2Siangpahrang 23

Josiah Nih Siasal Biaknak A Hlonh

1Cun siangpahrang nih khan mi a thlah hna i Judah le Jerusalem upa vialte cu a sinah an i pum. 2Cun siangpahrang cu Bawipa inn ah khan a hung kal i a sinah cun Judah ram mi vialte le Jerusalem khuami vialte le tlangbawi hna le profet hna le, mi vialte, a hme siseh a ngan siseh, an kal ve; cun Bawipa inn chung i hmuhmi biakamnak cauk chung bia vialte kha an theihhngan ah a rel dih. 3Cun siangpahrang cu tungpi hram ah khan a dir i, Bawipa kha zulh i a nawlbia hna le a hngalhternak bia hna le a phungbia hna kha a lungthin dihlak le a nunnak dihlak in zulh awk le hi cauk chungah aa ṭialmi biakamnak bia hna kha tuah awkah Bawipa hmaiah khan bia aa kam; cun mi vialte nih khan a tuahmi biakamnak cu an tuahpi ve.

Josiah Nih Remnak A Tuah

4Cun siangpahrang nih tlangbawi ngan Hilkiah le a niam deuhmi tlangbawi hna kha le innleng cawngtu hna kha Bawipa biaknak inn chungin Baal le Asherah le van i a ummi thil hna ca i sermi umkheng vialte kha chuah dih awkah a fial hna; Jerusalem khua leng Kidron lo chungah khan a khangh hna i an vutcam cu Bethel ah a kalpi hna. * 5Cun Judah siangpahrang hna nih Judah ram chung khua hna le Jerusalem kiangkap i a ummi khua hna khuahrum bo i zihmui khangtu ah an rak fehtermi siasal-tlangbawi kha, a phuah hna; Baal sinah siseh, ni sinah siseh, thlapa sinah siseh, arfibu sinah siseh, van i a ummi thil vialte hna sinah siseh, zihmui a khangtu tlangbawi hna zong kha a phuah hna. 6Cun Bawipa inn chung khan Asherah kha a chuah i Jerusalem khua lengah Kidron tiva ah a kalpi, Kidron tiva ah cun a khangh i dip lak in a den cikcek i a dip cu mi zapi thlan cungah a thlet. 7Biaknak lei hlawhhlang an umnak inn, Bawipa inn chung i a ummi kha a hrawh hna; cuka ah cun khi nu hna nih khan Asherah caah puan an tak. 8Cun Judah ram khua hna khan tlangbawi vialte kha a chuah hna i tlangbawi nih zihmui an khanghnak khuahrum bo vialte kha, Geba in Beersheba tiang a thurhnawmhter dih hna; khua uktu bawi Joshua kutka luhnak i a ummi kutka khuahrum bo khuapi kutka vung luh i cakeh lei ah a ummi hna kha a chimh dih hna. 9Sihmanhsehlaw khuahrum bo tlangbawi hna cu Jerusalem i Bawipa biakṭheng ah khan cun an hung kal lo, an unau hna sinah khan thilnu phulh lo changreu kha an ei. 10Cun Hinnom fapa hna horkuang i a ummi Tofeth kha, khika ah ahohmanh nih an fapa si hna seh an fanu si hna seh, Molek sin i thawinak ah an pekchanh hna nakhnga lo, a thurhnawmhter. * 11Cun Bawipa inn luhnak i a inn kulh chung i bawi inn zohtu Nathan-melek khaan pawng i Judah siangpahrang hna nih ni ca i rang an pekchanhmi hna cu a ṭhial hna i ni rangleng hna cu mei in a khangh hna. 12Cun Ahaz cung dot inncung i a ummi biakṭheng, Judah siangpahrang hna nih an sermi hna kha le Manasseh nih Bawipa inntual pahnih chung i biakṭheng a sermi hna kha a chimh hna i a den cikcek hna, cun a dip cu Kidron tiva ah a paih hna. * 13Jerusalem nichuahlei, rawhralnak tlang in thlanglei i a ummi khuahrum bo hna kha siangpahrang nih cun a thurhnawmhter hna; mah cucu Israel siangpahrang Solomon nih Sidon mi pathian fihnung Ashtoreth le Moab mi pathian fihnung Khemosh le Ammon mi pathian fihnung Milkom ca i a sermi kha an si. * 14Cun lungphun kha a den cikcek hna i Asherim kha a hau hna i cu hmun ah cun mi ruh khat lak in a hlonh hna.

15Cu hleiah Israel a sualtertu Jeroboam, Nebat fapa nih Bethel khua ah a sermi khuahrum bo biakṭheng, kha biakṭheng kha a khuahrum bo he khan a chimh i a lung cu a den cikcek hna i dip lak in a den hna; cun Asherah zong kha a khangh. * 16Cun Josiah cu a hei i mer i tlang cungah khan thlan a hmuh hna; cun mi a thlah hna i thlan chung cun ruh kha an chuah hna i biakṭheng cungah khan an khangh i an thurhnawmhter; mah cucu Pathian mi, hi thil hna kong a rak chimchungtu nih Bawipa bia a rak thanhning te khan a si. * 17Khi tikah anih nih, “Khika i ka hmuhmi lungphun khi zeidah a si?” tiah a ti. Cun cu khuami hna nih cun, “Bethel khua biakṭheng cungah na tuahmi thil hi a rak chimchungtu Pathian mi, Judah ram in a ramipa thlan a si,” tiah an chimh. * 18Cun anih nih, “Amah cu um ko seh; ahohmanh nih a ruh kha ṭhial hna hlah seh,” tiah a ti. Cucaah a ruh cu, Samaria in a ra mi profetpa ruh hna he khan zeihmanh an ti hna lo. 19Cun Samaria ram chung khua i a ummi khuahrum bo hna i hmunthiang hna, Israel siangpahrang hna nih an ser i Bawipa a thin an phawhnak hna vialte zong kha, Josiah nih a ṭhial dih hna; Bethel ah a tuahning te khan annih cung zongah cun a tuah. 20Cun khuahrum bo tlangbawi vialte khika i a ummi hna kha biakṭheng cungah a thah hna i an cungah mi ruh kha a khangh hna. Cun Jerusalem ah a kir.

