DEUTERONOMI

Deuteronomy

Biahmaiṭhi

Deuteronomi cauk chungah hin Moses nih Israel mi Moab ram chung i bia a chimhmi hna kha an ṭial. Ramcar chungah kum saupi an vaih hnuah Moab ram ah cun an i din i cuka hmun cun Kanaan ram chung i va luh kha an i tim.

Hi cauk chungah hin a biapi bikbik cu hi hna hi an si:

1. Moses nih, hlanlio kum sawm li chung i thil a rak ummi kong kha a chimh ṭhan hna. Ramcar chung an vaih lio i Pathian nih a rak hruai hna kong kha philh hlah u law Pathian cu a nawl zul zungzal u law a cungah zumhawktlak in um u, tiah a ti hna.

2. Moses nih Nawlbia Pahra kha a chimh ṭhan hna i Nawlbia Pakhatnak biapi a sining kha fak khun in a chimh hna. Cucu Israel mi nih Pathian ṭanh in an um awk a si kha a si. Cun Israel mi nih Kanaan ram chung i an luh tikah an zulh awk phunglam vialte kha a chimh fawn hna.

3. Moses nih Israel mi cu, Pathian nih anmah he biakamnak a sernak kong kha a chimh hna i annih nih an biakamnak le thil an tuah awk a simi ah a thar in an ṭan ṭhan awk a si kha a forh hna.

4. Pathian mi a hruaitu hna caah khan Joshua kha hun thiah a si. Pathian zumhawktlak a sinak kha hla in an sak dih hnu le Israel mi kha thluachuah a pek dih hnu hna in Moses cu Jordan nichuahlei i a ummi Moab ram ah khan a thi.

Hi cauk chungah biapi bik tlangpi a simi cu Pathian nih a dawtmi a mi cu a khamh hna i thluachuah a pek hna, cucu a mi nih cun an philh lo awk a si i nunnak le donglo thluachuahnak an hmuh nakhnga an Pathian cu an dawt awk le a nawl an ngaih awk a si, ti hi a si.

Hi cauk chung i tawh a simi biatlang cu 6.4-6 i a ummi hi a si i cucu Jesuh nih nawlbia ngan bik a si a timi kha a si: “ Bawipa na Pathian cu na lungthin dihlak, na ruahnak dihlak le na thazang dihlak in na dawt lai.”

Tlangpi Hna
Moses biachim pakhatnak 1.14.49
Moses biachim pahnihnak 5.126.9
     a. Nawlbia pahra 5.110.22
     b. Phungbia, phunglam, ralrin peknak 11.126.19
Kanaan ram luhning cawnpiaknak 27.128.68
Biakamnak an tharchuah ṭhan 29.130.20
Moses rovuih bia 31.133.29
Moses thihnak 34.1-12

Deuteronomi 1

Horeb I A Biakamnak Kha Moses Nih A Chimh Ṭhan Hna

1Paran le Tofel, Laban, Hazeroth le Dizahab karlak, Suf zawn Arabah chung, Jordan tiva ral ramlak ah khan, Moses nih Israel mi vialte hna sinah mah bia hi a chimmi cu an si. 2Horeb in Kadesh-barnea cu Seir Tlang lei in ni hleikhat lam kal a si. 3Kum sawm linak kum, thla hleikhat thla ni khatnak ni ah cun, Bawipa nih anmah chimh awkah nawlbia a pekmi vialte cu Moses nih Israel mi cu a chimh hna; 4Amor mi Siangpahrang Sihon, Heshbon ah a ummi, le Bashan Siangpahrang Og, Ashtaroth le Edrei ah a ummi, a tei hna hnuah khan a si. * 5Jordan tiva ral, Moab ram chungah khan, Moses nih hi phungbia hi a sullam chimh a thawk hna i, 6 Bawipa kan Pathian nih Horeb ah a kan chawnh i, ‘Hi tlang ah hin sau nawn nan um ko cang; 7i mer u law, i thawh u law, Amor mi hna umnak tlangram le an pawngkam ram hna Arabah ah siseh, tlangram ah le ramniam ah siseh, Negeb le rilikam ram ah siseh, Kanaan mi hna ram ah siseh, Lebanon ah siseh, tiva ngan Zufrates tiva tiang va kal u. 8Zohhmanh, ram cu nan hmaiah ka chiah cang; nan pupa Abraham, Isak, le Jakob sinah Bawipa nih anmah le an hnu i an tefa hna sinah pek awkin chiat a sermi ram ah cun va lut u law, va co u,’ tiah a ti.

