2Siangpahrang 24

1Amah chan ah cun Babilon siangpahrang Nebukhadnezzar kha a hung i Jehoiakim cu kum thum chung a sal ah a cang; sihmanhsehlaw aa let i a doh. * 2Cun Bawipa nih a sal profet hna in a rak chimmi bia ning khan, Bawipa nih Khaldi mibu hna le Siria mibu hna le Moab mibu hna le Ammon mibu hna kha a thlahhnawh hna i Judah hrawh awkah khan a thlah hna. 3-4Manasseh nih a tuahmi vialte ruangah le a sual lomi thisen a chuahmi ruangah, Bawipa nawl in hi thil cu Judah mi cungah, annih kha a mithmuh phak lo i ṭhial awkah, a tlung hrimhrim ko; zeitintiah Jerusalem khua kha a sual lomi thi in a khahter i Bawipa nih a ngaithiam duh lo. 5Jehoiakim tuahsernak a tang rihmi hna le a tuahmi vialte cu, Judah Siangpahrang hna Chanrelnak Cauk chungah an i ṭial lo mei? 6Cuticun Jehoiakim cu a pupa hna sinah a it i a fapa Jehoiachin kha amah hmun ah khan a hung bawi. 7Izipt siangpahrang cu a ram chungin a chuak ti lo, zeicahtiah Babilon siangpahrang nih Izipt siangpahrang ta a simi vialte Izipt tivate thawk in Zufrates tiva tiang, a lak dih.

Jehoiachin le Bawi Hna Kha Babilon Ah An Kalpi Hna

(2Cha 36.9-10)

8Jehoiachin cu siangpahrang a can tikah kum hleiriat a si i Jerusalem in thla thum a bawi. A nu min cu Nehushta a si, amah cu Jerusalem khuami Elnathan fanu a si. 9A pa nih a rak tuahning te khan amah nih Bawipa mithmuh i thil ṭhalo kha a tuah ve.

10Khi caan ah khan Babilon siangpahrang Nebukhadnezzar sal hna cu an hung i Jerusalem khua kha an dum. 11Cun a sal hna nih an kulh lioah khan, Babilon siangpahrang Nebukhadnezzar cu Jerusalem khua ah khan a hung; 12cun Judah siangpahrang Jehoiachin cu, a nu he, a sinum hna he, a bawi hna he, a siangpahrang inn bawi hna he khan Babilon siangpahrang sinah cun a vaa pe. A bawi kum riatnak kum ah khan Babilon siangpahrang nih cun sal ah a tlaih i * 13 Bawipa nih a rak chimchung bang khan, Bawipa inn chung ro thil vialte le siangpahrang inn chung ro thil vialte kha a lak hna i Israel siangpahrang Solomon nih a rak sermi sui umkheng, Bawipa biakinn i a ummi vialte kha a khuai dih cikcek hna. 14Jerusalem mi vialte le bawi vialte le ralṭha le miṭhawng vialte, tlaihmi thong hra, cun zungthiam le soser vialte cu a kalpi dih hna; ram chung i sifak bikmi hna dah ti lo cu ahohmanh an tang lo. 15Cun Jehoiachin cu Babilon ah a kalpi; siangpahrang i a nu, siangpahrang i a nupi hna, a bawi hna le ram chung santlai bikmi hna cu Jerusalem in Babilon ah sal ah a hruai hna. * 16Cun Babilon siangpahrang nih cun ralṭhami vialte, thong sarih, cun zungthiam le soser, thong khat, an dihlak in a ṭhawng i ral atu kho dingmi kha Babilon ah sal ah a kalpi hna. 17Cun Babilon siangpahrang nih cun Jehoiachin i a pacheu Mattaniah kha amah hmun ah khan siangpahrang ah a chiah i a min cu Zedekiah ah a thlen. *

Zedekiah Pennak

(2Cha 36.11-16; Jer 52.1-3)

18Zedekiah cu bawi hram aa thawk ah kum kul le kum khat a si i Jerusalem in kum hleikhat a bawi. A nu min cu Hamutal a si, amah cu Libnah khuami Jeremiah fanu a si. * 19Jehoiakim nih a tuah ningte khan Bawipa mithmuh i ṭhat lonak kha a tuah. 20Hi thil Jerusalem le Judah i a tlun cu Bawipa a thin a hun tuk caah khan a si, a donghnak ah cun a sinin a hlonh ko hna. *

Jerusalem Rawknak

(Jer 39.1-7; 57.3-11)

Cun Zedekiah nih Babilon siangpahrang a doh.

⇑

[Remove Footnotes]