Deuteronomi 29

Moab Ram Ah Bawipa le Israel Mi Biakamnak

1Horeb tlang i annih he biakamnak a rak tuahmi hleiah khan, Moab ram chungah Bawipa nih Israel mi hna sinah Moses cu biakamnak a sertermi chung i bia hna cu mah hi an si.

2Cun Moses nih Israel mi vialte cu a kawh hna i annih cu, “Izipt ram chungah, nan hmaika ah Faro cung le a sal hna cung le a ram dihlak cungah Bawipa nih a tuahmi thil vialte kha nan hmuh cang; 3cu hna cu nan mit nih an hmuhmi hneksaknak ngan pipi hna le hmelchunhnak hna le khuaruahhar ngan pipi hna an si. 4Sihmanhsehlaw nihin ni tiangin hngalhthiamnak lungthin siseh, hmuhnak mit siseh, theihnak hna siseh Bawipa nih an pe hna lo. 5Ramlak ah kum sawm li chung kan hruai hna i, nan keng cung puan siseh nan ke cung kedan siseh an ṭet lo, 6keimah cu Bawipa nan Pathian ka si kha nan ka hngalh naklai changreu kha nan ei lo i mitsur hang le mitsur zu zong nan ding lo. 7Cun hika hmun nan phak tikah Heshbon siangpahrang Sihon le Bashan siangpahrang Og nih doh awkah an kan chuahhnawh, sihmanhsehlaw kan tei hna. * 8An ram kha kan lak i ro caah Reuben phun le Gad phun le Manasseh phun cheu kha kan pek hna. * 9Cucaah nan tuahmi kip ah khuaawng nan pemh nakhnga, hi biakamnak bia hna hi ṭha tein tuah hna u.

10Nihin ah nannih cu nan dihlak in, nan phun lu cio hna le nan upa hna le nan bawi hna le Israel mi pa vialte hna le 11nan ngakchia hna le nan nupi hna le nan riahbuk chungah a ummi mipem hna nan thinghlamtu hna le nan tithantu hna tiangin, Bawipa nan Pathian hmaiah an dir. 12Cu nan dir cu, Bawipa nan Pathian nih, nihin ah chiatser i a tuahmi biakamnak Bawipa nan Pathian biakamnak chungah nan luh nakhnga caah a si. 13Cun nan pupa Abraham le Isak le Jakob sinah bia a rak kam bangin, nihin ah nannih cu amah mi ah fehter i amah cu nan Pathian si awkah a hmai i an pumhter hna cu a si. 14Hi chiatser in biakamnak ka tuahmi cu, kanmah he nihin ah Bawipa kan Pathian hmaiah a dirmi hna he lawng hin ka ser a si lo, 15Nihin ah kan sin i a um lomi hna he zong ka ser a si.

16“Izipt ram ah zeitindah kan rak um le, zeitindah miphun dangdang kan tan pah hna kha nan hngalh; 17cun an thil fihnung a simi, thing le lung le sui le ngun in sermi an siasal hna anmah lak i a ummi cu nan hmuh cang hna. 18Nannih lakah mipa siseh, minu siseh, innchungkhar siseh, miphun siseh, Bawipa kan Pathian sinin nihin ah a lung a mer i khi miphun hna pathian hna biak awkah a kal i nannih lakah sivai ngei le a khami thei a tlaimi hram nan um sual nakhnga lo, i ralring tuah u. * 19Cu bantuk a simi pa nih hi chiatser biakamnak bia kha a theih tikah a lung chungin, ‘Ka lung khonnak hi zul ko hmanh ning law ka him ko lai,’ tiin amah le amah cu thluachuah aa pechom ko hnga. Mah cu nih cun a cin a hnawng le a ro a car an dihlak in rawknak a phakter hna lai. 20 Bawipa nih a ngaithiam lai lo, sihmanhsehlaw Bawipa thinhunnak le nahchuahnak nih cu pa cu a khut lai i hi cauk chungah aa ṭialmi chiat vialte hi a cungah an tla lai i, Bawipa nih a min cu vanrang toi in a hloh lai. 21Cun hi phungbia cauk chung i aa ṭialmi biakam chiatsernak vialte ningin Bawipa nih amah cu Israel miphun vialte chungin chiatnak pek awkah a vun thur lai. 22Cun a ra dingmi chan, nan hnuah a chuak laimi nan fale le ram hla piin a ra laimi ramdang mi hna nih, hi ram hremnak le Bawipa nih a pekmi zawtnak kha an hmuh tikah — 23cu hremnak cu, ram cu a dihlak in kat le cite, thi lakin khanghmi, zeihmanh tuh lo, zeihmanh corh lo, ram zeihmanh khoh khawh lonak a si, a thinhunnak le a thinlinhnak in Bawipa nih a hrawhmi Sodom le Gomorrah le Admah le Zeboiim rawknak bantuk a si — * 24miphun vialte nih, ‘Zeicaahdah Bawipa nih hi ram cungah hi bangin a tuah? Hi thinhunnak a linhnak hi zei sullam dah a si?’ an ti lai. 25Khi tikah mi nih, ‘ Bawipa an pupa hna Pathian i biakamnak, Izipt ram chungin a chuahpi hna tikah anmah he a sermi cu an hlawt i 26an hngalh lomi le a pek hna lomi pathian kha an rian an ṭuan hna i an biak hna caah a si. 27Cucaah hi ram cungah Bawipa thinhunnak cu a alh i hi cauk chung i aa ṭialmi chiat vialte cu an cungah a tlung. 28Cun Bawipa nih a thinhunnak, a thinphawhnak le a thinlinhnak in an ram in a phawi hna i nihin ah a si bang hin ram dang ah a hlonh hna,’ an ti lai.

29“Aa thupmi thil hna cu Bawipa kan Pathian ta an si; sihmanhsehlaw hi phungbia vialte hi kan tuah khawh nakhnga, phuanmi thil hna cu kanmah le kan fale hna ta zungzal in an si.

⇑

[Remove Footnotes]