Biaceihtu Rian An Pek Hna

(Exo 18.13-27)

9“Khi caan ah keimah nih nannih cu, ‘Keimah lawng nih cun kan ti kho ti hna lo; 10 Bawipa nan Pathian nih an karhter cang hna i zohhmanh, nihin cu nan tam ning ah van arfi zat khi nan si cang. 11 Bawipa, nan pupa hna Pathian nih cun, atu nakin a let thong khat in in karhter hna seh law, thluachuah in pe hna seh, bia an kam hna bang khan! 12Zeitindah keimah lawng nih nan hnahnawhnak le nan thilrit le nan phunzainak cu ka phorh khawh lai? 13Mifim le hngalh thiamnak a ngeimi le ningcang hngalmi kha nan phun ning cio in thim hna u law, nan lu ah ka ser hna lai,’ tiah ka rak in ti hna. 14Cun nannih nih, “Na chimmi cu kan caah a ṭha ko,” tiah nan ka leh. 15Cucaah nan phun cio i lu hna cu, mifim le ningcang hngalmi hna cu, ka lak hna i nannih cungah lu ah ka chiah hna, a thongthong haotu hna le, a zaza haotu hna le sawm nga pawl haotu hna le pahra pawl haotu hna le nan phun hna chung i biaceihtu hna cu an si. 16Cun khi caan ah nan biaceihtu hna cu, ‘Nan unau hna an karlak i bia cu ngaihpiak hna u law, mipa le a unau karah siseh, ramdangmi amah he a ummi he karlak ah siseh, ding tein bia nan ceih lai. 17Biaceih tikah duhdanh nan ngei lai lo; mi hme siseh, mi ngan siseh, aa tluk in nan ngaihpiak hna lai; minung hmai kha nan ṭih lai lo, zeitintiah biakhiahnak cu Pathian ta a si; cun nan ca i a har tukmi bia cu ka sinah nan ratpi lai keimah nih ka ngaih lai,’ tiah nawl ka pek hna. 18Cun khi caan ah nan tuah awk hnga thil vialte kongah nawl kan pek hna,” a ti.

Kadesh-Barnea In Ram Ngiatu An Thlah Hna

(Nam 13.1-33)

19 Bawipa kan Pathian nih nawl a kan pek bang khan Horeb in kan tho i, Amor mi hna tlangram i hung kalnak lam i nan hmuhmi a kau le ṭih a nungmi ramlak kha kan tan i, Kadesh-Barnea kha kan phan. 20Cun nannih cu, ‘Amor mi hna tlangram, Bawipa kan Pathian nih a kan pekmi cu nan phan cang. 21Zohhmanh, Bawipa nan Pathian nih ram cu nan hmaiah a chiah cang; hung kal u law, hung co u, Bawipa nan pupa hna Pathian nih an chimh hna bang khan; ṭih hlah u, nan lung zong dong hlah u,’ tiah kan ti hna. 22Cun nan dihlak in ka pawngah nan ra i, ‘Kan hmaiah mi thlah hna u si law, ram cu hung kan zohpiak hna seh law, kannih kan kalnak hnga lam le kan phak hnga dingmi khua hna kong cu kan chim ṭhan hna seh,’ tiah nan ti. 23Mah cucu a ṭha tiah ka ruah i nannih lakin mi hleihnih, phun khat in pakhat cio, ka lak hna i 24annih nih an i thawh i tlangram ah cun an hung kal i Eshkol Nelrawn cu an phan i an ngiat thlai. 25Cu ram theitlai cu tlawmpal in an kut in an lak i kannih sinah an runpi i bia an kan phorh ṭhan i, ‘Ram ṭha a si, Bawipa kan Pathian nih a kan pekmi ram cu,’ tiah an ti.

