Deuteronomi 8

Co Awk Ram Ṭha

1“Nan nundam i nan karh i Bawipa nih nan pupa hna sinah pek awkin chiat a sermi ram cu nan co nakhnga, nihin ah kan pekmi hna nawlbia vialte cu ṭha tein nan tuah lai. 2A nawlbia cu nan ngai lai maw ngai lo dah tinak caah, nan lung chung i a ummi kha hngalh awkah nannih cu harnak in an hneksak hna nakhnga, Bawipa nan Pathian nih hi kum sawm li chung ramlak ah an vahternak hna kha, i cinken ko u. 3Minung hi rawl lawnglawng in a nung lo, sihmanhsehlaw Bawipa kaa in a chuakmi thil kip in a nung ti kha an hngalhter hna nakhnga, rawlṭam fahnak kha an inter hna i manna in an cawm hna, mah cucu nanmah nih siseh nan pupa hna nih siseh nan rak hngal lo. * 4Hi kum sawm li chung hi nan thilpuan nih an ṭehtak hna lo i nan ke a phing lo. 5Cucaah mipa nih a fapa a chimhhrin bantukin Bawipa nan Pathian nih an chimhhrin hna kha nan lung chungin hngal ko u. 6Cucaah Bawipa nan Pathian nawlbia cu zul tuah u; amah lam kha zul u law, amah kha ṭihzah tuah u. 7Zeitintiah Bawipa nan Pathian nih ram ṭha chungah an luhpi hna lai. Mah ram cu tiva tete hna le, tlang le nelrawn ah a luangmi tikhor le cerhti hna le, 8changvut le barli le mitsur ruang le theipi kung le taleti le oliv thing le khuaihliti a tamnak ram a si; 9khi ram ah rawl kha cham bau loin nan ei lai i zeihmanh nan bau lai lo; a lung hna cu thir an si i a tlang hna ah cun tawngca nan cawh khawh lai. 10Cun nan ei lai i nan khim lai i Bawipa nan Pathian cu, ram ṭha an pekmi hna caah cun, nan lawmh lai.

Bawipa Philh Lonak Ding Ralrin Peknak

11“Nihin ah kan pekmi hna a phungbia hna le a phunglam hna le a nawlbia hna hi nan zulh lonak thawngin Bawipa nan Pathian cu nan philh sual nakhnga lo, i ralring tuah u; * 12nan ei i nan khim tikah le inn ṭhaṭha nan sak hna i a chungah nan um i, 13nan saṭil run hna le nan tuurun hna an karh i nan sui le nan ngun an karh i nan ngeihmi vialte a karh tikah, 14nan lung a puam i Izipt ram chungin sal cannak innchung khan an chuahpitu hna Bawipa nan Pathian cu nan philh sual nakhnga lo, i ralring tuah u. 15Amah cu a kau i ṭih a nungmi ramlak, mei alh bantuk a simi rul hna le tlangngaikuang hna an umnak le ti um lomi ramcar chungin an hruaitu hna a si; amah nih ṭeklung lungpi chungin ti an pek hna i 16ramlak chungah khan nan pupa hna nih an hngalh lomi manna in an cawm hna, a donghnak ah nannih cu ṭhatnak tuahpiak awkah an hneksak hna i thluachuahpek awkah an ṭhumh hna. 17Nan lung chungin, ‘Keimah ṭhawnnak le ka kut thazang nih hi chawva hi an ka pek,’ tiah nan ti sual nakhnga lo, i ralring tuah u. 18Nan pupa hna sinah chiatser in a tuahmi biakamnak, atu ah a fek rihmi kha, tlinter awkah, chawva hmuh khawhnak ṭhawnnak an petu hna cu Bawipa nan Pathian kha a si tiah i cinken ko u. 19Cun Bawipa nan Pathian nan philh i pathian dang kha nan zulh hna i an rian nan ṭuan i nan biak hna ahcun, nan rawk hrimhrim lai, tiah nihin ah hin ralrin kan pek hna. 20Nan hmaiah Bawipa nih miphun a rawkter hna bangin Bawipa nan Pathian aw cu nan ngaih duh lo ahcun, cu bangin nan rawk ve lai.

⇑

[Remove Footnotes]