Deuteronomi 14

1“Nannih cu Bawipa nan Pathian i fapa nan si; mithi caah nan i at lai lo i nan mittlang hmul zong nan i met lai lo. * 2Zeitintiah nannih cu Bawipa nan Pathian ca i a thiangmi miphun nan si i Bawipa nih nannih cu amah ta hrimhrim si awkah, vawlei cung i a ummi miphun vialte hna lakin an thim hna. *

A Thiang le A Thianglo Rawl

(Lev 11.1-47)

3“Fihnung a simi thil zeihmanh nan ei lai lo. 4Mah hi hna hi nan ei awk saram cu an si lai: cawtum, tuu, meheh, 5sakhi, sazuk, saza, sathar, ramlak sia, ramlak caw, tlangcung tuu. 6Zei saram paoh a tin a ṭe i a tin cheu hnih ah aa cheu i rawlret a khaimi cu, saram hna lakah nan ei awk an si lai. 7Sihmanhsehlaw rawlret a khaimi lakah siseh, tinṭe lakah siseh, mah hi nan ei hna lai lo: kalauk, saveh, le sakuh, zeicahtiah rawlret cu an khai nain an tin a ṭe lo, cucaah nan caah an thiang lo. 8Cun vok, zeicahtiah a tin cu a ṭe nain rawlret a khai lo, cu caah nan caah a thianglo. An sa nan ei lai lo, an ruak zong nan tawng lai lo.

9“Ti chung i a ummi thil vialte lakah mah hna hi nan ei lai: ṭeh le phokphawher a ngeimi paoh nan ei hna lai. 10Ṭeh le phokphawher a ngei lo paoh cu nan ei hna lai lo, nan caah thianglo a si.

11“A thiangmi va vialte cu nan ei hna lai. 12Sihmanhsehlaw mah hna hi nan ei lo awk cu an si lai: muvanlai, langta, mu-ar-cawi, 13ngawihuk, kaite phun paohpaoh, 14langak phun paohpaoh, 15ostrik, thlanghnap, rili va, mupi phun paohpaoh, 16chimbu ngan le chimbu hme, ti-ar, 17pelikan, saruak eimi langta, tingala, 18tivakok, le ram varang phun paohpaoh, chuangtuar le palak. 19Cun thla a ngeimi buṭit-khaubawk paohpaoh cu nan caah thianglo an si; nan ei hna lai lo. 20Thla ngei a thiangmi thil vialte nan ei hna lai.

21“Zeihmanh amah thih in a thimi cu nan ei lai lo; ramdangmi nan khua chung i a ummi hna kha nan pek hna lai, an duh ahcun an ei hna lai, asiloah phun dangmi sinah nan zuar khawh lai; zeitintiah nannih cu Bawipa nan Pathian caah a thiangmi miphun nan si.

“Meheh fa cu a pi hnuk in nan chuang lai lo. *

Cheu Hra Cheu Khat Peknak

22“Kum fate in lo in a chuakmi nan thlaici theipar vialte cu cheu hra ah cheu khat nan pekchanh lai. * 23 Bawipa nan Pathian kha ṭih awk nan hngalh zungzal nakhnga, nan rawl chungin siseh, nan mitsur hang chungin siseh, nan chiti chungin siseh cheu hra cheu khat le nan saṭil run chung le nan tuurun chung i fater hna cu, Bawipa nan Pathian hmaiah, a min umnak ding i a thim hngami hmun ah cun nan ei lai. 24 Bawipa nan Pathian nih thluachuah an pek tik hna ah, Bawipa nan Pathian nih a min umnak dingah a thim laimi hmun cu a hlat tuk caah nan caah khuallam a sau tuk caah, cheu hra cheu khat cu nan i phorh khawh lo ahcun, 25tangka ah nan canter lai i nan i ken lai i, Bawipa nan Pathian nih a thimmi hmun ah cun nan kal lai i, 26nan duhmi paoh ah nan i hloh lai, cawtum hna maw, tuu hna maw, mitsur hang maw, zu maw, nan hawtmi paoh ah nan hman lai; cun cuka ah cun Bawipa nan Pathian hmaiah nan ei hna lai i nan i lawm lai, nanmah he nan chungkhar hna he. 27Cun nan khua chungah a ummi Levi mi kha nan hlaw lai lo, zeitintiah anih cu nanmah sinah covo siseh, ro siseh a ngei lo. 28“Cun kum thum donghnak lengmang ah cu kum i nan voimi cheu hra cheu khat vialte cu nan chuahpi lai i nan khua chungah nan chiah hna lai; 29cun, Bawipa nan Pathian nih nan kut rian nan tuahmi vialte ah thluachuahnak an pek hna nakhnga, nan khua chungah a ummi Levi mi hna, annih cu nannih sinah covo le ro an ngeih lo caah, le mipem le pangeilo le nuhmei hna nih cun an rat i an ei i an khim nakhnga nan chiah hna lai.

⇑

[Remove Footnotes]