26“Sihmanhsehlaw hung kal cu nan duh lo i Bawipa nan Pathian nawlbia kha nan ngai lo. * 27Nan thlam chungah nan phunzai i, ‘ Bawipa nih a kan huat caah kannih kha hrawh awkah, Amor mi hna kut chungah pek awkah Izipt ram in a kan chuahpi. 28Khuazeika ah cun dah kan hung kal lai? Kan unau hna nih, “Cu mi hna cu kanmah nakin an ngan deuh i an sang deuh; khua hna cu an ngan i an kulhnak hau hna cu van an tawng; cuhleiah Anak tefa hna zong kha khika ah cun kan hmuh fawn hna,” tiin kan lung kha an kan zorter,’ tiah nan ti. 29Cun kei nih kan thawh hna i, ‘Therphang in um hlah u, annih kha ṭih hna hlah u. 30-31Izipt ram i nan mithmuh ah an tuahpiak hna bantuk le mipa nih a fa a puak bantuk i Bawipa nan Pathian nih ramlak i nan kalnak lam vialte ah, hi hmun nan phak hlantiang, an puak hna nan hmuh bantuk khan nan hmai i a kalmi Bawipa nan Pathian hrimhrim nih an dohpiak hna lai,’ tiah ka ti. * 32-33Sihmanhsehlaw nan thlam tung bunhnak hmun kawlpiak awkah, nan hmaiah lam ah nan kalnak hmuhsak awkah, zan ah mei in, chun ah minmei in, a kalmi Bawipa nan Pathian cu hi thil a tuah nain, nan zum lo. *

Israel Mi Kha Dan A Tat Hna

(Nam 14.20-35)

34“Cun Bawipa nih nan bia cu a theih i a thin a hung i, * 35‘Hi chan ṭhalo chung mi hna lak hin, nan pupa hna sinah pek awkin chiat ka sermi ram ṭha cu pakhat hmanh nih an hmu lai lo. 36Sihmanhsehlaw Jefunneh fapa Kaleb nih cun a hmuh lai i lungtling tein Bawipa kha a rak zulh caah, amah le a tefa hna sinah a lamhmi ram cu ka pek lai,’ tiah chiat a ser. 37Nanmah ruangah Bawipa cu keimah cung zongah a thin a hung i, ‘Nangmah zong khika ah na lut ve lai lo; 38nangmah an bultawltu Nun fapa Joshua cu a lut lai; amah kha thazang pe tuah, zeitintiah amah nih Israel cu, cu ram cu a coter lai. 39Cuhleiah nan ngakchia, hranchaw ah an cang lai nan timi hna le, atu ah chia le ṭha a hngal lomi nan fale hna cu, khika ah an lut lai i annih cu ka pek hna lai i annih nih an co lai. 40Sihmanhsehlaw nannih tu cu, i mer u law, Rili Sen lei hoih in ramlak ah khan kal tuah u,’ tiah a ti.

Hormah Ah An Sung

(Nam 14.39-45)

41“Cun nannih nih nan ka leh i, ‘ Bawipa cungah kan sual cang; Bawipa kan Pathian nih nawl a kan pek bantuk khan kan hung kal lai i kan doh lai,’ tiah nan ti. Cun nan dihlak in nan ral hriamnam cio in nan i thuam i tlangram i hung luh awk cu a fawi ah nan ruah. 42Cun Bawipa nih a ka chawnh i, ‘Annih cu va chim hna, hung kal hlah u, do hlah u, zeitintiah nan lakah ka um lo caah nan ral nih an in tei sual hna lai,’ tiah a ti. 43Cucaah kan chimh hna i sihmanhsehlaw nan ngai duh lo; Bawipa nawlbia kha nan doh i tlangram ah cun nan hung kal. 44Cun khi tlangram i a ummi Amor mi hna nih cun an in chuahhnawh hna i khuai nih mi an dawi bantukin an in dawi hna i Seir in Hormah tiang an in den chih len hna. 45Cun nan ra kir ṭhan i Bawipa hmaiah nan ṭap, sihmanhsehlaw Bawipa nih nan aw kha a ngai lo i a hna zong an chit hna lo. 46Cucaah Kadesh ah ni tampi nan um, nan cam chung cu caan saupi a si.

⇑

[Remove Footnotes]