caah ramlak ah khan innsang a sak hna i tikhor tampi a cawh hna, cun lothlawh a duh ngaingaimi a si caah tlangram le vawlei ṭhatnak hmun ah khan lothlo le mitsur nengtu kha a chiah hna. 11Cuhleiah, Uzziah nih cun, siangpahrang ralbawi hna lak i pakhat Hananiah kut tang i a ummi ralkapbu, raltuk awk i a tlakmi, caṭialtu Jeiel le ralbawi Naaseiah nih an bu chung cio minung zat ningin an ṭhenmi hna cu a ngei. 12Miṭhawngmi ralṭha hna, an pale innchungkhar hna an lu cio cu an dihlak ah thong hnih le za ruk an si. 13Anmah kut tangah cun siangpahrang kha a ral hna tuk awkah a bawm khotu, raltuknak i a ṭhawng ngaingaimi ralkap sing thum thong sarih le za nga an um. 14Cun Uzziah nih ralkap vialte caah cun phaw, fei, luchin, ngaphaw thir angki, li, le chehnak ah lung kha a timh hna. 15Cun thal le lung ngan pipi a kap khotu seh zungthiam pawl nih an sermi hna kha, Jerusalem ah cun innsang le a kil ah khan a chiah hna. Cun amah cu a ṭhawn tiang khuaruahhar in bawmh a si caah a min cu khuazakip ah a thang.

16Sihmanhsehlaw a hung ṭhawn tikah aa rawknak dingah a hun i porhlaw. Bawipa a Pathian sinah zumhtlak loin a um i zihmui biakṭheng i zihmui khangh awkah khan Bawipa biakinn ah cun a lut. 17Sihmanhsehlaw tlangbawi Azariah nih Bawipa tlangbawi a ral a ṭhami sawm riat he a hnu in an zulh; 18cun Siangpahrang Uzziah cu an donh i, “Uzziah, nangmah nih Bawipa sinah zihmui khangh cu na tuah awk a si lo, sihmanhsehlaw Aaron fapa hna tlangbawi hna zihmui khangtu ding i thiantermi hna lawnglawng nih khan an tuah awk a si. Thil hmaan lo na tuah caah hmunthiang chung hin chuak tuah, cun hi nih hin Bawipa Pathian sinin upatnak zeihmanh an tlunh lai lo,” tiah an ti. * 19Khi tikah Uzziah cu a thin a hung. Zihmui khanghnak ding cengceh pakhat aa put i tlangbawi hna cungah a thin a hun tikah khan, Bawipa inn chung, zihmui biakṭheng pawng, tlangbawi hna hmaika ah khan a cal ah thinghmui hma a chuak ko. 20Cun tlangbawi upa bik Azariah le tlangbawi vialte nih khan amah cu an zoh i zohhmanh, amah cu a cal ah thinghmui zawtnak a ngei! Cun annih nih khulrang in an nam i amah zong kha chuah aa nam ve, zeicahtiah Bawipa nih a tuk cang. 21Cun Siangpahrang Uzziah cu a thih ni tiang thinghmui a si lan, cun thinghmui a si caah khan Bawipa inn khan thlei a si i cucaah inn dang ah a um. Cun a fapa Jotham nih cun siangpahrang innchungkhar cu a zohkhenh i ram mi kha a uk hna.

22Uzziah tuahsernak a tang rihmi hna cu a hramthawk in a donghnak tiang profet Isaiah, Amoz fapa nih a ṭial. 23Cun Uzziah cu a pupa hna sinah a it i, “Amah cu mithinghmui a si caah siangpahrang hna thlan ah vui loin siangpahrang hna thlanmual ah khan a pupa hna sinah an vui. Cun a fapa Jotham cu amah hmun ah khan a hung bawi. *

⇑

[Remove Footnotes]