Deuteronomi 11

Bawipa Lianhngannak

1“Cucaah Bawipa na Pathian cu na dawt lai i a bia le a nawlbia hna le a phunglam hna le a phungbia hna cu na zulh zungzal lai. 2Cun nihin ah ruat tuah u (a hngalh zong a hngal lo i a hmuh zong a hmu lomi nan tefa hna sinah mah hihi ka chim lo), Bawipa nan Pathian chimhhrinnak le a lianhngannak, a ṭhawngmi a kut le aa samhmi a ban, 3Izipt ram chungah Izipt siangpahrang Faro le a ram vialte cungah a tuahmi a hmelchunhnak le khuaruahharnak; * 4cun Izipt ralkapbu cungah, an rang hna le an rangleng hna cungah, nannih an in dawi tik hna ah a tuahmi, zeitindah Rili Sen ti kha a fenhter hna le zeitindah Bawipa nih nihin tiangin a hrawh hna, ti le; * 5cun hika hmun nan phak tiangin ramlak ah nan cungah zeidah a tuah, 6cun Reuben fapa Eliab i fapa hna Dathan le Abiram cungah a tuahmi zeitindah vawlei nih a kaa a an i annih kha an innchungkhar hna le an thlam hna le an thilnung vialte hna he Israel mi vialte laifang ah a dolh hna kha, ruat tuah u; * 7zeitintiah nan mit nih Bawipa nih rian ngan a tuahmi vialte kha an hmuh cang.

Kammi Ram A Ṭhatnak

8“Cucaah nihin kan pekmi hna nawlbia cu a dihlak in nan zulh lai, nannih nih nan ṭhawn i va co awkah nan kalhnawhmi ram cu nan luhhnawh i nan co nakhnga le, 9 Bawipa nih nan pupa hna sinah anmah le an tefa hna sinah pek awkin chiat a sermi ram, cawhnuk le khuaihliti in a luangmi ram ah cun, saupi nan um nakhnga. 10Zeitintiah nannih nih co awkah nan va luhhnawh laimi ram cu nan hung chuahnak Izipt ram, a chung i thlaici nan tuh tik i anhring dum bangin nan ke in ti nan toihmi ram bantuk kha a si lo; 11sihmanhsehlaw co awkah nan kalhnawh laimi ram cu tlang le nelrawn an umnak hmun, van ruah ti a dingmi, 12 Bawipa nan Pathian nih a zohkhenhmi ram a si; kum thawknak in kum donghnak tiang Bawipa nan Pathian mit cu a cungah aa fu zungzal.

13“Cun nihin ah nawl kan pekmi hna ka nawlbia, Bawipa nan Pathian dawt le, a rian nan lung dihlak le nan ruahnak dihlak in ṭuan cu, nan zulh hna ahcun, * 14nannih nih nan rawl le nan mitsur hang le nan chiti kha nan pumhkhawmh khawh hna nakhnga, nan ram caah ruah cu anmah caan te cio ah, tuan deuh ruah le tlai deuh ruah hna cu, an pek hna lai. 15Cun amah nih nan saṭil hna caah nan lo ah ram hno an pek hna lai i, nan ei lai i nan khim lai. 16I ralring tuah u. Cu ti a si lo ahcun nan lung cu dehhlen a si lai i, nan pial lai i, pathian dang hna rian kha nan ṭuan lai i nan biak sual ko hna lai; 17cu ti nan tuah ahcun Bawipa thinhunnak cu nan cungah a alh lai i, van khi a khar hna lai i, ruah a sur lai lo i, vawlei nih a theitlai a chuahter lai lo i, Bawipa nih an pekmi hna ram ṭha hin khulrang tein nan lo sual ko lai.

18“Cucaah hi ka bia hna cu nan lung chung le nan ruahnak chungah nan khumh hna lai i, nan kut ah chingchiahnak caah nan khih hna lai i, nan mit le nan mit kar i hmelchunhnak caah an si lai. 19Cun mah hna cu nan fale kha nan cawnpiak hna lai i, nan inn chung i nan ṭhut le lam i nan i chawh le nan ih le nan thawh tikah nan chim lengmang hna lai. 20Cun nan innka tung hna le nan kutka hna cungah nan ṭial hna lai, * 21zeitintiah van hna cu vawlei cung i an um chung paohpaoh cu, Bawipa nih nan pupa hna sinah pek awkin chiat a sermi ram chungah nan nunchung ni hna le nan tefa hna nunchung ni hna cu karhter an si lai. 22Zeitintiah tuah awk i nawl kan pekmi hna nawlbia hi a dihlak in, Bawipa nan Pathian dawt le amah lam vialte zulh le amah leiah i bek cu ṭha tein nan tuah ahcun, 23nan hmaiah a ummi miphun vialte hna hi, Bawipa nih a dawi hna lai i, nanmah nakin a ngan deuh le a ṭhawng deuh miphun hna hi nan pawnchuah hna lai. 24Nan keza nih a lamhmi hmun paoh cu nan ta a si lai; nan ram cu ramlak in Lebanon tiang, cun tiva in, Zufrates tiva in nitlaklei rili tiang a si lai. * 25Ahohmanh nih an in celh hna lai lo; Bawipa nan Pathian nih bia an kam cang hna bang khan, nan va lamh ding ram vialte cungah khan nanmah ṭihnak le phannak kha a chiah lai.

26“Zohhmanh, nihin ah hin nan hmaiah thluachuahnak le chiatserhnak ka chiah: 27nihin i nawl kan pekmi hna Bawipa nawlbia hna cu nan zulh ahcun, thluachuahnak a si lai, 28cun Bawipa nan Pathian nawlbia cu nan zulh lo i nan hngalh bal lomi pathian dang hna biak awkah nihin i nawl kan pekmi hna lam nan pial tak ahcun, chiatserhnak a si lai. 29Cun co awkah nan va luhhnawh laimi ram chungah Bawipa nan Pathian nih an luhpi hna tikah, thluachuahnak cu Gerizim Tlang ah nan chiah lai i chiatserhnak cu Ebal Tlang ah nan chiah lai. * 30Jordan tiva ral, nitlaknak lei lam hnulei, Arabah i a ummi Kanaan mi hna ram chung, Gilgal ral, Moreh kuhthing hna pawngah an um, a si lo mei? 31Zeitintiah Bawipa nan Pathian nih an pekmi hna ram cu a chungah va luh i va co awkah nannih nih Jordan cu nan tan lai; cun nannih nih nan co i a chungah nan um tikah, 32nihin ah nan hmai i ka chiahmi nawlbia le phunglam vialte kha ralring tein nan tuah lai.

⇑

[Remove Footnotes]