Deuteronomi 16

Caan Ngeimi Puai Hna

(Exo 23.14-24)

1“Abib thla cu nan ulh lai i Bawipa nan Pathian lanhtak puai cu nan ulh lai; zeitintiah Bawipa nan Pathian nih Izipt ram chungin zan ah Abib thla ah an chuahpi hna. * 2A min umnak ah Bawipa nih a thim laimi hmun ah nan tuurun chungin siseh, nan cawrun chungin siseh, Bawipa nan Pathian sinah lanhtak puai thawinak cu nan pekchanh lai. 3Thilnu cawhmi changreu nan ei chih lai lo; thilnu cawh lo changreu, temhinnak changreu he cun ni sarih chung nan ei lai. Izipt ram chungin nan chuah ni kha nan nunchung vialte nan hngalh camcin nakhnga — Izipt ram chung i namhnaw ngaiin nan rak zam kha. 4Nan ram chung dihlak ah ni sarih chung nan sinah thilnu nan umter lai lo; a ni khatnak ni zanlei i nan thawimi sa zong zan khuadei a thaizing tiang zeihmanh nan taanter lai lo. 5 Bawipa nan Pathian nih an pekmi hna nan khua chungah lanhtak thawinak cu nan pechan lai lo; 6sihmanhsehlaw Bawipa nan Pathian nih a min umnak caah a thim laimi hmun ah, khika ah, zanleisang i ni a tlak cuahmah lio, Izipt ram in nan chuah caan ah khan, lanhtak thawinak cu nan pekchanh lai. 7Cun Bawipa nan Pathian nih a thim laimi hmun ah cun nan chuan lai i nan ei lai; zinglei ah nan kir lai i nan thlam ah nan kal hna lai. 8Ni ruk chung thilnu cawh lo changreu kha nan ei lai; ni sarihnak ni ah Bawipa nan Pathian caah a liannganmi pumhnak a um lai; cu ni ah cun rian nan ṭuan lai lo.

9“Zarh sarih nan rel lai; nan rawl ṭuan domh ni in zarh sarih nan rel lai. * 10 Bawipa nan Pathian nih thluachuah an pek hna ningin nan kut chung chuakmi chungin mah lungtho te pekchanhnak he cun Bawipa nan Pathian caah zarh hna puai cu nan tuah lai; 11cun Bawipa nan Pathian nih a min umnak dingah a thim laimi hmun ah cun nanmah le nan fapa le nan fanu le nan salpa le nan salnu le nan khua chung i a ummi Levi mi le nan lak i khua a sami khual le pangeilo le nuhmei hna he cun Bawipa nan Pathian hmaiah nan i lawm lai. 12Izipt ram ah sal nan rak si kha nan hngalh camcin lai i, hi nawlbia hna hi ralring tein zulh awk nan i zuam lai.

13“Deu puai cu ni sarih chung nan tuah lai, nan phuhri le nan mitsur hang nennak khor in nan pumhkhawmh tikah; * 14nanmah le nan fapa le nan fanu le nan salpa le nan salnu le nan khua chung i a ummi Levi mi, mipem, pangeilo le nuhmei nih nan puai ah cun nan i lawm lai. 15Nan dihlak in nan i lawmh nakhnga, Bawipa nan Pathian nih nan chuahpimi thil vialte le nan kut rian vialte ah thluachuahnak an pek hna lai, Bawipa nih a thim laimi hmun ah Bawipa nan Pathian caah ni sarih chung puai nan ngei lai.

16“Kum khat ah nan lak i pa vialte nih Bawipa hmaiah a thim laimi hmun ah voi thum an chuak lai: thilnu telh lo changreu puai le zarh hna puai le deu puai ah an si lai. Bawipa hmaiah kutro in an chuak lai lo; 17 Bawipa nan Pathian nih thluachuahnak an pek hna ning cio ah mi kip nih nan ti khawh tawk cio ah nan pek lai.

Biaceih Tikah Biading Hman Awk

18 Bawipa nan Pathian nih an pekmi hna nan khua dihlak chungah, nan phun ning cio ah, biaceihtu hna le bawi hna kha nan chiah hna lai i mi kha dinnak biaceihnak in bia an ceih hna lai. 19Dinglo piin bia kha nan ceih lai lo, duhdanh nan ngei lai lo, nawhthuh nan la lai lo, zeitintiah nawhthuh nih mifim mi mit kha a cawtter i miding mi bia kha a lehtalam tawn. * 20Biading, biading lawnglawng cu nan zulh lai, nan nun i Bawipa nan Pathian nih an pekmi hna ram cu nan co nakhnga.

21 Bawipa nan Pathian biakṭheng nan ser laimi pawngah cun zei thing hmanh Asherah si awkah nan phun lai lo, * 22lung zong nan phun lai lo, zeitintiah mah hna cu Bawipa nan Pathian nih a huat hna. *

⇑

[Remove Footnotes]