Deuteronomi 28

Nawlngaih Thluachuahnak

1 Bawipa nan Pathian aw kha nan ngaih i nihin ah kan pekmi hna nawlbia vialte cu ṭha tein nan tuah ahcun, vawleicung miphun vialte hna cungpi ah khin Bawipa nan Pathian nih an chiah hna lai. * 2Cun Bawipa nan Pathian aw kha nan ngaih ahcun hi thluachuahnak vialte hi nan cung a phan lai i an zulh hna lai. 3Khua chungah thluachuah nan hmu lai i lo chungah thluachuah nan hmu lai. 4Nan pum theitlai le nan vawlei theitlai, nan saṭil theitlai, nan caw karhnak le nan tuu punzamnak cu thluachuah pek a si lai. 5Nan bawm le nan changreu nennak kheng hna cu thluachuah pek an si lai. 6Nan luh leiah thluachuah nan hmu lai, nan chuah leiah thluachuah nan hmu lai.

7“Nanmah an dotu hna nan ral hna cu Bawipa nih nan hmaiah a sunghter hna lai; nanmah doh awkah lam pakhat in an ra lai i nan hmaiah lam pasarih in an zam lai. 8Nan buk nan han le rian nan ṭuanmi kip ah Bawipa nih thluachuahnak kha nan caah nawl a pek lai i, Bawipa nan Pathian nih an pekmi hna ram chungah cun thluachuahnak an pek hna lai. 9 Bawipa nan Pathian nawlbia hna kha nan ulh i a lam ah nan kal ahcun, nan sinah chiat a ser cang bangin, Bawipa nih nannih cu amah ca i miphun thiang ah an fehter hna lai.

10Cun vawleicung mi vialte nih Bawipa min in kawh nan si kha an hngalh lai i, an in ṭih hna lai. 11 Bawipa nih nanmah pek awkah nan pupa hna sinah chiat a rak sermi ram chungah khan Bawipa nih nan pum theitlai le nan saṭil theitlai le nan vawlei theitlai ah tam piin an rumter hna lai. 12Nan ram ruah cu amah caan te ah surter awk le nan kut rianṭuanmi cu thluachuah pek awkah, Bawipa nih a ro khonnak hmun ṭha, van hna cu, an hunpiak hna lai. Miphun tampi cu nan coih hna lai, sihmanhsehlaw ahohmanh nan cawi hna lai lo. 13-14Khuazing dang biak awkah orhlei ah siseh, kehlei ah siseh nihin ah kan pekmi hna nawlbia in nan pial lo ahcun, Bawipa nih nannih cu mei ah si loin, lu ah an ser hna lai; a zik ah nan um zungzal lai i a hram ah nan um bal lai lo, — nihin ah kan pekmi hna Bawipa nan Pathian nawlbia kha nan ngaih i fel tein nan ulh ni ahcun, cuticun nan si lai.

Nawlngaih Lonak Theitlai Hna

15“Sihmanhsehlaw nihin ah kan pekmi hna phungbia le nawlbia vialte kha fel tein ulh awkah Bawipa nan Pathian bia cu zeirello in nan um ahcun hi chiatnak vialte hi nan cungah a tlung lai i an zulh hna lai. 16Khua chungah chiat nan tong lai, lo chungah chiat nan tong lai. 17Nan bawm le nan chang nennak kheng hna cu chiat an tong lai. 18Nan pum theitlai le nan vawlei theitlai le nan saṭil karhnak le nan tuurun fano hna cu chiat an tong lai. 19Nan luh leiah chiat nan tong lai, nan chuah leiah chiat nan tong lai.

20“Nan ka hlawt caah, cu ṭhat lonak nan tuahmi ruangah, nan rawk i khulrang in nan loh hlantiang, zeizong nan tuahmi kip ah khan Bawipa nih nan cungah chiatnak le hnahnawhnak le hnabeidonghnak a tlunter lai. 21Co awkah nan luhhnawhmi ram in an thianh hna hlantiang, Bawipa nih rai kha nannih sinah a behter lai. 22 Bawipa nih ngornak, taklinhnak, phinnak le niritnak, rocarnak, thutnak le buarnak in an hrem hna lai; nan rawk hlantiang an in dawi hna lai. 23Cun nan lu cung van hna khi dar an si lai i, nan tanglei vawlei hi thir a si lai. 24Nan loh dih hlantiang Bawipa nih nan ram ruah cu leidip ah a canter lai i van in nan cungah thetse a sur lai.

