SIANGPAHRANG PAHNIHNAK

2 Kings

Biahmaiṭhi

Siangpahrang Pahnihnak nih hin Israel Pennak pahnih hna kong ṭhiamṭhiam kha a peh. Hi cauk hi ṭhen hnih ah ṭhen khawh a si:

1. B.C. 850 in Samaria ra rawh tiang le B.C. 721 i Chaklei Pennak a dongh tiang.

2. Israel Pennak a rawh in Babilonia siangpahrang Nebukhadnezzar nih B.C. 586 ah Jerusalem khua a hrawh tiang.

Siangpahrang Pahnihnak hi Babilon cozah nih Gedaliah kha Judah ram mangki ah an chiah i Judah siangpahrang Jehoiachin kha Babilon ram chung i thong ah an chiahnak in an chuahnak tiang a si.

Hi bantukin an miphun cungah rawhralnak a tlun cu Israel mi le Judah mi hna le an siangpahrang hna kha Pathian sinah zumhawktlak loin an um caah a si. Jerusalem a rawh le Judah mi sal ah ramdang ah an kalpi hna hi Israel miphun tuanbia ah hin biapi ngaingai a simi thil pakhat a si.

Siangpahrang Pahnihnak cauk chungah hin minthang profet cu Elijah a hun changtu Elisha kha a si.

Tlangpi Hna
Pennak cheunak 1.117.41
     a. Profet Elisha 1.18.15
     b. Judah siangpahrang hna le Israel siangpahrang hna 8.1617.4
     c. Samaria rawhnak 17.5-41
Judah pennak 18.125.30
     a. Hezekiah in Josiah tiang 18.121.26
     b. Josiah pennak 22.123.30
     c. Judah siangpahrang hmanung bik hna 23.3124.20
     d. Jerusalem rawhnak 25.1-30

2Siangpahrang 1

Siangpahrang Ahaziah le Elijah

1Ahab thih hnuah Moab nih Israel kha a doh.

2Ahaziah cu Samaria khua i a innkhaan cung nung i thing kharvar thlalangawng khan a tla i a kuah ko; cucaah lamkal kha a thlah hna i, “Va kal u law, Ekron khua pathian Baal-zebub kha, hi zawtnak hin ka dam ṭhan lai maw dam ṭhan lo, va hal tuah u,” tiah a chimh hna. 3Sihmanhsehlaw Tishbemi Elijah cu Bawipa vancungmi nih a thawh i, “Tho law, Samaria siangpahrang lamkaltu hna ton awkah hung kal tuah, annih cu, ‘Israel ram chungah Pathian a um lo caah maw nannih Ekron khua pathian Baal-zebub cu hal awkah nan kal?’ tiah hung ti hna. 4Cucaah Bawipa nih hi bangin, ‘Na hung kainak ihkhun khan na ṭum ṭhan lai lo, na thi hrimhrim lai,’ a ti,” tiah a ti. Cucaah Elijah cu a kal.

5Lamkal hna cu siangpahrang sinah an kir ṭhan i anih nih annih cu, “Zeicahdah nan kir?” tiah a ti hna. 6Cun annih nih amah cu, “Kannih ton awkah khan mipa pakhat a ra i kannih cu a kan thawh i, ‘An thlahtu hna siangpahrang sinah khan va kir u law amah cu, ‘Hi bangin Bawipa nih a ti, Israel ram chungah Pathian a um lo caah maw Ekron khua pathian Baal-zebub kha va hal awkah mi na thlah hna? Cucaah na hung kainak ihkhun khan na ṭum ti lai lo, sihmanhsehlaw na thi hrimhrim lai,’ a ti tiah va chim u a kan ti,” tiah an ti. 7Annih cu a thawh hna i, “Nannih ton awkah a ra i hi thil an chimtu hna cu zei bantuk mi dah a si?” a ti. 8Annih nih an leh i, “Sahmul puan aa aih i a tai ah saphaw taisawm aa sawmh,” tiah an ti. Cun anih nih, “Tishbemi Elijah kha a si cu ta,” tiah a ti. *

9Khi tikah siangpahrang nih ralkap sawm nga haotu kha a mi sawm nga he cun a thlah. Tlangpar i a ṭhu komi Elijah sinah cun a hung kal i, “Maw Pathian mi, siangpahrang nih, ‘Rung ṭum seh,’ an ti,” tiah a ti. 10Sihmanhsehlaw sawm nga haotu cu Elijah nih a leh i, “Keimah cu Pathian mi ka si a si ahcun, vancung khin mei rung tla seh law nangmah le na sawm nga kha in kangh dih hna seh,” tiah a ti. Cun mei cu vancung in a rung tla i amah le a sawm nga hna cu a kangh hna. *

11Cun siangpahrang nih ralkap sawm nga haotu a dang pakhat le a mi sawm nga kha a thlah ṭhan hna. Cun a hung kal i amah cu, “Maw Pathian mi, mah hihi siangpahrang nawlbia a si, ‘Khulrang tein rung ṭum tuah!” tiah a ti. 12Sihmanhsehlaw Elijah nih a leh i, “Keimah cu Pathian mi ka si ahcun, vancung in mei rung tla seh law, nangmah le na sawm nga kha in kangh hna seh,” tiah a ti. Khi tikah Pathian mei kha a rung tla i amah le a sawm nga kha a kangh hna.

13Cun siangpahrang nih ralkap sawm nga pawl phu thumnak a haotu le a mi sawm nga kha a thlah ṭhan hna. Cun sawm nga haotu pathumnak cu a kal i Elijah hmaiah cun a ra i a bawk i, “Maw Pathian mi, keimah ka nunnak le hi na sal mi sawm nga an nunnak hi na hmaiah a sungmi si ko seh. 14Zohhmanh, vancung in mei a rung tla i ralkap sawm nga haotu pahnih hna kha an ralkap sawm nga veve he khan a rak kangh hna; sihmanhsehlaw atu cu ka nunnak cu na mithmuh ah a sungmi si ko seh,” tiah a ti. 15Cun Pathian vancungmi nih Elijah cu a thawh i, ‘Amah he cun vung kal ko; amah cu ṭih hlah,” tiah a ti. Cucaah a tho i siangpahrang sinah cun amah he khan an vung kal, 16cun anih nih a thawh i, “ Bawipa nih hi bangin, ‘Nangmah nih Ekron khua pathian Baal-zebub cu va hal awkah lamkal na thlah hna caah, — mah cucu Israel ram ah hin hal awk Pathian a um lo caah maw a si? — cucaah na hung kainak ihkhun khan na ṭum ti lai lo, sihmanhsehlaw na thi hrimhrim lai,’ a ti,” tiah a ti.

17Cuticun Elijah nih a chimmi Pathian bia ningin amah cu a thi. Cun Ahaziah nih khan fapa a ngeih lo caah, Judah siangpahrang Jehoshafat fapa Jehoram a bawi kum hnihnak ah khan, a unau Joram cu amah hmun ah khan siangpahrang a cang. 18Ahaziah nih a tuahsernak a tang rihmi hna cu, Israel Siangpahrang hna Chanrelnak Cauk chungah an i ṭial lo mei?

⇑

[Remove Footnotes]