DANIEL

Daniel

Biahmaiṭhi

Daniel cauk hi Judah mi nih harnak le hremnak fak an in lio caan i ṭialmi a si. A ṭialtu nih hin hmanthlak le langhnak kha hmang in hi bantukin a hremtu hna hi Pathian nih a tei lai i Pathian mi cu luatnak an hmu ṭhan lai ti in lungṭhawnnak kha a pek hna.

Hi cauk hi ṭhen hnih ah ṭhen khawh a si:

1. Daniel le amah bantukin sal ah a tang vemi a hawile pawl kong. Hi hna nih hin Pathian an zumhnak le an i bochannak thawngin an ral kha an tei hna. Hi tuanbia cu Babilon le Persia cozah chan lioah khan chiah an si.

2. Daniel nih langhnak le hmelchunhnak kha a hmuh hna i cu hna cu Babilon cozah in i thawk in a hun chang lengmang hna cozah kong kha an si. Cun lawkih siangpahrang a sungh lainak kong le Pathian nih a mi teinak a pek hna lainak kong kha a rak chimchungnak kha a si.

Tlangpi Hna
Daniel le a hawile hna 1.16.28
Daniel nih langhnak a hmuhmi 7.111.45
     a. Sahrang pali 7.1-28
     b. Tuukawng le mehehtum 8.19.27
     c. Vancung in a rami lamkal 10.111.45
Donghnak caan 12.1-13

Daniel 1

Nebukhadnezzar Inn Ah A Ummi Tlangval Hna

(2Sia 24.10-17)

1Judah siangpahrang Jehoiakim a bawi kum thumnak ah Babilon siangpahrang Nebukhadnezzar cu Jerusalem ah a ra i a kulh. * 2Bawipa nih Nebukhadnezzar cu Judah siangpahrang Jehoiakim kha a tlaihter i biakinn chung thil zong kha tlawmpal a lakter. Thongtla hna cu Babilon ram i a pathian inn ah khan a kalpi hna i thilri hna cu chawhlawn chiahnak inn ah khan a chiah hna. * 3Khi tikah siangpahrang nih cun tilditmi bawi bik Ashpenaz kha a thawh i, “Israel mi saltangmi hna lak i bawi phun le tuavon hna chung khan tlangval tlawmpal in na thim hna lai. 4Annih cu aa dawhmi, an pum cungah tlin lonak zeihmanh a ngei lomi, a fimmi, a thiammi, an si lai i siangpahrang inn i rianṭuan dingah aa tlakmi an si lai. Cun Khaldi mi ca le holh kha na cawnpiak hna lai,” tiah a ti. 5Siangpahrang nih nifate in an ei awk hnga rawl le zu cu siangpahrang cabuai i a ummi kha nan pek hna lai, tiah a ti. An cawn chung cu kum thum a si lai i cu caan a dongh tikah siangpahrang rian ah cun an luh awk a si lai.

6Cu hna lakah cun Judah phun chungmi Daniel, Hananiah, Mishael le Azariah kha an i tel. 7Sihmanhsehlaw tilditmi bawi bik nih khan min thar a sak hna i Daniel cu Belteshazzar a ti, Hananiah cu Shadrak a ti, Mishael cu Meshak a ti i Azariah cu Abednego a ti. 8Daniel nih cun siangpahrang nih a ka pekmi rawl le zu hin kaa thurhhnawmh hrimhrim lai lo a ti i tilditmi bawi bik cu, cu bantuk cu ka tuahter hlah, tiah a nawl. 9Pathian nih a bawipa cu Daniel cungah khan zaangfahnak le lungthin ṭhatnak a ngeihter i cucaah cun a thawh i, 10“Ka bawipa siangpahrang kha ka ṭih: amah nih na rawl ei awk le na din awk kha an tuahpiak, cucaah der fiamfuam in, na ṭhirual tlangval dang he i lo loin an hmuh ahcun, ka lu na ka hloh ko lai pei,” tiah a ti.

11Cucaah Daniel cu, Hananiah le Mishael le Azariah le amah zohkhenhtu dingah tilditmi bawi bik nih a chiahmi micawngtu sinah khan a va kal i, 12“Ni hra chung kan hneksak tuah. Ei awkah tisik anhnah lawnglawng le din awkah ti lawnglawng kan pe; 13cun siangpahrang nih a phawtmi hna rawl in a nungmi tlangval dang hna he kan muisam cu kan zohkhek, cun na kan hmuhning in kan cungah ṭuan,” tiah a ti. 14A cawngtu hna nih cun an chimmi cu a ngaih i ni hra chung cu a hneksak hna. 15Ni hra donghnak ah cun siangpahrang nih a pekmi hna rawl in aa cenhmi tlangval vialte hna nakkhan an titsa cu a ṭha deuh i an tlornal deuh. 16Cucaah a cawngtu hna nih khan an ei awk rawl le an din awk zu an pekmi hna cu a lak i tisik anhnah lawnglawng kha a pek hna.

17Hi tlangval pali hna hi an dihlak tein Pathian nih ca lei fimnak le hngalhnak le thiamnak phun kip kha a pek hna i Daniel cu langhnak le mang sullam hngalh khawhnak pahrang kha a ngei. 18Siangpahrang inn ah chuahpi an si lai, tiah a rak timi caan kha a hung phan i tilditmi bawi bik Ashpenaz nih khan Nebukhadnezzar hmaika ah cun a chuahpi hna. 19Siangpahrang nih cun bia a ruah hna i Daniel le Hananiah le Mishael le Azariah a tluktu kha ahohmanh an um lo, cucaah siangpahrang rian ah khan an lut. 20Siangpahrang nih zei bantuk bia hmanh ah siseh, zei bantuk thil har a chuakmi hmanh ah siseh, an ruahnak a hal hna fate, a ram chung dihlak i mitlehthiam hna le kutṭial zohthiam hna le camhthiam hna nakkhan a let hra in an hngal deuh ti kha a hmuh. 21Daniel cu khika ah khan Sairas cu Babilon siangpahrang i a hung can tiang khan a um.

⇑

[Remove Footnotes]