Deuteronomi 17

1 Bawipa nan Pathian sinah cawtum siseh tuu siseh dotla lo le tlin lonak zeihmanh a ngeimi paoh cu raithawinak ah nan hmang lai lo, zeitintiah mah cucu Bawipa nan Pathian caah fihnung a si.

2“Nanmah lakah, Bawipa nih an pekmi hna nan khua hna chungah, a biakamnak buarnak in Bawipa mithmuh ah thil ṭhalo kha a tuah i 3pathian dang kha a zulh hna i an rian a ṭuan i a biak hna i, ni siseh, thla siseh, van i a ummi arfi zeihmanh siseh kan thlauhmi hna kha a biak hna i * 4an in chimh hna i nan theih ahcun, fel tein nan hlat lai; cu bantuk thil fihnung cu Israel mi lakah tuah a si taktak le a fian ahcun, 5cu thil ṭhalo a tuahtu cu nu a si ah pa a si ah, nan hauka hna ah cun nan chuahpi hna lai i cu pa cu siseh, cu nu cu siseh, lung in thi lakin nan cheh hna lai. 6Thih awk hnga a simi cu biahngaltu pahnih maw pathum hna chimnak in thah a si lai; biahngaltu pakhat chimnak in cun ahohmanh thah an si lai lo. * 7Thah ding hnga cung i kut a thla hmasa biktu cu biahngaltu kha an si lai i, cu hnuah cun mi vialte kut kha an si lai. Cuticun nan lakin ṭhat lonak cu nan thianh lai. *

8“Mi i thahnak kong bia siseh, thilri kong bia siseh, i vuak i dennak kong bia siseh, nan khua chungah nan ca i a har tukmi tazacuainak zeipaoh a chuah ahcun, nan tho lai i Bawipa nan Pathian nih a thim laimi hmun ah cun nan kal lai i, 9Levi mi tlangbawi hna le cu caan i biaceihtu a simi sinah cun nan va kal lai i nan hal hna lai i biakhiahnak cu an in thanh hna lai. 10 Bawipa nih a thim laimi hmun in an in thanhmi hna ningin nannih nih nan tuah lai; cun an in fial hna ning tein ralring tein nan tuah lai; 11cawnpiaknak an in pek hna ning le biakhiahnak an in thanhmi hna ning tein nan tuah lai; annih nih an in thanhmi hna biakhiahnak khan orhlei ah siseh kehlei ah siseh nan pial lai lo. 12 Bawipa nan Pathian hmai i rianṭuan awkah a dirmi tlangbawi siseh, biaceihtu siseh, an bia ngaih loin hramhram in a tuahtu cu a thih awk a si lai; cuticun Israel chungin ṭhat lonak cu nan thianh lai. 13Mi vialte nih an theih lai i an ṭih lai i hramhram in an tuah ṭhan ti lai lo.

Siangpahrang Ngeihnak Kong

14 Bawipa nan Pathian nih an pekmi hna ram kha nan phak i nan co i a chung i nan um i, ‘Kan pawngkam ah a ummi miphun vialte bantukin kan cungah siangpahrang kan chiah ve lai,’ nan ti tikah, * 15 Bawipa nan Pathian nih a thim laimi cu nan cung i siangpahrang si awkah cun nan chiah lai. Nanmah nan unau hna chungin siangpahrang ah cun pakhat nan i chia lai; nan unau a si lomi, ramdangmi cu nan cungah nan chia lai lo. 16Amah belte amah caah rang kha a tamter chin hna lai lo, a rang tamter awkah mi kha Izipt ram ah a kirter fawn hna lai lo, zeicahtiah Bawipa nih nannih sinah, ‘Khi leiah nan kir hrimhrim ti lai lo,’ tiah a chim cang. * 17Cun amah caah nupi zong a tamter hna lai lo, a lung a pial sual hnga; ngun le sui zong amah caah a tamter chin luaimai hna lai lo. *

18“Cun a pennak siangpahrang ṭhutdan ah a ṭhut tikah, Levi mi tlangbawi hna nih an zohkhenhmi hi phungbia hi, cauk pakhat ah aa tlen lai, 19-20hi phungbia chung bia vialte hna le hi nawlbia hna ulhnak le tuahnak hin Bawipa a Pathian ṭih cu a thiam nakhnga le, a unau hna cungah a lung aa hlorh i nawlbia in kehlei ah siseh, orhlei ah siseh, a pial nakhnga lo le, Israel chungah amah le a fale hna nih amah a ram chungah hin saupi an uk nakhnga, amah sinah a chiah lai i a nun chung vialte a rel lai.

⇑

[Remove Footnotes]