2Chanrelnak 27

Jotham Pennak

(2Sia 15.32-38)

1Jotham cu pen hram a thawk ah kum kul le kum nga a ti i Jerusalem in kum hleiruk a pen. A nu min cu Jerushah a si, amah cu Zadok fanu a si. 2A pa Uzziah nih a tuahmi vialte ning khan Bawipa mithmuh ah thil dik kha a tuah — Bawipa biakinn bel kha a luhhnawh lo. Sihmanhsehlaw mi zapi nih khan ṭhat lonak kha an tuah lengmang ko. 3 Bawipa inn cunglei kutka kha a ser i Ofel vampang cungah khan inn tampi a sak. 4Cuhleiah Judah tlangram ah khan khua a ser hna i thing hmawnnak tlang ah khan ralhruang le innsang a sak hna. 5Ammon mi hna siangpahrang he khan an i do i a tei hna. Cun cu kum ah cun Ammon mi hna nih, ngun talen za khat le changvut phor thong hra le barli phor thong hra an pek. Ammon mi nih cu zat ṭhiamṭhiam cu a kum hnihnak le a kum thumnak ah an pek. 6Jotham cu a kalning kha Bawipa a Pathian hmaiah a ningcang tein a tuah caah miṭhawng ah a cang. 7Jotham tuahsernak a tang rihmi hna le a raldohnak vialte le a kalning hna cu, zohhmanh, Israel le Judah Siangpahrang hna Cauk chungah an i ṭial. 8Pen hram a thawk ah kum kul le kum nga a si i Jerusalem in kum hleiruk a pen. 9Cun Jotham cu a pupa hna sinah a it i David khua ah an vui; cun a fapa Ahaz cu amah hmun ah khan a hung bawi.

⇑

[Remove Footnotes]