2Chanrelnak 33

Manasseh Pennak

(2Sia 21.1-18)

1Manasseh cu pen hram a thawk ah kum hleihnih a si i Jerusalem in kum sawm nga le kum nga a pen. 2 Bawipa nih Israel mi hna hmai in a dawimi hna miphun hna phunglam fihnungmi ning khan Bawipa mithmuh ah ṭhat lonak a tuah. * 3Zeicahtiah a pa Hezekiah nih a rak hrawhmi khuahrum bo kha a ser ṭhan hna i Baal caah khan biakṭheng a ser hna i Asherah hna kha a ser hna i van i a ummi thil vialte kha a biak hna i an rian a ṭuan hna. 4 Bawipa nih, “Jerusalem khua ah hin ka min cu zungzal in a um lai,” tiah a rak timi, Bawipa inn chungah khan biakṭheng a ser hna. * 5Cun Bawipa inn tual pahnih chungah khan vancung thil vialte caah khin biakṭheng a ser hna. 6Cun Hinnom fapa nelrawn ah khan a fapa hna cu raithawinak ah a khangh hna i khuavang kawh le litin le eih kha a lenh i thitlawnthiam le khuavang kha aa ruaih tawn hna. Bawipa mithmuh i thil ṭhalo tampi kha a tuah i a thin kha a phawh. 7Cun amah nih a sermi siasal milem cu Pathian inn chungah khan a chiah. Cun inn kongah cun Pathian nih David le a fapa Solomon sinah khan, “Israel phun dihlak chungin ka thimmi Jerusalem le hi inn chungah hin zungzal in ka min cu ka chiah lai; * 8cun Israel mi nih Moses in nawl ka pekmi vialte hna le phungbia vialte hna le nawlbia hna le phunglam hna kha tuah awkah an i ralrin ahcun an pupa hna caah ka chiah cangmi ram chungah hin an ke kha ka ṭhial ti hna lai lo,” tiah a rak ti. 9Manasseh nih Judah le Jerusalem mi cu a lem khawh hna caah Israel mi hmai i Bawipa nih a hrawhmi miphun hna nakkhan ṭhat lonak tam deuh an tuah.

10 Bawipa nih Manasseh le a mi hna sinah khan bia a chim ko nain zeihmanh ah an rel lo. 11Cucaah Bawipa nih an cungah Assiria siangpahrang ralkapbu ralbawi kha a ratpi hna i annih nih Manasseh cu sio in an sio i dar hreng an khenh i Babilon ah an kalpi. 12Cun harnak a phak tikah Bawipa a Pathian zaangfahnak kha a nawl i a pupa hna Pathian hmaiah khan fak piin a lung aa ṭhum. 13Amah sinah khan thla a cam i Pathian nih a nawlnak kha a cohlan i a thlacamnak kha a theih i amah ram Jerusalem ah khan a kirpi ṭhan. Khi tikah Manasseh nih Bawipa cu Pathian a si kha a hngalh.

14Cun a hnuah David khua lengah khan Gihon nitlaklei nelrawn ah, Nga Kutka luhnak tiangin vampang a ser i Ofel kha a kulhter i sangpi ah a cawi; cun Judah ram chung khua hna ah khan ralkapbu haotu a chiah fawn hna. 15Cun ramdang pathian hna le siasal kha Bawipa inn khan a ṭhial hna i Bawipa inn umnak tlang le Jerusalem i a sermi biakṭheng vialte kha khua lengah a hlonh dih hna. 16 Bawipa biakṭheng zong kha a chiah ṭhan i a cungah cun daihnak thawinak hna le lawmhnak thawinak hna kha a pekchanh hna i Bawipa, Israel Pathian cu a rian nan ṭuan lai, tiah Judah mi kha nawl a pek hna. 17Mi nih cun khuahrum bo hna ah khan rai cu an thawi ko rih, asinain, Bawipa an Pathian sin lawnglawng ah khan a si cang.

18Manasseh tuahsernak a tang rihmi hna le a Pathian sin i thla a camnak le Bawipa, Israel Pathian min in a sinah bia a chimtu hmutu hna bia cu, zohhmanh, Israel Siangpahrang hna Chanrelnak chungah an um. 19A thlacamnak Pathian nih a nawlnak a cohlanpiakning le a lung a ṭhumh hlan i a sualnak vialte le zumhtlaklo a sinak le khuahrum bo a ser i Asherim le milem hna a chiahnak hmun hna kha, zohhmanh, Hmutu hna Chanrelnak chungah an i ṭial. 20Cuticun Manasseh cu a pupa hna sinah a it i amah a inn ah khan an vui; cun a fapa Amon cu amah hmun ah khan a hung bawi.

Amon Pennak

(2Sia 21.19-26)

21Amon cu pen hram a thawk ah kum kul le kum hnih a si i Jerusalem in kum hnih a pen. 22A pa Manasseh nih a rak tuah bantuk khan Bawipa mithmuh i thil ṭhalo kha a tuah. A pa Manasseh nih a rak sermi milem dihlak sinah khan raithawinak a tuah i an rian a ṭuan hna. 23A pa Manasseh nih a lung a ṭhumh bangkhan Bawipa hmaiah a lung a ṭhum lo i hi Amon nih hin cun mawhnak kha tam chin lengmang a tuah. 24Cun a sinum hna nih an rawi i amah inn chungah an thah. 25Sihmanhsehlaw ramchung mi nih khan Amon a rawitu vialte kha an thah hna i ramchung mi nih khan a fapa Josiah cu amah hmun ah khan siangpahrang ah an ser.

⇑

[Remove Footnotes]