25 Bawipa nih nannih cu nan ral hna hmaiah khan an sunghter hna lai; annih doh awkah lam pakhat in nan kal lai i an hmai in lam pasarih in nan zam lai; vawleicung pennak vialte hna mithmuh ah tuksapur nan si lai. 26Cun nan ruak hna cu van i a zuangmi va vialte le vawlei i a ummi saram hna caah rawl an si lai i, a ṭhawltu ahohmanh an um lai lo. 27 Bawipa nih Izipt ram khuaihli le tawlhmat le cuarhmat le thakpherh in an hrem hna lai i damh khawh nan si lai lo. 28 Bawipa nih hruhnak le mitcawtnak le molhnak in an hrem hna lai i, 29mitcaw nih mui lakah aa dah lengmang bantukin chun lai ah nan i dap lai i, nan lam ah khua awng nan pem lai lo. Hrem le ramh lawnglawng nan si thluangthluan ko lai i an bawmtu hna ahohmanh an um lai lo. 30Nupi nan ham lai i midang nih an ihpi lai; inn nan sak lai i nan umnak lai lo; mitsur dum nan ser lai i a theitlai cu nan ei lai lo. 31Nan cawtum cu nan mithmuh ah an thah lai i a sa cu nan ei lai lo; nan hmaika ah nan laa cu hramhram in an lak lai i an in khirh ṭhan ti hna lai lo; nan tuu hna cu nan ral kha pek an si lai i, ahohmanh an bawmtu hna an um lai lo. 32Nan fapa hna le nan fanu hna cu miphun dang kha pek an si lai; chun nitlak in anmah ngaih ah nan mit hram fak in khua nan cuan lai, sihmanhsehlaw zeihmanh nan tuah kho ṭung lai lo. 33Nan hngalh lomi miphun nih nan vawlei le nan rianṭuanmi theitlai cu an ei dih lai i, nannih cu hrem le lamhchih lawng nan si lai; 34cucaah nan mit nih a hmuhmi thil nih cun an molhter phah hna lai. 35 Bawipa nih nan khuk le nan ke ah a fakmi khuaihli an tlunhter hna lai i damh khawh nan si lai lo, nan kechik in nan luthlung tiang an tuah hna lai.

36“Nanmah nih siseh nan pupa hna nih siseh nan hngalh bal lomi miphun sinah, nanmah le nan cungah nan chiahmi nan siangpahrang cu Bawipa nih ah kalpi hna lai i, khika ah thing le lung in sermi khuazing dang kha nan biak hna lai. 37Cun Bawipa nih an hruai hna lainak mi hna lakah cun nannih cu tuksapur le phungthlukbia le nihchuak capo men ah nan cang lai. 38Khaubawk nih an ei dih lai caah, lo chungah thlaici tampi nan hei i phorh lai nain tlawmte lawng nan zun lai. 39Mitsur dum nan ser lai i nan zohkhenh hna lai, sihmanhsehlaw a mitsur hang kha nan ding lai lo i a thei zong nan lo lai lo, zeitintiah rungrul nih a ei dih hna lai. 40Nan ram chung dihlak ah oliv kung nan ngei lai, sihmanhsehlaw nan oliv thei cu an ṭilh lai caah oliv chiti nan i thuh lai lo. 41Fapa hna le fanu hna cu nan hrin hna lai, sihmanhsehlaw nanmah ta an si lai lo, zeitintiah sal ah an hruai hna lai. 42Thingkung vialte le nan vawlei theitlai cu khaubawk ta an si lai. 43Nan lak i a ummi mipem nih an in sankanh chinchin hna lai i nannih cu nan niam chin lengmang lai. 44An in coih hna lai i nannih tu nih cun nan coih hna lai lo; lu an si lai i nannih cu mei nan si lai. 45A phungbia hna le a nawlbia hna an pekmi hna kha ulh awkah Bawipa nan Pathian aw cu nan ngaih lo caah, nan rawk dih hlantiang hi chiatnak vialte cu nan cungah an tlung lai i, an in zulh hna lai i an in phanh hna lai. 46Nanmah le nan tefa hna cungah zungzal in hmelchunhnak le khuaruahharnak caah an um lai.

