Deuteronomi 2

Ramlak Ah Kum Sawm Li

1“Cun kan i mer i Bawipa nih a ka chimh bangin Rili Sen lei hoih in ramlak ah cun kan kal i Seir Tlang cu ni tampi kan hel. * 2Cun Bawipa nih a ka chawnh i, 3“Hi tlangram hi sau nawn nan hel cang; chaklei hoih in kal tuah u. 4Cun mi cu nawl pe hna law: Seir i a ummi nan unau hna, Esau fapa hna, an ram cu nan tan dengmang cang i nannih cu an in ṭih hna lai. Cucaah ṭha tein i ralring tuah u, * 5annih cu va doh sual hna hlah u, zeitintiah an ram cu zeihmanh kan pe hna lai lo, keza kauh hmanh kan pe hna lai lo, zeicahtiah Seir Tlang cu Esau kha a covo ah ka pek cang. 6Nan eimi rawl cu an sinin tangka in nan cawkmi a si lai i nan dinmi ti zong cu an sinin tangka in nan cawkmi a si lai. 7Zeitintiah Bawipa nan Pathian nih nan kut rianṭuannak vialte ah thluachuah an pek hna; hi ramlak kaupi chung i nan kalnak hi a hngalh ko; hi kum sawm li chung hi Bawipa nan Pathian cu nan sinah a um i zeihmanh nan bau lo,’ tiah a ka ti. 8Cucaah Seir i a ummi Esau fapale kan unau hna cu kaltak in, Arabah lam kaltak in, Elath le Ezion-geber kaltak in hmailei ah kan kal.

“Cun kan i mer i Moab ramlak lei hoih in kan kal. 9Cun Bawipa nih a ka chawnh i, ‘Moab cu awlokchonh hna hlah u, a tuk zong tu hna hlah u, zeitintiah annih ram cu co awkah zeihmanh kan pe hna lai lo, zeicahtiah Lot fapa hna cu Ar kha an co awkah ka pek cang hna.’ * 10(Hlan lioah cun khika ah Emim mi an rak um; Anak mi hna bantukin mingan pipi, mi tam le misang pipi an rak si. 11Anak mi hna bantukin annih zong cu Refaim mi tiah ti an rak si ve, sihmanhsehlaw Moab mi hna nih cun Emim mi tiah an ti hna. 12Hormi zong hlan ah cun Seir ah an rak um, sihmanhsehlaw Esau fapa hna nih an pawnchuah hna i an hrawh hna i an umnak kha an rawlh hna, Israel mi nih Bawipa nih a cotermi hna ram cung i an tuah bantuk khan.) 13‘Cucaah tho u law, Zered varek cu hei tan tuah u,’ tiah a ti. Cu caah Zered varek cu kan tan. 14Cun Kadesh-barnea in kan i thawh i Zered varek kan tan tiang Bawipa nih annih sinah chiat a ser bangin, cu chan cu a ningpi in, cucu ralkap hna cu, riahhmun in an loh dih tiang, kum sawm thum le kum riat a si. * 15Zeicaahtiah, an loh dih tiang, mibu chungin hrawh awkah Bawipa kut cu an cungah a um taktak ko.

16“Cucaah ralkap vialte kha an loh i mibu chungin an thih tikah, 17 Bawipa nih a ka chawnh i, 18Nihin cu Moab ramri kha Ar ah nan tan lai; 19Ammon fapa hna ramri nan va naih tikah, annih cu awlokchonh hna hlah u, a tuk zong tu hna hlah u, zeicahtiah co awkah Ammon fapa hna ram cu kan pe hna lai lo, Lot fapa hna kha ka coter cang hna a ti. * 20(Mah zong cu Refaim mi hna ram tiah ti a si ve. Hlan lioah cun khika ah khan Refaim mi an rak um, sihmanhsehlaw Ammon mi hna nih cun Zamzummim an ti hna. 21Cu hna cu Anak mi hna bantukin mi ngan, mi tam, le mi sang pipi an si. Sihmanhsehlaw Bawipa nih annih hmaiah a hrawh hna i an pawnchuah hna i an umnak kha an rawlh hna; 22Seir tlang i a ummi Esau fapa hna caah a tuah bang khan — annih hmaiah Hormi kha a hrawh tik hna ah annih nih an pawnchuah hna i nihin tiangin an umnak kha an rawlh hna. 23Gaza tiangin khuate i a ummi Avvim hna cu, Kaftor in a rami Kaftor mi hna nih an hrawh hna i an umnak kha an rawlh hna.) 24‘Tho u law, i thawh tuah u, Arnon nelrawn cu hei tan tuah u; zohhmanh, Heshbon siangpahrang Amor mi Sihon le a ram cu nan kut chungah kan pek cang hna; lak i thawk u law, raldohnak ah amah he cun i do u. 25Nihin ni hin, vanrang toi i a ummi vialte cungah nanmah ṭihnak le phannak chiah cu ka thawk lai i, annih nih nan thawngpang kha an theih lai i an ther lai i nanmah ruangah lungrethei in an um lai,’ tiah a ti.

Israel Mi Nih Sihon An Tei

(Nam 21.21-30)

26“Cucaah Kedemoth ramlak in Heshbon siangpahrang Sihon sinah cun daihnak bia he lamkal ka hei thlah hna i, 27‘Na ram chungin ka lanhter tuah; lam lawnglawng kha ka zulh lai, orhlei ah siseh, kehlei ah siseh kaa mer lai lo. 28Ka ei awkah rawl cu tangka ah na ka zuarh lai i ka din awkah ti cu tangka ah na ka zuarh lai; 29Jordan ka tan i Bawipa kan Pathian nih a kan pekmi ram chungah ka luh hlantiang Seir ah a ummi Esau fapa hna le Ar ah a ummi Moab mi hna nih ka cungah an tuah bangin, ka ke in hei ka lanhter men ko,’ tiah ka ti. 30Sihmanhsehlaw Heshbon siangpahrang Sihon nih cun a ram chung cun a kan lanhter duh lo; nihin ni i a si bang hin amah cu nan kut chungah an pek hna nakhnga, Bawipa nan Pathian nih a thlarau kha a hahter i a lung kha a khonter caah a si. 31Cun Bawipa nih a ka chawnh i, ‘Zohhmanh, Sihon le a ram cu nannih sinah pek hram ka thawk cang; a ram cu nan umnak nakhnga, lak hram thawk tuah u,’ tiah a ti. 32Cun Jahaz ah Sihon le a mi vialte hna nih doh awkah an kan chuahhnawh. 33 Bawipa kan Pathian nih amah cu a kan pek i, amah le a fapa hna le a mi vialte hna cu kan tei dih hna. 34Khi caan ah a khua vialte cu kan lak dih i khua vialte cu kan hrawh cikcek hna, pa si hna seh, nu si hna seh, ngakchia si hna seh; pakhat hmanh kan taanter hna lo; 35caw le kan lakmi khua hna thil lawng kanmah ca i hranchaw ah kan i lak hna. 36Arnon nelrawn kam i a ummi Aroer in le nelrawn chung i a ummi khua in Gilead tiang, kan ca i a sang tukmi khua pakhat hmanh an um lo; Bawipa kan Pathian nih kan kut chungah an dihlak in a kan pek. 37Ammon fapa hna ram, mah cucu, Jabbok tiva kam vialte le tlangram khua hna, mah hna bel cu le, Bawipa kan Pathian nih a kan thlauhmi hmun paohpaoh kha, kan naih hna lo.

⇑

[Remove Footnotes]