Deuteronomi 10

Nawlbia Lungtlap Voi Hnihnak

(Exo 34.1-10)

1“Khi caan ah Bawipa nih ka sinah, ‘Hmasa i bantuk a simi lung tlap pahnih in ser hna law, tlang cungah ka sinah ra kai tuah, cun thingkuang zong ser tuah. 2Cun hmasa lungtlap na khuaimi hna cung i a ummi bia kha, lungtlap hna cungah cun ka ṭial hna lai i kuang chungah cun na khumh hna lai,’ tiah a ti. 3Cucaah anri thing in kuang pakhat ka ser i hmasa bantuk a simi lungtlap pahnih ka ser hna i cu lungtlap pahnih hna cu ka kut chungah i put in tlang ah cun ka hung kai. 4Cun lung tlap hna cungah cun, tlang cungah mei chungin pumh ni i Bawipa nih nan sinah a chimmi nawlbia pahra cu hmasa i a ṭial bang khan, a ṭial hna i Bawipa nih a ka pek hna. 5Cun kaa mer i tlang cungin ka rung ṭum i ka sermi kuang chungah cun lung tlap cu ka chiah hna; Bawipa nih nawl a ka pek bangin khika ah an um.

6(Israel mi hna cu Beeroth Bene-jaakan in Moserah ah an kal. Khika ah Aaron cu a thi i khika ah an vui. A fapa Eleazar nih amah can ah tlangbawi rian a ṭuan. * 7Khika in Gudgodah ah an kal i Gudgodah in tiva tete umnak ram Jotbathah ah an kal. 8Khi caan ah, Bawipa biakamnak kuang put awk le amah min in thluachuah pek le amah ca rianṭuan awk i Bawipa hmai i dir awkah, Bawipa nih Levi phun cu nihin tiang aa thleidan hna. * 9Cucaah Levi cu a unau hna lakah covo siseh ro siseh a ngei lo; Bawipa nan Pathian nih amah sinah a chim bang khan, Bawipa cu a ro a si.)

10“Hmasa bantuk ṭhiamṭhiam khan, tlang cungah cun ni sawm li le zan sawm li ka um i khi tan zongah khan Bawipa nih ka bia a ka ngaihpiak; Bawipa nih hrawh an duh hna lo. * 11Cun Bawipa nih ka sinah, ‘Tho law, an pupa hna sinah pek awkin chiat ka sermi ram kha an luhhnawh i an co nakhnga, mi hna cu hmaisak tuah hna,’ tiah a ti.

Pathian Nih A Duhmi Thil

12“Kha! Israel, Bawipa na Pathian nih an fialmi cu zeidang si loin, Bawipa na Pathian ṭih le, a lam vialte kha zulh le, amah kha dawt le, Bawipa na Pathian cu na lung dihlak le na ruahnak dihlak in a rian ṭuan le, 13nihin ah nangmah ṭhatnak ding caah nawl kan pekmi hna Bawipa phungbia le nawlbia hna ulh hi, a si lo maw? 14Zohhmanh, a sang bik van hna le, vawlei le a chungah a ummi thil vialte hi, Bawipa na Pathian ta an si dih; 15sihmanhsehlaw Bawipa nih dawtnak in na pupa hna cungah a lung a chiah i annih hnu i an tefa, nannih cu, midang vialte hlan in an thim hna, nihin ah nan si bang hin. 16Cucaah nan lung cuarpar cu tan u law, lungkhong si ti hlah u. 17Zeitintiah Bawipa nan Pathian cu pathian hna Pathian le bawi hna Bawi, a lianngan i a ṭhawng i ṭih a nungmi Pathian, duhdanh a ngei lo i ziknawh a la lomi a si. * 18Pangeilo le nuhmei cu ding tein bia a ceihpiak hna i, mipem kha a dawt i rawl le hnipuan a pek. 19Cucaah mipem kha daw u, zeitintiah nannih kha Izipt ram ah mipem nan rak si. 20 Bawipa na Pathian cu na ṭih lai; a rian na ṭuan lai i amah ah naa bek lai i amah min chalh in chiat na ser lai. 21Amah cu na thangṭhat awk cu a si; amah cu na Pathian, hi thil lianngan le thil ṭihnung hna, na mit nih an hmuhmi, a tuahtu hi a si. 22Na pupa hna nih Izipt ram ah an vung kal tikah sawm sarih an si; atu ah cun Bawipa na Pathian nih van arfi zat in nan tam leiah an ser cang hna. *

⇑

[Remove Footnotes]