Deuteronomi 19

Himnak Khua Hna

1 Bawipa nan Pathian nih an pekmi hna ram a ngeitu miphun hna cu Bawipa nan Pathian nih a hloh hna i nannih nih nan pawnchuah hna i an khua chung le an inn chungah nan um tikah, 2 Bawipa nan Pathian nih co awkah an pekmi hna ram chungah cun nan caah khua pathum a dang tein nan i chiah lai. 3Lam kha nan sial hna lai i co awkah Bawipa nan Pathian nih an pekmi hna ram cu hmun thum ah nan cheu lai, khika cu mithattu hna an zaam khawhnak hmun a si lai.

4“Cun mithattu nih cuka ah a zaam i a nunnak khamh a si khawh nakhnga, hi bantuk hin a si lai. Mipa pakhatkhat nih a innpa, hlanah i huatnak um loin, a thah sual, — 5tahchunhnak ah, mipa pakhat cu a innpa he ramlak ah thinghlam awkah a kal, thing cu hau awkah a kut in hreitlung cu a vun i thlir i a fang cu a haa in a tlong i a innpa pa cu a khen i a thi — cu bantuk mi cu hi bantuk khua pakhatkhat ah a zaam i a nunnak a khamh awk a simi cu a si lai; 6cu ti a si lo ahcun, thisen phuhlamtu nih khan thinlinh in a dawi lai i lam kha a hlat caah a phak lai i a thah sual lai; asinain cu pa cu thih awk tlak a si ṭung lomi a si, zeicahtiah a innpa he khan hlanah zeihmanh huatnak an rak ngei lo. 7Cucaah nawl kan pek hna, khua pathum in a dang tein nan chiah lai. 8Cun Bawipa nan Pathian nih nan pupa hna sinah chiat a ser bangin, nan ramri kha a kauhter i nan pupa hna sinah pek awkin bia a kammi ram vialte kha an pek hna tikah, — 9 Bawipa nan Pathian kha nan dawt i a lam kha a zungzal in nan zulhnak thawngin, nihin i kan pekmi hna nawlbia vialte hi ṭha tein nan ulh hna ahcun a si kho lai — khi tikah hi khua pathum ah hin a dang khua pathum nan chap hna lai, 10zeitintiah Bawipa nan Pathian nih ro caah an pekmi hna ram chungah hin a sual lomi thi thlet a si sual nakhnga lo le, cu thi thlet mawhnak cu nan cungah a tlak nakhnga lo.

11“Sihmanhsehlaw mipa pakhatkhat nih a innpa kha a huat i a bawh i a tuk i fak piin a hliam i a thih i hi khua pakhatkhat ah a zam ahcun, 12khi tikah a khua upa hna nih khan mi an hei thlah hna lai i cuka cun an va lak lai i a thih nakhnga thisen phuhlamtu sinah khan an chanh lai. 13Nan mit nih a zaangfah lai lo, sihmanhsehlaw nan caah a ṭhat nakhnga, Israel chungin a sual lomi thisen mawhnak cu nan thianh lai.

14 Bawipa nan Pathian nih co awkah an pekmi hna ram chung i nan co laimi ram chungah a ummi, hlanmi nih an rak chiahmi nan innpa ramri kha nan ṭhial lai lo. *

Hngaltu Sinak Kong Phungbia

15“Mi pakhatkhat cu tuahnak ṭhalo kongah siseh, nawl buarnak a tuahmi he aa tlaimi sualnak kongah siseh, biahngaltu pakhat lawng cu a za lai lo; biahngaltu pahnih maw pathum hna nih an chimnak lawngin sualpuhnak cu fehter a si lai. * 16Huatnak lungthin a pawimi biahngaltu pakhatkhat nih mi pakhatkhat cu ṭhat lo tuah a puh ahcun, 17taza aa cuaimi cu an phu hnih in Bawipa hmaiah an chuak lai, khi caan i rian a ṭuanmi tlangbawi hna le biaceihtu hna hmaiah cun; 18biaceihtu hna nih cun fel tein an hlat lai i biahngaltu cu biahngaltu dinglo a si i a unau kha dinglo piin a puh a si ahcun, 19a unau cung i tuah a rak i tinhmi bantuk khan a cungah nan tuah lai; cuticun nan lakin ṭhat lonak cu nan thianh lai. 20Cun a taangmi nih an theih lai i an ṭih lai i nannih lakah cu bantuk ṭhat lonak cu zeitikhmanh ah an tuah ti lai lo. 21Nan mit nih a zaangfah awk a si lai lo; nunnak caah nunnak, mit caah mit, ha caah ha, kut caah kut, ke caah ke, a si ko lai. *

⇑

[Remove Footnotes]