Deuteronomi 9

Kanaan Ram Miphun Bawipa Nih A Hrawh Hna

1“Ngaihmanh, maw Israel, nangmah nakin a lianngan deuh le a ṭhawng deuhmi miphun hna, van tawng in kulhmi khua lianngan pipi a ngeimi hna, 2a ngan le a sangmi hna miphun Anak tefa hna, ‘Anak fapa hna hmaiah ahodah a dir kho lai,’ an ti na theih i na hngalhmi hna cu pawnchuah awkah nihin ah hin Jordan tiva cu na tan cang lai. 3Nangmah hmaiah kanghtu mei bangin a kalmi cu Bawipa na Pathian a si kha nihin ah hin hngal tuah; amah nih na hmaiah a hrawh hna lai i a tei hna lai; cucaah Bawipa nih bia an kam bangin na ṭhawl hna lai i khulrang tein na hrawh hna lai.

4 Bawipa na Pathian nih na hmaiah annih cu a dawi hna hnuah, ‘ Bawipa nih hi ram co awkah a ka luhpi hi, keimah dinnak thawngin pei a si,’ tiah na lung chungin va ti hlah; Bawipa nih na hmai in annih kha a dawi hna cu hi miphun hna ṭhat lonak ruangah a si deuh. 5Na dinnak le na lung dinnak thawngin annih ram kha co awkah na luh cu a si lai lo; sihmanhsehlaw Bawipa na Pathian nih annih kha na hmai in a dawi hna lai cu hi miphun hna an ṭhat lonak ruangah le, Bawipa nih na pupa hna Abraham, Isak, le Jakob sinah chiat a sermi bia cu fehnak caah a si lai.

Israel Mi Nih Bawipa An Doh

6“Cucaah Bawipa na Pathian nih hi ram ṭha cu co awkah na dinnak thawng in an pek a si lo kha hngal tuah, zeitintiah nangmah cu mikhong na si. 7Ramlak ah Bawipa na Pathian zeitluk in dah a thin na phawh kha hngal camcin tuah law, philh hlah; Izipt ram in na chuah ni ri in hika hmun na phak tiang, Bawipa cu na ralchanh lengmang ko. 8Horeb hmanh ah Bawipa kha a thin na phawh i, na cungah Bawipa cu a thin a hun tuk hringhran caah nangmah kha hrawh awk deng tiang aa tim. 9Lungtlap hna, Bawipa nih nannih he biakamnak a sernak lungtlap hna, lak awkah tlang cungah ka hung kai tikah khan, tlang cungah khan ni sawm li le zan sawm li ka hung um; rawl zong ka ei lo, ti zong ka ding lo. * 10Cun Pathian kutdong in ṭialmi lungtlap pahnih hna cu Bawipa nih a ka pek; cun cu hna cungah cun, pumhnak ni ah mei chungin Bawipa nih tlang cung i nannih sinah a chimmi bia vialte kha an um. 11Cun ni sawm li le zan sawm li a dihnak ah Bawipa nih lungtlap pahnih kha a ka pek hna, biakamnak lungtlap hna cu. 12Khi tikah Bawipa nih ka sinah, ‘Tho law, hika hin khulrang tein vung kal tuah, zeitintiah Izipt ram in na chuahpimi na mi hna nih thurhnawm ngaiin an i tuah cang; zulh awkah nawl ka pekmi hna lam khan khulrang tein an pial cang; annih caah thletmi siasal an i ser,’ tiah a ti.

13“Cuhleiah Bawipa nih ka sinah, ‘Hi mi hna hi zei an si kha ka hmuh cang; zohhmanh, mikhong an si; 14ka dawn hlah, annih cu hrawk hna ning law, an min cu vanrang tang dihlak in hlo ko hna ning; cun annih nakin a ṭhawng deuh le a ngan deuhmi miphun ah nangmah cu in ser ko ning,’ tiah a ti. 15Cucaah kaa mer i tlang in ka rung ṭum i tlang cu mei in a kang; cun biakamnak lungtlap pahnih hna cu ka kut pahnih chungah an um. 16Khua ka zoh i zohhmanh, Bawipa nan Pathian cungah nan sual cang; thletmi cawfa kha nan i ser cang; Bawipa nih zulh awkah nawl an pekmi hna lam khan khulrang tein nan pial cang. 17Cucaah lung tlap pahnih kha ka lak hna i ka kut pahnih hna chung cun ka hlonh hna i nan mit hmuh ah ka khuai hna. 18Cun Bawipa hmaiah a hlan bang khan ni sawm li le zan sawm li ka bawk; Bawipa kha a thin phawh awkah amah mithmuh ah ṭhat lo nan tuahnak thawngin sual nan tuahmi vialte ruangah rawl ei lo le ti ding loin ka um. 19Zeitintiah nanmah kha hrawh awk tiangin Bawipa nih aa timhnak thinhunnak le lungsi lonak kha ka ṭih. Sihmanhsehlaw Bawipa nih khi tan zongah khan ka bia a ka ngaihpiak. * 20Cun Bawipa nih Aaron cungah a thin a hun tuk caah amah cu hrawh awkah aa tim; cun khi caan ah Aaron ca zongah thla ka cam colh. 21Cun hi nan thil sual, nan sermi cawfa cu, ka lak i mei in ka khangh i ka den, leidip bantukin a dip tiang dip tein ka rial; cun cu leidip cu tlang cungin a rung luangmi tivate ah cun ka paih.

22“Taberah zongah, cun Massah le Kibroth-hattaavah ah Bawipa thin kha nan phawh fawn. * 23Cun Bawipa nih Kadesh-barnea in an thlah hna i, ‘Hung kal u law, kan pekmi hna ram cu hung umhnawh tuah u,’ tiah an ti hna tikah khan, nannih nih Bawipa nan Pathian nawlbia cu nan ralchanh i amah kha nan zum lo, a aw zong nan ngai lo. * 24Kan hngalh hna ni ri in nannih cu Bawipa kha a ralchanhmi nan si ko.

25 Bawipa nih nannih cu ka hrawh hna lai tiah a ti caah, cucaah Bawipa hmaiah hi ni sawm li le zan sawm li cu ka bawk. 26Cun Bawipa sinah hi bangin thla ka cam, ‘Maw Bawipa Pathian, nangmah nih na lianhngannak thawngin na tlanh i Izipt ram in a ṭhawngmi kut he na chuahpimi na mi le na ro cu hrawk hlah, 27Na sal Abraham, Isak le Jakob kha cingkeng hna law; hi mi hna an lung khonnak siseh, an ṭhat lonak siseh, an sualnak siseh zei ah rel sawh hlah; 28cu ti a si lo ahcun na kan chuahpinak ram nih khan, “ Bawipa nih a kamhmi hna ram ah a luhpi khawh hna lo ca le a huat hna caah, ramlak i thah hna awkah a chuahpi hna,” tiah a ti sual hnga. 29Zeitintiah annih cu nangmah mi le ro, a liannganmi na ṭhawnnak le samhmi na ban in na chuahpimi hna an si,’ a ti.

⇑

[Remove Footnotes]