2Chanrelnak 32

Sennakherib Nih A Tuk Hna

(2Sia 18.13-37; Isa 36.1-22)

1Hi thil vialte le hi bantukin zumhtlak tein a tuahmi hnuah hin, Assiria siangpahrang Sennakherib cu a ra i Judah cu a chim i kulhmi khua kha a riahhnawh hna i ka tei hna lai tiah aa ruah. 2Cun Sennakherib cu a ra cang i Jerusalem tuk kha aa tim ti kha Hezekiah nih a hmuh tikah, 3khuapi leng i a ummi cerhti kha a bawi hna le a miṭhawng hna he phih aa tim, annih nih cun an bawmh. 4Mi tampi kha an i pum i ram chung i a luangmi cerh hna le tiva tete hna kha an phih hna i, “Zeicahdah Assiria siangpahrang hna cu an rat lai i ti tampi an hmuh lai?” tiah an ti. 5Rianṭuan awkah khan lung fek tein aa tim i a cimmi vampang kha a remh i a cungah innsang a sak i a lengah vampang dang pakhat a ser ṭhan; cun David khua i Millo kha fek chin in a tuah. Cun hriamnam le phaw kha tampi a ser hna. 6Cun mi zapi cungah khan raltuknak lei ralbawi a chiah hna i khua kutka i a ummi tual ah khan amah sinah cun a pumh hna i lung ṭhawnnak in bia a chimh hna i, 7“Ṭhawng u law nan ralṭha ko u. Assiria siangpahrang le a sinah a ummi mibu cu ṭih hna hlah u law nan lung zong dong hlah seh; zeicahtiah a ngan deuhmi pakhat a sin i a um lomi kan sinah a um. 8Amah sin i a ummi cu titsa hriamnam a si, sihmanhsehlaw kan sin i a ummi cu Bawipa kan Pathian a si, amah nih a kan bawmh lai i kan ral hna cu a kan dohpiak lai,” tiah a ti. Cun Judah siangpahrang Hezekiah bia cun mi nih zumhnak an i lak.

9Hi hnuah hin, Assiria siangpahrang Sennakherib le a ralkap vialte hna cu Lakhish i an um lioah Jerusalem i a ummi Judah siangpahrang Hezekiah le Judah mi hna sinah cun sinum kha a hei thlah hna. 10“Assiria siangpahrang Sennakherib nih, ‘Zeidah nan i bochan i Jerusalem ah hin hrennak hi naa in ko? 11Hezekiah nih hin, “ Bawipa kan Pathian nih Assiria siangpahrang kut chungin a kan chuah lai,” tiin a ti tikah hin a pingah an hruai hna a si lo maw? 12Hi Hezekiah ṭhiamṭhiam nih hin a si lo mei a khuahrum bo hna le a biakṭheng hna kha a hlonh hna i Judah le Jerusalem cu, “Biakṭheng pakhat hmaiah nan biak lai i cu cungah cun nan raithawinak hna kha nan khangh lai,” a ti kha. 13Ramdang hna an mi cungah keimah le ka pupa hna nih zeidah kan tuah ti kha nan thei lo maw? Khi ram hna i a ummi miphun hna pathian hna nih khan an ram cu ka kut chungin an chanh khawh hna maw? 14Nan Pathian nih hin ka kut chungin an chuah khawh hna nakhnga ah hin, ka pa nih a hrawh cikcekmi miphun hna i an pathian hna lakah khan aho tal nih a miphun cu ka kut chungin a chuah kho hna maw? 15Cucaah Hezekiah cu hi bantukin i hlenter hlah u law a pingah i hruaiter hlah u, cun amah kha zum hlah u, zeicahtiah mi zei miphun pathian siseh, zei ram pathian siseh, ka pupa hna kut chungin siseh keimah kut chungin siseh a mi a chanh khotu hna an um lo. Zeitindah nan Pathian chinchin nih cun ka kut chung cun an chuah khawh hna lai!’ a ti,” tiah an ti.