47“Zeizong vialte nan ngeih tengtung zong i Bawipa nan Pathian cu lunglawmhnak le thanuamhnak he a rian nan ṭuan lo caah, 48cucaah Bawipa nih an thlahhnawhmi hna nan ral hna cu rawlṭam tihal, puan lo le zeizong vialte herhbau cukmak in nan rianh hna lai i, an hrawh hna hlantiang thir hngawngkual nan hngawng ah an banh hna lai. 49 Bawipa nih lamhlat piin, vanhramdeng in, mupi a zuan bantuk i a khul a rangmi, an holh nan theih lomi, 50tar zei ah a rel lo i no zong a duh hlei lomi, zaangfahnak ngei lomi miphun cu nan cungah a tlunter lai. 51Nan rawk dih hlantiang nan saṭil tefa le nan vawlei theitlai cu an ei lai; an in hloh dih hna hlantiang in, rawl siseh, mitsur hang siseh, chiti siseh, nan saṭil karhnak siseh, nan tuurun fano hna siseh an in nganh hna lai lo. 52Nan ram chung dihlak i nan i bochanmi a sang le a fekmi ralhau an chimh dih tiangin, nan khua kip ah an in hren hna lai; Bawipa nan Pathian nih an pekmi hna nan ram chung dihlak ah nan khua kip ah an in hren hna lai. 53Nan ral hna nih vansang au in an in hren hna lai caah, Bawipa nan Pathian nih an pekmi hna nanmah pum chung chuakmi hrimhrim, nan fanu hna le nan fapa hna sa cu nan ei lai. 54Nanmah lak i mi nunnem bik le mitluangtlam bik zong nih a unau kha siseh, a dawtmi a nupi siseh, a tang rihmi a fale hna si hna seh, rawl kha a sianh hna lai lo; 55nan ral hna nih nan khua kip ah vansang au in an in hren hna lai caah, a ei liomi a fale sa kha ahohmanh kha a pe hna lai lo, zeicahtiah a caah zeihmanh a taangmi a um ti lo. 56Nan lak i a no bik le a nem bik, a no tuk ca le a nem tuk ca i a keza vawlei a tawng bal lomi nu, hmanh nih a pommi a va le a fapa le a fanu hna kha, rawl a sianh hna lai lo. 57Ral nih an khua kha an hren tikah ei awk zeihmanh a um lai lo caah a hrintharmi a fano le a phei le a phei kar in a chuakmi a hlam hmanh kha a thli tein a ei hna lai. *

58“Hi a lianngan i ṭihnung a simi min, Bawipa nan Pathian, hi nan ṭih nakhnga ca i hi cauk chungah ṭial a simi phungbia vialte hi ṭha tein nan zulh ṭung lo ahcun, 59 Bawipa nih nanmah le nan tefa hna cungah khuaruahhar a simi temhinnak, a fakmi le saupi a ummi temhinnak le a fakmi le saupi a ummi zawtnak hna cu nan cungah a tlunter lai. 60Cun nan rak ṭihmi Izipt ram zawtnak vialte kha nan cungah a tlunter ṭhan lai i nanmah ah an i beh lai. 61Nan rawk dih hlantiang, hi phungbia cauk chungah aa ṭial lomi zawtnak phun kip le temhinnak phun kip zong Bawipa nih nan cungah a tlunter hna lai. 62 Bawipa nan Pathian aw kha nan ngaih lo caah, van i arfi zat a rak si tawnmi kha tlawmte lawng nan tang lai. 63Cun Bawipa nih nan ca i ṭhatnak tuah le nanmah karhter kha a rak duh tawn bangin, nanmah cung i rawknak tlunter le nanmah hrawh ah Bawipa cu aa lawm lai i; co awkah nan va luhhnawhmi ram chungin phawi nan si lai. 64Cun khattelei vanhramdeng in khattelei vanhramdeng tiang Bawipa nih miphun kip sinah an ṭhek hna lai i, nanmah nih siseh nan pupa hna nih siseh nan hngalh lomi pathian, thing le lung in an sermi hna kha, khika ah nan biak hna lai. 65Cun hi miphun hna lakah hin daihnak nan hmu lai lo, nan keza ca zongah dinh ti a um lai lo, sihmanhsehlaw khika ah Bawipa nih lung retheihnak le mit hram dernak le hnabei donghnak an pek hna lai. 66Thih nun hril loin nan um lai; chunzan in therphang in nan um lai i, nan nunnak caah hnangam ti a um lai lo. 67Nan lung nih a ṭih laimi ṭihnung le nan mit nih a hmuh laimi thil hna ruangah cun zinglei ah, ‘Zanlei hei si seh law dah!’ nan ti lai i zanlei ah, ‘Zinglei hei si seh law dah!’ nan ti lai. 68Nan kal bal ti lai lo tiah bia kan kam cangmi hna lam ah khan Bawipa nih Izipt ah lawng in an kalpi ṭhan hna lai i khika ah nan ral hna sinah salpa le salnu caah nan i zuar lai, sihmanhsehlaw ahohmanh nih an in caw hna lai lo,’ tiah a ti hna.

⇑

[Remove Footnotes]