2Siangpahrang 22

Josiah Pennak

(2Cha 34.1-2)

1Josiah cu bawi hram aa thawk tikah kum riat a si i Jerusalem in kum sawm thum le kum khat a bawi. A nu min cu Jedidah a si, amah cu Bozkath khuami Adaiah fanu a si. * 2Cun Bawipa mithmuh ah a dikmi thil kha a tuah i a pu David lam kha a zul, orhlei ah siseh, kehlei ah siseh a pial lo.

Phungbia Cauk An Hmuh

(2Cha 34.8-38)

3Siangpahrang Josiah a bawi kum hleiriatnak ah Meshullam fapa Azaliah i fapa Shafan, caṭialtu kha, Bawipa inn ah a hei thlah i, 4“Tlangbawi ngan Hilkiah sinah khan hung kal law innleng cawngtu hna nih mi zapi sinin an lakmi tangka Bawipa inn chung i luhpi a simi kha zeizat dah a si tiah rak rel seh; 5cun Bawipa inn zohkhenhtu rianṭuantu hna kut chungah rak pe seh; cun annih nih Bawipa inn a remh lengmangtu, 6lehtama hna le inn satu hna le lung lei zungthiam hna kha rak pe hna seh, cun inn remhnak ca i thingah le khoihmi lung cawknak caah khan a si fawn lai. 7Sihmanhsehlaw annih nih lihchim lo tein an ṭuan caah an kut chung i pekmi tangka kha zeitindah an hman tiah tuakpiak ṭhan an si lai lo,” tiah a ti.

8Cun tlangbawi ngan Hilkiah nih caṭialtu Shafan kha, “ Bawipa inn chungah phungbia cauk kha ka hmuh,” tiah a rak chimh. Cun Hilkiah nih cauk cu Shafan kha a pek i a rel. 9Cun caṭialtu Shafan cu siangpahrang sinah a ra i siangpahrang cu, “Inn chung i a ummi tangka cu na sal hna nih an bungh i Bawipa inn a zohkhenhtu rianṭuantu hna kut chungah khan an chanh cang,” tiah a chimh. 10Cun caṭialtu Shafan nih cun siangpahrang cu, “Tlangbawi Hilkiah nih cauk pakhat a ka pek,” tiah a ti. Cun Shafan nih Siangpahrang hmaiah cun a rel.

11Cun siangpahrang nih phungbia cauk chung bia cu a theih tikah a puan kha a thleh hna. 12Cun siangpahrang nih tlangbawi Hilkiah le Shafan fapa Ahikam le Mikaiah fapa Akbor le caṭialtu Shafan le siangpahrang sinum Asaiah kha nawl a pek hna i, 13“Va kal u law hi cauk hmuhmi chungbia kong ah hin Bawipa cu, keimah ca le mi zapi ca le Judah vialte caah, va hal tuah u; zeicahtiah, kan pupa hna nih hi cauk chung i aa ṭialmi bia, kannih ca i aa ṭialmi bia vialte ning khan an rak tuah lo caah Bawipa thinhunnak kan cung i a alhmi cu a ngan ko,” tiah a ti.

14Cucaah tlangbawi Hilkiah le Ahikam le Akbor le Shafan le Asaiah kha nu profet Huldah, hnipuan chiahnak zohkhenhtu Harhas fapa Tikvah i fapa Shallum nupi, sinah khan an va kal (amah cu Jerusalem khua chungah Sang Hnihnak ah khan a um); cun amah cu bia an ruah. 15Cun anih nih annih cu, “ Bawipa, Israel Pathian nih hi bangin a ti, ‘Ka sinah an thlahtu hna hi, 16Hi bangin Bawipa nih a ti, zohhmanh, Judah siangpahrang nih cauk chung bia a relmi vialte kha, hi hmun cung le a chung i a ummi cungah ṭhat lonak ka tlunter lai, 17annih nih an ka hlawt i pathian dang hna sinah khan zihmui an khangh i annih nih ka thinphawhnak caah an kut in hi rian vialte kha an tuah caah hi hmun cungah hin ka thinhunnak cu a alh lai i a mit lai lo. 18Sihmanhsehlaw Bawipa hal awkah an thlahtu hna Judah siangpahrang tu cu, hi bangin nan va chimh lai. Hi bangin Bawipa, Israel Pathian nih a ti: Bia na theihmi kong ah, 19hi hmun le hika i a ummi hna cu an ṭiao lai i chiatserhnak an ing lai ti in ka chimmi bia kha na theih tikah na lung cu aa ngaihchih i Bawipa hmaiah toidor in na um ca le na hnipuan na thleh hna i ka hmai i na ṭah caah, kei zong nih na bia cu kan theihpiak ve, tiah Bawipa nih a ti. 20Cucaah zohhmanh, nang cu na pupa hna sinah kan pumh lai i dai tein thlankhor na phan lai, cun hi hmun cung i ṭhat lonak ka tlunter laimi hi na mit nih a hmu lai lo,’ a ti, tiah chim hna, a ka ti,” tiah a ti. Cun siangpahrang sinah cun bia cu an hei lanhpi.

⇑

[Remove Footnotes]