16A sinum hna nih khan Bawipa Pathian le a sal Hezekiah cu an bia in an ti chinchin rih hna. 17Cun Bawipa, Israel Pathian kha nihsawh awk le zawmhtaih awkah ca a ṭial i, “Ram chung i a ummi miphun hna pathian hna, ka kut chungin an mi hna a chuah kho lotu hna bantuk khan Hezekiah Pathian nih hin a mi hna cu ka kut chungin a chuah kho hna lai lo,” tiah a ti. 18Khua kulhnak vampang cung i a ummi Jerusalem mi hna kha an thin a phan i an tha a ther i khuapi cu an lak khawh nakhnga, mah cucu Judah holh in an auhnawh hna. 19Cun vawlei cung miphun hna pathian, mi kut sermi a simi hna an ti hna bantuk khan Jerusalem khua Pathian cu an ti ve.

Bawipa Nih Hezekiah A Khamh

(2Sia 19.1-37; Isa 37.1-38)

20Khi tikah Siangpahrang Hezekiah le Amoz fapa profet Isaiah kha hi ruangah hin thla an cam i van leiah an au. 21Cun Bawipa nih vancungmi pakhat a thlah i Assiria siangpahrang riahhmun i a ṭhawngmi ralkap hna le haotu hna le bawi vialte hna kha a thah hna. Cucaah hmaichia in amah a ram ah a kir ṭhan. Cun a pathian inn chung i a luh tikah khan amah fapa hna lila nih khan vainam in an thah. 22Cuticun Bawipa nih Hezekiah le Jerusalem khuami hna cu Assiria siangpahrang Sennakherib kut chung le a ral vialte hna kut chung khan a khamh hna i a kenkip ah dinhnak a pek hna. 23Cun mi tampi nih Bawipa sinah Jerusalem ah khan laksawng an rak put i Judah siangpahrang Hezekiah sinah khan thil man sung an rak put hna, cucaah cu caan thawk in hmailei ah cun miphun vialte hna mithmuh ah khan hlorh a si.

Hezekiah Zawtnak

(2Sia 20.1-4; Isa 38.1-22)

24Cu caan ah cun Hezekiah cu a zaw i a thi dengmang i Bawipa sinah khan thla a cam; cun amah cu a leh i hmelchunhnak a pek. 25Sihmanhsehlaw Hezekiah cu a lung in aa porhlawt caah a cung i ṭhathnemnak a tuahmi caah khan aa lawm lo. Cucaah amah le Judah le Jerusalem cungah thinhunnak a tlung. 26Sihmanhsehlaw a lung porhlawtnak kha Hezekiah cu aa ṭhum ṭhan i amah he Jerusalem mi hna he an i ṭhumh caah Bawipa thinhunnak cu an cungah Hezekiah chan ah khan cun a tlung lo.

Hezekiah Rumnak le Sunparnak

(2Sia 20.12-19; Isa 39.1-8)

27Hezekiah cu rumnak le upatnak tampi a ngei; cun ngun le sui le lung mansung le zihmui le phaw le a man a sungmi umkheng phun zakip caah chiahnak aa ser hna; 28rawl a chuakmi le mitsur hang le chiti ca i khonnak inn hna le caw phunphun caah caw inn hna le tuu kawm hna kha aa ser hna. 29Cu bantuk ṭhiamṭhiam in khua kha aa serh hna i tuurun le cawrun cu tampi a ngeih hna zeicahtiah Pathian nih ngeihmi tampi a pek. 30Hi Hezekiah ṭhiamṭhiam nih hin Gihon ti cunglei i a chuahnak kha a phih hna i David khua nitlaklei kamah khan a vun luanter hna. Cun Hezekiah cu a rian paoh ah khua awng a tong. 31Cucaah Babilon bawi hna nih, ram chung i tuahmi hmelchunhnak va hlathlai awk i a sinah an thlahmi lamkal hna kong ah khan, amah cu hneksak awk le a lung chung i a ummi vialte hngalhnak ah, Pathian nih amah tein a thlah ko.

Hezekiah Thihnak

(2Sia 20.20-21)

32Hezekiah tuahsernak a tang rihmi hna le thil ṭha a tuahmi hna cu, zohhmanh, Judah le Israel Siangpahrang hna Cauk chung i a ummi Amoz fapa profet Isaiah nih langhnak a hmuhmi hna chungah a ṭial. 33Cun Hezekiah cu a pupa hna sinah a it i David fapa hna thlan kainak ah khan an vui; Judah ram mi vialte le Jerusalem mi hna nih khan a thih ah cun upatnak an pek. Cun a fapa Manasseh cu amah hmun ah khan a hung bawi.

⇑

[Remove Footnotes]