Deuteronomi 15

Luatnak Kum

(Exo 21.1-11; Lev 25.1-7)

1“Kum sarih donghnak lengmang ah leiba ngaihthiamnak nan tuah lai 2Ngaihthiamnak ning cu hi bangin a si lai: cawihtu paohpaoh nih a innpa sinin a hmuh awk hnga kha a ngaihthiam lai. Bawipa ngaihthiamnak cu thanh a si cang ruangah, ahohmanh nih a innpa, a unau cu, a cawh chih len lai lo. 3Ramdangmi cu nan cawh sawk hna lai, sihmanhsehlaw nan unau sinin nan hmuh awk hnga paoh kha cu nan ngaihthiam awk a si. 4Nannih lakah mipam nan um lai lo (zeitintiah Bawipa nan Pathian nih ro ca i co awkah an pekmi hna ram chungah thluachuahnak an pek hna lai), 5 Bawipa nan Pathian aw kha nan ngaih i nihin ah kan pekmi hna nawlbia vialte hi ralring tein nan tuah paohpaoh ahcun Bawipa nih thluachuah an pek hrimhrim hna lai. 6Zeitintiah bia an kam hna bangin Bawipa nan Pathian nih thluachuahnak an pek hna lai i miphun tampi kha nan cawih hna lai; sihmanhsehlaw nan cawi hna lai lo; miphun tampi kha nan uk hna lai, sihmanhsehlaw annih nih cun an in uk hna lai lo.

Misifak Cawihmi Thil

7 Bawipa nan Pathian nih an pekmi hna nan ram chung i nan khua chungah nan lakah nan unau pakhatkhat mipam a um ahcun, cu nan unau mipampa cungah cun nan lung nan hahter lai lo i nan kut zong nan humkanh lai lo, * 8nan kut cu a samhtu nan samhpiak lai i zeipaoh a si ah, a herhnak aa zatnak in nan cawih lai. 9‘Kum sarihnak kum, ngaihthiamnak kum cu a nai cang,’ tiin nan ti i nan unau a si a fakmi kha hmuh nan duh lo i zeihmanh pe duh loin nan lung chungah ruahnak ṭhalo a um sual nakhnga lo, i ralring tuah u, nanmah kongah Pathian a auh ahcun nan caah sual a si ko lai. 10Lungtho tein nan pek lai i nan pek tik zongah nan lung chungin nan uam lai lo, zeicahtiah hi caah hin pei Bawipa nan Pathian nih nan rian vialte le nan tuahmi vialte ah thluachuahnak an pek hna lai cu. 11Zeitintiah sifakmi hna cu nan ram chungah an dong bal lai lo; cu caah hi nawlbia cu kan pek hna, ram chung i a ummi nan unau, sifak le retheimi hna cu nan kut kaupi in nan samhpiak hna lai. *

Sal Luatnak Kong

(Exo 21.1-11)

12“Nan unau, Hebru minu maw Hebru mipa cu nan sinah zuarh a si ahcun, kum ruk chung an rianh hna lai, cun kum sarihnak kum ah cun nanmah sinin nan luatter lai. * 13Cun nanmah sinin nan luatter tikah kutro in nan kalter lai lo; 14nan tuurun chungin siseh, nan phuhri chungin siseh, nan mitsur hang nennak khor in siseh, siang ngaiin nan pek lai; Bawipa nan Pathian nih thluachuah an pek hna ningin anih zong kha nan pek lai. 15Nannih nih Izipt ram i sal nan rak si le Bawipa nan Pathian nih an tlanh hna kha nan hngalh camcin lai; cucaah cun mah nawl hi nihin ah kan pek hna. 16Sihmanhsehlaw amah nih nanmah le nan chungkhar cu an dawt hna i nan sin i a um ah a lung aa lawmh i, ‘Nan sinin chuah ka duh lo,’ a ti ahcun, 17thir fung zum pakhat nan i lak lai i innka danh in a hna cu nan vih lai i amah cu nan sal a si zungzal lai. Cun nan salnu cungah cu bantuk ṭhiamṭhiam in nan tuah lai. 18Nanmah sinin nan chuahter tikah nan caah a har lem lai lo; zeicahtiah hlanmi rianṭuantu nih a hmuhmi a cheu lawng khan in kum ruk chung an rianh hna. Cucaah Bawipa nan Pathian nih zeizong nan tuahmi kip ah thluachuahnak an pek hna lai.

Fater Pekchanhnak

19“Nan cawrun chung le nan tuurun chung i fater a pa vialte hna cu Bawipa nan Pathian sinah nan pekchanh hna lai; nan cawrun chung i fater a pa hna cu rian ṭuannak ah nan hmang hna lai lo, nan tuurun chung i fater hna zong an hmul nan met hna lai lo. * 20 Bawipa nih a thim laimi hmun ah cun kumfate in Bawipa nan Pathian hmaiah nanmah le nan chungkhar nih cun nan ei lai. 21Sihmanhsehlaw do a tlak lo ahcun, a bei ah siseh, a mit a cawt ah siseh, a fakmi dotlak lonak zeipaoh a ngeih ahcun Bawipa nan Pathian sinah nan thawi lai lo. 22Nanmah le nan khua chung cio ah nan ei lai; a thianglo nih siseh, a thiang nih siseh, sakhi le sazuk nan ei bangin, aa khat in an ei lai. 23A thi bel nan ei lai lo; vawlei ah ti bantukin nan thlet lai. *

⇑

[Remove Footnotes]