Lanhtak Puai An Ulh

(2Cha 35.1-19)

21Cun siangpahrang nih mi vialte cu, “Hi biakamnak cauk chungah aa ṭial bang hin, nannih nih Bawipa nan Pathian sinah lanhtak puai kha ul u,” tiah nawl a pek hna. 22Zeitintiah Israel mi bia a rak ceihtu biaceihtu hna chan ri in siseh, Israel siangpahrang hna le Judah siangpahrang chan chung vialte ah siseh, cu bantuk lanhtak puai cu ulh a um bal ti lo; 23Sihmanhsehlaw Josiah Siangpahrang a bawi kum hleiriatnak ah hi lanhtak puai cu Bawipa sinah Jerusalem ah an ulh.

24Cu hleiah tlangbawi Hilkiah nih Bawipa inn chungah a hmuhmi cauk chung i aa ṭialmi phungbia hna kha a fehter nakhnga, Josiah nih khan litin thiam hna le hnamngei hna le milem tete hna le siasal hna le Judah ram chung le Jerusalem khua chung i fihnung a simi thil an hmuhmi vialte hna kha a hloh dih hna. 25 Bawipa sinah a lungthin dihlak le a nunnak dihlak le a thazang dihlak in, Moses nawlbia dihlak ningin, aa mermi siangpahrang amah hlan ah an um lo i amah hnu zongah amah bantuk a hung chuakmi an um lo.

26Sihmanhsehlaw Manasseh nih a thin phawhnak a rak tuahmi vialte ruangah khan Judah cungah Bawipa thinhunnak kha a alh ko i cu a thinhunnak ṭih a nungmi cu a ṭhum hlei lo. 27Cun Bawipa nih, “Israel ka ṭhial bantuk khan Judah zong hi ka mithmuh phak lonak ah ka ṭhial lai, cun ka thimmi khuapi Jerusalem hi le “Hi chungah ka min a um lai,” ti in ka rak timi inn zong hi ka hlonh hna lai,” tiah a ti.

Josiah Thihnak

(2Cha 35.20-27)

28Josiah tuahsernak a taang rihmi le a tuahmi vialte cu Judah Siangpahrang hna Chanrelnak Cauk chungah an i ṭial lo mei? 29Amah chan ah cun, Izipt siangpahrang Faro Neko cu Assiria siangpahrang sinah Zufrates tiva ah a hung kal. Josiah Siangpahrang cu amah ton awkah khan a kal; cun a rak hmuh tikah Faro Neko nih cun Megiddo ah a rak thah. 30Cun Megiddo khan amah cu a sinum hna nih a thi cia in rangleng in Jerusalem ah an kalpi i amah thlante ah khan an vui. Cun rammi nih khan Josiah fapa Jehoahaz cu an lak i chiti an thuh i a pa hmun ah khan siangpahrang ah an ser.

Jehoahaz Pennak le Phuahnak

(2Cha 36.1-4)

31Jehoahaz cu bawi hram aa thawk ah kum kul le kum thum a si i Jerusalem in thla thum a bawi. A nu min cu Hamutal a si, amah cu Libnah khuami Jeremiah fanu a si. 32Cun a pupa hna nih an tuahning te khan Bawipa mithmuh ah ṭhat lonak a tuah. 33Jerusalem khua ah cun bawi a si nakhnga lo, Faro Neko nih Hamath ram Riblah khua ah thong ah a thlak i a ram cu ngunkhuai ngun talen za khat le sui talen pakhat a cawh hna: 34Cun Faro Neko nih Josiah fapa Eliakim cu a pa Josiah hmun ah khan siangpahrang ah a canter i a min cu Jehoiakim tiah a let. Sihmanhsehlaw Jehoahaz cu a kalpi i Izipt ram a phan i khika ah a thi. * 35Cun Jehoiakim nih Faro cu ngun le sui kha a pek, sihmanhsehlaw Faro nih nawl a pek bangkhan tangka peknak ding caah cun a mi kha ngun a khuai hna. Faro Neko pek awkah khan amah nih a tuah ningin a ram chungmi hna cu sui le ngun kha a thawhter cio hna.

Jehoiakim Pennak

(2Cha 36.5-8)

36Jehoiakim cu bawi hram aa thawk ah kum kul le kum nga a si i Jerusalem khua in kum hleikhat a bawi. A nu min cu Zebidah a si, amah cu Rumah khuami Pedaiah fanu a si. * 37Cun a pupa hna nih an rak tuahning te khan Bawipa mithmuh ah thil ṭhalo kha a tuah ve.

⇑

[Remove Footnotes]