Deuteronomi 20

Raltuknak Kong Phungbia

1“Nannih nih nan ral hna doh awkah nan kal i, rang hna le rangleng hna le nanmah i nakin a ngan deuhmi ralkapbu nan hmuh tikah, nan ṭih hna lai lo; zeitintiah Izipt ram in an chuahpitu hna Bawipa nan Pathian kha nan sinah a um. 2Cun raltuknak hmun kha nan phak dengmang tikah tlangbawi kha hmaiah a ra chuak lai i 3mizapi sinah cun, ‘Maw Israel, thei tuah u, nihin cu nan ral doh awkah raltuknak hmun cu nan phan dengmang cang; nan lung der hlah seh, ṭih hlah u, a ther zong ther hlah u, anmah kha ṭih hna hlah u; 4zeitintiah teinak cu in pek hna awk le nan ral cu in dohpiak hna awkah nannih sinah a kalmi cu Bawipa nan Pathian cu a si,’ tiah a ti lai. 5Cun bawi hna nih cun mizapi sinah cun, ‘Inn thar a sa i a pechan rih lomi nan um maw? Cu pa cu a inn ah kir ṭhan seh, raltuknak hmun ah a thih sual ahcun midang nih an pekchanh sual lai. 6Mitsur dum a ser i a theitlai aa nuamhpi rih lomi nan um maw? Cu pa cu a inn ah kir ṭhan seh, raltuknak hmun ah a thih sual ahcun midang nih an i nuamhpi sual lai. 7Nupi a ham i a ṭhi rih lomi nan um maw? Cu pa cu a inn ah kir ṭhan seh, raltuknak hmun ah a thih sual ahcun midang nih an ṭhit sual lai,’ tiah an chim lai. 8Cun cu hleiah bawi hna nih cun mizapi sinah cun, ‘Thinphang le lungder nan um maw? Cu pa cu a inn ah kir ṭhan seh, a hawile lung zong kha amah lung bantukin a zor sual lai,’ tiah an chim lai. 9Cun bawi hna nih cun mizapi sin bia chim cu an ngol tikah, mizapi hna lu ah cun haotu chiah an si lai.

10“Doh awkah khua nan hei naih tikah remnak kha nan pek hmasa hna lai. 11An lehnak hna cu remnak a si i nan sinah aa hun ahcun, cu chung i a ummi mi vialte cu nan caah hnekmi rian a ṭuantu an si lai i an in rianh hna lai. 12Sihmanhsehlaw nannih he remnak kha a ser lo i an doh hna ahcun, nannih nih nan kulh lai; 13cun Bawipa nan Pathian nih nan kut chungah an pek hna tikah, khuachung pa vialte cu nam in nan sam dih hna lai, 14sihmanhsehlaw nu le ngakchia le saṭil le khua chung i a ummi thil dang zeipaoh, cun a hranchaw vialte zong cu nan ca i hranchaw ah nan i lak hna lai; cun Bawipa nan Pathian nih an pekmi hna nan ral hna hranchaw cun nan i cenh lai. 15Hika i a ummi miphun hna khua a si lomi, nan umnak in lam hlapi ah a ummi khua vialte hna cu, cu bang cun nan tuah hna lai. 16Sihmanhsehlaw Bawipa nan Pathian nih ro caah an pekmi hna, hi miphun hna khua chung tu ah hin cun, thaw a chuahmi zeihmanh a nung in nan zuah lai lo, 17sihmanhsehlaw Hit mi hna le Amor mi hna le Kanaan mi hna le Periz mi hna le Hiv mi hna le Jebus mi hna cu, Bawipa nan Pathian nih nawl an pek hna bangin nan hrawh cikcek hna lai; 18zeicahtiah, annih nih an pathian hna biaknak ah an tuah tawnmi thil fihnung hna cu an in cawnpiak sual hna hnga i Bawipa nan Pathian cungah nan sual sual hnga.

19“Khua pakhatkhat cu caan saupi nan kulh i lak awkah nan doh tikah, a thingkung hna cu hreitlung i haunak in nan hrawk hna lai lo; an thei cu nan ei hna lai, sihmanhsehlaw nan hau hna lai lo. Lo chung i thingkung hna cu minung maw an si i nannih nih nan kulh hna lai cu? 20Rawl caah a si lomi thingkung a si ti nan hngalhmi thingkung bel kha nan hrawh hna lai i nan hau hna lai i, nannih he aa domi khua kha a tluk hlantiang a kulhnak ah nan hman hna lai.

⇑

[Remove Footnotes]