Deuteronomi 21

Lainawng Hngalh Lomi Ca Thianhnak

1 Bawipa nan Pathian nih co awkah an pekmi hna ram chungah, ramlak sawhsawh ah mi, thah a si mi kha, a rilh ko i aho nih dah a thah ti kha hngalh a si lo ahcun, 2nan upa hna le nan biaceihtu hna kha an chuak lai i thah a simi pawngkam ah a ummi khua kha zei can hlat dah an si tiah an tah hna lai; 3cun thahmi mipa a naih bik khua upa hna nih khan, cawla pakhat rian a ṭuan bal rih lo i hngawng kual zong banh a si bal rih lomi cu an lak lai. 4Cun cu khua upa hna nih cun cawla cu, ti a um zungzalnak, leh bal lomi le thlaici cin bal lonak nelrawn ah an kalpi lai i cuka nelrawn chungah cun cawla cu a hngawng an khiah lai. 5Cun Levi fapa hna, tlangbawi hna kha hmaiah an ra chuak lai, zeitintiah Bawipa nih amah rian ṭuan awkah le Bawipa min in thluachuah pek awk caah a thim cang hna i, an bia in tazacuainak vialte le i tukdennak vialte cu biachah a si lai. 6Cun thahmipa a naih bik khua upa vialte nih, nelrawn ah a hngawng khiah a simi cawla cungah khan an kut an i ṭawl lai i, 7‘Hi thi hi kannih kan kut nih a chuah lo i, a chuah kha kan mit zong nih a hmu lo. 8Maw Bawipa, na tlanhmi na mi Israel cu ngaithiam ko law, sualnak a tuah lo thisen mawhnak cu na mi Israel lakah chia sawh hlah; thisen chuah mawhnak cu ngaihthiam ko hna,’ tiin hngaltu sinak bia an chim lai. 9Cu bantukin Bawipa hmaiah a dikmi kha nan tuah tikah sualnak a tuah lo thisen chuah mawhnak cu nan lakin nan thianh lai.

Phungbia Dangdang Hna

10“Nan ral hna kha doh awkah nan kal i Bawipa nan Pathian nih nan kut chungah an pek hna i sal ah nan tlaih hna tikah, 11cu hna lakah cun aa dawhmi nu na hmuh i na duh i na nupi caah lak awk i na duh ahcun, 12na inn ah na tlunpi lai i a lu aa meh lai i a tin aa riam lai. 13Cun saltang a sinak puan kha a hlawt lai i na inn chungah a um lai i thla khat pumte a nu le a pa kha a ngaih hna lai; cu hnuah cun na ihpi lai i a va na si lai i na nupi a si lai. 14Khi tikah a cungah na lung a hmui lo ahcun, a duhduhnak ah na kalter lai; sihmanhsehlaw phaisa ah na zuar lai lo, sal bantukin na tuah lai lo, a min na chiatter cang caah.

15“Mipa pakhatkhat nih nupi pahnih a ngeih i pakhat cu a dawt i pakhat cu a dawt lo i, dawtmi he dawt lomi he fa an hrinpiak veve i fapa hrin hmasa bik cu dawt lomi i fapa a si ahcun, 16a ro cu a fapa hna kha ro caah a phawt hna ni ah, a dawtmi nupi fapa kha, a dawt lomi nupi fapa, fater a simi nakkhan, upa ah a ser lai lo; 17sihmanhsehlaw, a dawt lomi nupi fapa kha fater a sinak kha a hngalhpi ko lai i a ngeihmi vialte chung khan vo hnih a pek ko lai; zeitintiah amah cu a thazang theitlai hmasa bik a si; fater sinak cu amah ta a si ko.

18“Mipa pakhatkhat nih lung a khawng i ralchanh a hmangmi fapa a ngeih i, a pa bia siseh a nu bia siseh a ngaih duh lo i, an chimhring nain zel ah a rel hna lo ahcun, 19a nu le a pa nih an tlaih lai i a khuachung upa hna sinah, a umnak khua hauka ah cun an chuahpi lai, 20cun a khua upa hna sinah cun, ‘Hi kan fapa hi a lung a khawng i ralchanh hmangmi a si, amah nih kan bia ngaih a duh lo, mihrokhrawl le zurit hmang a si,’ an ti lai. 21Khi tikah khuachung pa vialte nih lung in thi lakin an cheh lai; cuticun ṭhat lonak cu nan lakin nan thianh lai i Israel mi vialte nih an theih lai i an ṭih lai.

22“Cun mi pakhatkhat nih thihnak tlak sualnak a tuah i nan thah i thingkung cungah nan thlai ahcun, 23a ruak cu thingkung cungah cun zan khuadei in a um lai lo, sihmanhsehlaw cu ni lila ah cun nan phum lai, zeitintiah thlaimi cu Pathian chiatserhmi a si; ro caah Bawipa nan Pathian nih an pekmi hna nan ram cu nan thurhhnawmh lai lo. *

⇑

[Remove Footnotes]