Deuteronomi 24

1“Mi nih nupi a lak i a ṭhit tikah, a chungah thil dawh lo zeimaw a hmuh caah a mit a tlin lo i maknak ca a ṭialpiak i, a kut chungah a chiah i, a inn chungin a kalter i a inn chungin a chuah ahcun, * 2cun a kal i midang nupi a can i, 3a va hmannung deuh nih cun a duh lo i, maknak ca a ṭialpiak i a kut chungah a chiah i a inn in a kalter ah siseh, nupi caah a latu a va hmanung deuh kha a thih ah siseh, 4khi tikah a rak kaltertu a va hmasa nih khan, thurhhnawmh a si hnuah, a nupi si awk caah a la ṭhan ti lai lo; zeitintiah mah cucu Bawipa hmaiah fihnung a si i, ro caah Bawipa nan Pathian nih an pekmi hna ram cungah mawhnak nan tlunter lai lo.

5“Nupi a ṭhi kate mi cu ralkapbu he kalter awk a si lai lo, cu rian he aa pehmi zong fial awk a si lai lo. A ṭhitmi a nupi he lunglawm tein um awkah, inn ah kum khat chung a duhduh in nan umter lai.

6“Ahohmanh nih rawlrialnak siseh rawlrialnak a cunglei lung siseh nan i hrenpiak lai lo, zeitintiah mah cucu minung nunnak hrenpiak a si ko.

7“Ahohmanh nih Israel mi chungin a unau pakhatkhat kha a fir i sal bantukin a tuah i a zuar i hngalh a si ahcun, mifirtu cu thah a si lai; cu bangin ṭhat lonak cu nan lakin nan thianh lai. *

8“Thinghmui zawtnak kong ah i ralring tuah u, Levi tlangbawi hna nih an in chimhmi hna bangin ṭha tein tuah u; nawl kan pek hna bangin nannih nih ralring tein nan tuah lai. * 9Izipt ram in nan chuah tikah khan Bawipa nan Pathian nih lampi ah Miriam cungah zeidah a tuah kha hngal camcin tuah u. *

10“Na innpa kha zeipaoh na coih tikah biahrennak lak awkah a inn chungah na lut lai lo. * 11A lengah na dir lai i thil na coihmi pa nih khan na sinah biahrennak cu a rak put lai. 12Cun misifak a si ahcun a biahrennak thil chungah cun na it lai lo; 13ni a tlak tikah biahrennak thil cu na khirh ṭhan lai, a puan chungah a ih i thluachuahnak an pek nakhnga; mah cucu Bawipa na Pathian hmaiah na caah dinnak a si lai.

14“Rianṭuan na fialmi misifak le mirethei cu, na unau chungmi a si ah, na khuachung i a ummi mipem a si ah, na hrem hna lai lo; * 15ni a tlak hlanah, a ṭuan ni ah cun, a rianṭuan man cu na pek lai (zeitintiah sifak a si i a herh ngaingai ko); cu ti a si lo ahcun Bawipa kha nangmah kongah a auh lai i na cungah sualnak a si sual lai.

16“Fale ruangah pale thah an si lai lo i pale ruangah fale zong thah an si lai lo; mah le sual ruang cio ah thah cu an si lai. *

17“Mipem siseh, pangeilo siseh, a hmuh awk hnga biading cu nan merhpiak lai lo, nuhmei puan zong biahrennak ah nan la lai lo; * 18sihmanhsehlaw Izipt ram ah sal nan rak si i khika in Bawipa nan Pathian nih an tlanh hna kha nan hngalh camcin lai; cucaah mah hihi tuah awkah nawl kan pek hna.

19“Nan lo chung i rawl nan ṭuan tikah, lo chungah cun faphal pakhat nan philh ahcun lak ṭhan awkah va kal hlah u; mipem le pangeilo le nuhmei caah a si lai, nan kut rianṭuanmi kip ah Bawipa nan Pathian nih thluachuahnak an pek hna lai. * 20Nan oliv kung nan huai tik hna ah, a nge kha nan tu ṭhan hna lai lo; mipem le pangeilo le nuhmei caah a si lai. 21Nan mitsur dum chung i mitsur tlai kha nan lawh tikah, a mua nan sua ṭhan lai lo; mipem le pangeilo le nuhmei caah a si lai. 22Izipt ram ah sal nan rak si kha nan hngalh camcin lai; cucaah mah hihi tuah awkah nawl kan pek hna.

⇑

[Remove Footnotes]